Нæ горæты иумæйагахуырадон уагдæттæй уæлдай ис уæлæмхас ахуыр-хъомыладон уагдæттæ дæр. Уым ахуыргæнинæгтæ скъолайæ сæрибар рæстæг цайдагъ кæнынц алыгъуызон дæсныйæдтыл. Сывæллæтты сфæлдыстадон галуан Æвзонг натуралистты æмæ техникты станцты кружоктæм цы сывæллæттæ цæуынц, уыдон стыр цымыдисимæ фæархайынц сæ равзаргæ дæсныйæдты сусæгдзинæдтыл. Зæгъын хъæуы уый, æмæ сывæллон æдзух уроктыл куы бада, уæд сфæлмæцы. Уæлæмхас ахуыр-хъомыладон уагдæтты руаджы та ахуыргæнинаг йæхи ирхæфсы æмæ ма уыцы иу рæстæджы исы зонындзинæдтæ дæр. Зæгъæм, Æвзонг натуралистты станцмæ цы сывæллæттæ цæ-уынц, уыдон цайдагъ кæнынц зæххы куыст, цæрæгойтæ æмæ зайæгойтæм зилыныл, акæнынц сæ æрдзы хъæбысмæ æмæ сæ уым зонгæ кæнынц зайæгойты дунеимæ, фенын сын кæнынц цымыдисон бынæттæ – цыртдзæвæнтæ, кувæндæттæ, мæсгуытæ, стæй сæ зонгæ кæнынц хицæн кæмтты æмæ хъæуты историимæ.
Ахæм мадзæлтты рæстæджы сывæллæттæм сæвзæры æрдзмæ уарзондзинад. Уымæй уæлдай ма сывæллæтты ахуыр кæнынц зайæгойты хъæрмуаты куыд садзын хъæуы æмæ сæм куыд зилын хъæуы, уыцы сусæгдзинæдтыл. Ам ма уæвынад кæны æвзонг метеорологты къорд дæр. Сæрмагонд датчикты руаджы æвдыст цæуынц уæлдæфы температурæ, дымгæйы тыгъдад, уæлдæфы умæлад, боныгъæд цахæм уыдзæн, уыдæттæ. Афтæмæй сывæллæттæ сæ хъус дарынц боныгъæдмæ.
Сывæллæтты сфæлдыстады галуаны дæр ис бирæ алыгъуызон кружоктæ. Ахуыры фæстæ ардæм æрбацæуынц скъоладзау-тæ æмæ сæ зонындзинæдтæ уæрæхдæр кæнынц. Бæстæзонæн аивад, фыдæлты ис-тори, математикæ, фæсарæн æвзæгты къор-дæй дарддæр ам ис шахматтæ æмæ шаш-кæты кружоктæ дæр.
Æвзонг техникты станц арæзт æрцыд 1967 азы. 2008 азы августы хæсты рæстæджы тынг бахъыгдард æмæ дзы ахуыр кæнынæн нал уыдысты æмбæлон уавæртæ. Уæддæр ардæм, цы лæппутæ æмæ чызджытæ цыдысты, уыдон сæ зæрдæ нæ сивтой сæ кружоктыл. Уазал хатæнты дæр-иу сæ куыст кодтой.
2016 азы республикæйы разамынад æркаст Æвзонг техникты станцы уавæрмæ æмæ дзы æххæст æрцыдысты, арæзтадонцал-цæггæнæн куыстытæ. Ныртæккæ ам архайы ахæм къордтæ, куыд арæхстджын къухтæ, электротехникæ, хъæдæрмæджы куыст æмæ æнд. Фæзынд дзы ног къорд дæр – робототехникæ. Къорды сæргълæуджытæ сты фæлтæрдджын ахуыргæнджытæ. Станцы цы хатæнтæ ис, уыдон се ‘ппæт дæр сты райдзаст æмæ хæрзæфснайд, нырыккон ифтонггæрзтæй ифтонг. Уымæ гæсгæ ам ахуыртæ цæуынц рæвдз. Ам куыд зæгъынц, афтæмæй скъоладзаутæ иууыл тынгдæр цæуынц хъæдыл нывæфтыдтæгæнæн къордмæ. Æрвылбон дæр ардæм разæнгардæй фæцæуынц лæппуты æмрæнхъ чызджытæ дæр. Стыр цымыдис кæнынц сабитæ хъæдæрмæгæй дзаумæттæ аразынмæ дæр. Афтæ аив сын вæййынц æмæ сæм фау æрхæссæн дæр нæ вæййы.
Æвзонг техникты станцæн къорд ис Цхинвалы скъола-интернаты. Æрæджы та ахæм къорд гом æрцыд Дзауы астæуккаг скъолайы. Арæх сæ бабæрæг кæнынц Æвзонг техникты станцы къухдариуæггæнджытæ æмæ цæмæй куыст æмбæлонæй цæуа, уый тыххæй та саразынц равдыстытæ, конкурстæ. Хуыздæр ахуыргæнинæгтæ хорзæхджын æрцæуынц грамотæтæй. Сæ зæрды ис ахæм къордтæ саразын Знауыр æмæ Ленингоры районты дæр. Ахуырад æмæ зонады министрад арæх бабæрæг кæны Æвзонг техникты станц, уыдон зæрдæмæ цæуынц наутæ аразыны конструкцитæм йæ хъус цы ахуыргæнинæгтæ дарынц, уыдон куыстытæ. Афтæ æмæ ныфс æвæрæн ис, сабитæ техникæйы куыстыл кæй фæцайдагъ уыдзысты æмæ фидæны сæхицæн дæсныйад равзарынæн сын кæй баххуыс уыдзæн.
Æвзонг техникты станц ногæй куы сырæзт, уæд ын уæлæмхас арæзт æрцыд равдыстыты стыр зал дæр. Уым æвæрд сты ахуырдзауты хуыздæр куыстытæ. Уыдонмæ кæсгæйæ зæрдæ рухс кæны, ныфсдæттæг сты фидæнæн.
Æвзонг техникты станцы ахуырдзаутæ хайад райсынц æндæр горæты æмæ республикæты алыгъуызон мадзæлтты. Бацахсынц призон бынæттæ дæр æмæ сæ уый тынгдæр разæнгард кæны ноджы хуыздæр æнтыстытæм. Сабитæ та, ахæм кружоктæм цæугæйæ, сæхи иппæрд кæнынц Интернеты æгæр æндæвдадæй.
УАЗÆГТЫ Марфæ
