Профцæдисты архайд у адæмы хæрзиуæгæн

Профцӕдисон организаци советон дуджы куыд æгас Советон Цæдисы, афтæ Хуссар Ирыстоны дæр уыд иууыл хъомысджындӕр организацитӕй сӕ иу. Цы егъау бӕстыхай ахста, уый ма абон дӕр адӕм хонынц Профцӕдисты хӕ-дзар. Абон йӕ куыст куыд аразы ӕмӕ сӕм цы плӕнттӕ ис, уыдоны тыххӕй нын радзырдта Республикӕ Хуссар Ирыстоны Профцӕ-дисты советы сӕрдар Джергаты Жаннӕ.

Йӕ ныхӕстӕм гӕсгӕ, проф-цӕдистӕ Хуссар Ирыстоны фӕзындысты 1922 азы 17 майы. Нӕ республикӕйы уæззау дуджы дӕр æмæ ныртæккæ дæр   Профцӕдисты совет йæ куыст кӕны, уыцы нымӕцы нӕ республикӕйы цӕрджыты ӕнӕниздзинад фӕхуыздӕр кӕныны хъуыддаджы дӕр. 

«Ӕрвылаз дӕр профцӕдисон организацийы фӕрцы се ‘нӕниздзинад фӕхуыздӕр кӕнынц ӕмӕ баулӕфынц Уӕрӕсейы  бирӕтӕ. Ивгъуыд  аз октябры мӕйӕ абоны онг Минералон дӕтты курорттӕм ӕрвыст ӕрцыд  80 адӕймаджы хатырон аргъмӕ гӕсгӕ, ома, балцӕджы аргъӕй хатыр  цӕуы 20 %. Уый уыд, Цӕгат Ирыстонимӕ ацы фӕдыздӕхты ӕнгом баст-дзинад кӕй ис, уый фӕрцы. Кӕд ӕмӕ, улæфынмæ кæй арвитæм, уыцы адӕймаг у профцӕдисон организацийы уӕнг, уӕд ма йын ам, бынаты дӕр, хатыргонд цӕуы ноджыдӕр 20%. Арӕх профцӕдисмӕ ӕрбахатынц нӕ республикӕйы мидхъуыддӕгты ор-ганты кусджытӕ ӕмӕ дзы бирӕтӕ ӕрвыст ӕрцӕуынц алыхуызон ку-рорттӕм. Знауыры районы нӕхи бынӕттон хосгӕнӕндон «Ныфс»-мӕ та 50 %  хатыр райсынц, профцӕдисты уӕнгтӕ чи сты, уыцы адӕм. Ивгъуыд аз июны мӕйӕ абоны онг санаторитӕ ӕмӕ курорттӕм ӕдӕп-пӕт ӕрвыст ӕрцыд 200 адӕймаджы. Ӕнӕниздзинады фарст тынг ахсджиаг у абон нӕ республикӕйы, уымӕн ӕмӕ тынг бирӕ у рынчынты нымӕц. Ӕмӕ мах та нӕ организацийы фӕрцы архайӕм, ӕххуыс кӕнӕм ахӕм адӕ-мӕн се ‘нӕниздзинад фӕхуыздӕр кӕнын», – банысан кодта Джергаты Жаннӕ.

Абон РХИ-йы профцӕдисты сконды ис дыууӕ къабазон баиугӕнды: горӕты ахуырады кусджыты профцӕдисон комитет ӕмӕ горӕты культурӕйы кусджыты профцӕдисон комитет. Уымӕй дарддӕр нӕ республикӕйы 11 паддзахадон  куыстуаты ӕмӕ уагдоны ис профцӕдисон организацитæ. Уыдон сты: ахуырады министрады аппарат, лицензион комитет, транспортон управлени ӕмӕ ӕндӕртӕ. «Уый у тынг чысыл нымӕц. Профцӕдисты сконды хъуамӕ уа алы паддзахадон куыстуат ӕмӕ уагдон дæр, уый у сӕхицӕн пайда. Æмæ раздæр афтæ дæр уыдис, фӕлӕ фӕстагмӕ рахызтысты йӕ скондӕй, куыстмыздӕй 1% фидын кӕй хъуыди, уый тыххӕй. Фӕлӕ ӕмбарын хъӕуы уый, ӕмӕ уыцы иу процент адӕмӕн сӕхимӕ кӕй здӕхы фӕстӕмӕ, сӕхи пайдайӕн кӕй у», – загъта Советы сӕрдар. «Бирӕтӕ не ‘мбарынц профцӕдистӕ ӕнӕмӕнгхъӕуӕг ӕмӕ организацитӕн сӕхи хӕрзиуӕгӕн кӕй сты. Уый тыххӕй мах азилӕм организацитыл ӕмӕ фӕныхас кӕнӕм кусджытимӕ, бамбарын сын кӕнӕм, алы организаци дӕр профцӕдисты сконды кӕй хъуамӕ уа», – загъта Жаннӕ. Раздӕр, кӕй зӕгъын ӕй хъӕуы, республикӕйы адӕм фылдӕр куы уыдысты, уӕд профцӕдисты уӕнгтӕ дӕр уыдысты бирӕ фылдӕр, уӕд алы кусӕг дӕр уыд ацы организацийы сконды. Абон профцӕдисы авналӕнтӕ  сты къуындӕг, нӕй йын фадат, цӕмӕй ӕххӕстбӕрцӕй йӕ куыст ӕххӕст кӕна. Джергаты Жаннӕ куыд загъта, уымӕ гӕсгӕ сæ проблемæтимæ зонгæ сты нӕ паддзахады къухдариуӕгад ӕмӕ йӕ ныфс ис, скъуыддзаг кӕй ӕрцӕудзысты.

«Ам зӕгъын хъӕуы фӕсивӕды тыххӕй. Уыдон уӕлӕнгай цӕстӕй кӕсынц профцӕдисты организацимӕ. Афтӕмӕй та уыдон хъуамӕ уой ахӕм хъуыддӕгты раззагонтӕ. Фӕсивӕдон профцӕдисон организаци ис ӕрмӕстдӕр паддзахадон университеты. Уым студенттӕ иууылдӕр сты профцӕдисон организацийы уӕнгтӕ.

Цӕмӕй профцӕдисон организаци арӕзт ӕрцӕуа, уый тыххӕй сӕйраг у уыцы организацийы кусджыты фӕн-дондзинад. Хуссар Ирыстоны профцӕдистӕн хорз бастдзинӕдтӕ ис Цӕгат Ирыстон, Донецк, Абхазаг профцӕдистимӕ. Профцӕдисон чыртӕ сын ис нӕ горӕты скъолаты: гимнази «Альбион»-ы, Колыты Аксойы номыл Аивӕдты лицейы, 1-ӕм скъолайы, сывӕллӕтты сфӕлдыстадон галуаны.

Нӕ дуӕрттӕ та сты гом алкӕцы организаци, алкӕцы куыстуатӕн дӕр», – зæгъы Джергаты Жаннæ.

КЪӔБЫСТЫ Зæринӕ