Мидхъуыддæгты министрады рæстæгмæдарæн изоляторы кусджытæн æмæ дзы чи бады, уыдонæн сарæзтой тесттæ æмæ дзы разынд коронавирусæй рынчынтæ. Ӕдæппæт сарæзтой 28 тесты, уыдонæй 22 разындысты рынчынтæ. Арæзт ма сын æрцыд компьютерон томографи дæр æмæ дзы æртæйæн рабæрæг пневмонийæ. Изоляторы чи бады, уыдонæй коронавирусæй низджынтæ разындысты астæй. Рынчынты иууылдæр акодтой Дзауы районон рынчындонмæ, цæмæй сын æмбæлон уавæрты схос кæной. Ведомствойы медикон-санитарон хайады сæргълæууæг Мæргъиты Георгийы ныхæстæм гæсгæ рынчынты уавæр у стабилон æмæ дзы тæссагæй ницы ис.
«Изоляторы чи бады, уыдонæй иу рынчынæн рабæрæг пневмонийæ астæуккаг хуызы, дыууæйæн та – рог хуызы. Ист æрцыдысты æппæт мадзæлттæ, цæмæй рынчынтæн бакæнæм æмбæлон медицинон æххуыс. Ныридæгæн иууылдæр сæхи хатынц хорз. Коронавирусы низ нæ республикæйы кæй апарахат, уый фæдыл изоляторы дæр развæлгъау ист æрцыдысты профилактикон мадзæлттæ, æххæст кодтам санитарон нормæтæ, нал уагътам мидæмæ æддагæтты. Ӕрвылбон дæр, куыд кусджытæн, афтæ ахст адæмæн дæр барстам сæ тæвд, лӕвӕрдтам сын вирусты ныхмæ хостæ æмæ витаминтæ, ифтонг сæ кодтам æнæмæнгхъæуæг дзаумæттæй, фæлæ, хъыгагæн, низ уæддæр баирвæзт мидæмæ», – зæгъы Мæргъиты Георги.
Рынчынтæ цалынмæ адзæбæх уой, уæдмæ уыдзысты Дзауы рынчындоны. Хъахъхъæнынц сæ милицийы рæстæгмæ дарæн изоляторы æмæ сæрмагонд нысаниуӕджы къорды кусджытæ.
ДЖИОТЫ Александр
Comments are closed, but trackbacks and pingbacks are open.