Кæстæры къух тасаг у, фæзæгъынц. Уый цахæмдæр куыст йæ кармæ гæсгæ куы кæна, уæд æй цалынмæ кæронмæ бакæна, уæдмæ йын нæ вæййы æрæнцой. Ацы ран та йе ‘нцой балæууы, фæлтæрд æмæ арæхстджын къухты хицау, йæ дæсныйад иттæг хорз чи зоны æмæ йæ æнæвгъауæй кæстæр фæлтæртæн адæттынмæ чи тырны, ахæм фæлтæрдджын хъомылгæнæг.
Æвзонг техникты станцы ахуыр æмæ куыст кæныныл срæвдз кæны ахуыргæнæг-хъомылгæнæг æмæ йæ разамындæй ног зонæнтæ райсыныл бацархайы кæстæр фæлтæры минæвар. Станцы сахуыргæнæн ис дзæвгар дæсныйæдтыл æмæ алкæмæн дæр ис равзарыны фадат, зæрдæмæ тынгдæр кæцы цæуы, уыцы дæсныйад. Уыдон та сты: робототехникæ, электроникæ, механикæ, кибернетикæ, телемеханикæ æмæ æндæртæ. Ноджы ма дзы сахуыргæнæн ис радиотехникæ, радиоэлектроникæ, хъæды куыст, секци арæхстджын къухтæ æмæ æндæртæ. Ис ма дзы, бынтон ног чи нæу, фæлæ станцы коллектив æрæджы кæй байгом кодта, ахæм- тризетучка, ома, пластик стæвд кæн æмæ дзы стæй сараз цахæмдæр модель, формæтæм гæсгæ. Ацы ахуыры аз станцы байгом ног кружок æмæ хуыйны модель витража. Уый бындуронæй у профессионалон нывгæнджыты куыст, фæлæ йæ ахуыргæнджытæ амонын райдыдтой сæ хъомылгæнинæгтæн дæр. Цыфæнды авгæй дæр ис спайдагæнæн æмæ уый амал кæнынц бынаты, фæлæ йын йæ ахорæн та балхæнынц Дзæуджыхъæуы. Уыцы ахорæн бынтон тæнæг дæр нæу, басур вæййы тагъд æмæ стæй баззайы хъæбæрæй.
Зæгъын хъæуы уый, æмæ горæты скъоладзаутæй алкæй бон нæу станцы ахуыр кæнын бæрæг аххосæгтæм гæсгæ. Уыдон дæр рох не сты станцы ахуыргæнджытæй æмæ сын ауадзынц мастер-къластæ æмæ уый фæстиуæгæн фæхæст вæййынц цахæмдæр технологийыл. Уымæй дарддæр ма коллективы фæнд у хъæууон скъолатæм, ацæуын сæ кусæн-гæрзтимæ æмæ сын бынаты мастер-къластæ ауадзын. Уый куыд ахуыргæнджытæ, афтæ сывæллæттæн дæр вæййы бæрæгбоны хуызæн.
Станц ифтонг у хъæуæг ифтонггæрзтæй, иутæ хæлгæ дæр фæкæнынц, фæлæ сын сæ бынатмæ ногтæ дæр балхæнынц. Æрмæст цух сты компьютертæй. Горæты равдыстыты дæр райсынц хайад. Афтæ ма онлайн равдыстытæ æмæ конкурсты дæр. Уый тыххæй хъæуы куысты ныв æмбæлон амындтытимæ конкурсмæ æрвитын.
Зæрдæрухсгæнæн фæстиуджытæ станцы коллективæн йæ къухты æфты, куыстуарзаг æмæ иттæг хорз ахуыргæнджытæ сывæллæттимæ кæй фыдæбон кæнынц, уый фæрцы. Уыдоны ‘хсæн фыццаджыдæр зæгъын хъæуы Плиты Иналы тыххæй Хуссар Ирыстоны пединститут каст фæуыны фæстæ кусын райдыдта ам æмæ дзы намысджынæй фæллой кæны абоны онг. Йæ хъуыддаг хорз чи зоны æмæ сывæллæттимæ кусынæй фæллад чи нæ зоны, ахæмтæ сты Цхуырбаты Роланд, Бибылты Маринæ, Икъоты Светланæ, Дочиты Михаил, Гасситы Антон. Коллективæн та арæхсджын разамынд кæны йæ директор Къалаты Нариман.
ХУЫБИАТЫ Никъала
