Республикæ Хуссар Ирыстоны Президенты Барамынд

«Республикæ Хуссар Ирыстоны æнæкусгæ бонтæ расидыны тыххæй»

Цæмæй ног коронавирусон инфекци COVID-19 ма апарахат уа, уый тыххæй  Республикæ Хуссар Ирыстоны территорийыл цæрджыты санитарон-эпидемиологон хæрзуавæр сифтонг кæныны нысанæн, Республикæ Хуссар Ирыстоны Конституцийы 47-æм стаьямæ гæсгæ уынаффæ кæнын:

1. 2020 азы 8-æм апрелæй 20-æм апрелмæ бонтæ нымад æрцæуæд æнæкусгæ бонтыл, кусджыты куыстмыздтæ бахъахъхъæнгæйæ.

2. Ацы Барамынд нæ хауы ахæм организацитæм (куыстдæтджытæм æмæ сæ кусджытæм):

а) æнæрлæугæйæ чи кусы, уыцы организацитæм;

б) медицинон организацитæ æмæ аптекæтæм;

в) хæлцадон продукттæ æмæ æнæмæнгхъæуæг товартæй цæрджыты чи ифтонг кæны, уыцы организацитæм;

г) уæлвæткон уавæрты æвæстиат куыстытæ чи кæны æмæ (кæнæ) алфæмблайы адæмæн тæссаг низ апарахатæй тæссаг уавæр сæвзæрыны рæстæджы чи кусы, уыцы æмæ цард, æнæниздзинад кæнæ цæрджыты нормалон цардуагон уавæртæн тасхæссæг уавæрты чи кусы, уыцы организацитæм;

д) æвæстиат цалцæггæнæн æмæ уæзтæ æвгæнæн-æвдæлонгæнæн куыстытæ  чи кæны, уыцы организацитæм;

е) æнæаргъæвгæ финансон лæггæдтæ цы организацитæ кæнынц (фыццаг рады хыгъдтæ æмæ фиддонты фæдыл), уыдонмæ;

ж) стратегион куыстуæттæ æмæ æнæрлæугæйæ чи кусы, уыцы кондадтæм, кæцыты номхыгъд сарæзта Республикæ Хуссар Ирыстоны Экономикон рæзты министрад;

3. Паддзахадон органты кусджытæ,  паддзахадон æнæбюджетон фондты управлениты органтæ сбæрæг кæнæнт кусджыты нымæц, кæцытæ 2020 азы 8-æм апрелæй 20-æм апрелмæ ифтонг кæндзысты ацы организациты куыст.

4. Уыцы организацитæ, кæцытæ кусдзысты дзыллон информацийы фæрæзты уадзыныл, сбæрæг кæнæнт кусджыты нымæц, кæцытæ 2020 азы 8-æм апрелæй 20-æм апрелмæ ифтонг кæндзысты уыцы организациты куыст.

5. Ацы Барамынд йæ тыхы цæуы къух ыл æрфыссыны бонæй.

Республикæ Хуссар Ирыстоны Президент БИБЫЛТЫ Анатоли

г. Цхинвал,

2020 азы 7-æм апрель