Республикæ Хуссар Ирыстоны Президент Бибылты Анатоли йæхимæ райста академик Иван Павловы номыл фыццаг Санкт-Петербургаг паддзахадон медицинон уинверситеты дохтырты, кæцытæ Хуссар Ирыстонмæ æрцыдысты ног коронавирусон инфекци аиуварс кæнынæн баххуысы тыххæй.
Дыууæ къуырийы дæргъы специалисттæ куыстой Цхинвалы рынчындæтты, COVID-19-æй хос кæныны фæдыл сæ фæлтæрддзинад дих кодтой бынæттон дохтыртимæ.
Фембæлды ма хайад райста Республикæ Хуссар Ирыстоны Æнæниздзинад хъахъхъæнын æмæ социалон рæзты министры хæстæ æххæстгæнæг Тотчиты Георги.
Бибылты Анатоли бузныджы ныхæстæ загъта республикæйы адæмы номæй пандемийы ныхмæ тох кæныны бакæнгæ æххуысы тыххæй. Президент банысан кодта, зæгъгæ, хуссарирыстойнаг дохтыртæ стыр аргъ кæнынц Санкт-Петербургаг коллегæтæ сын цы фæлтæрддзинад æмæ зонындзинæдтæ балæвар кодтой, уыдонæн.
«Стыр бузынг уын, уымæн æмæ адæймаг куы æнкъара йæ хæлары æххуыс, уæд ын æнцондæр у размæ цæуынæн, тох кæнын, æнцон у æппæт дæр аразын, цæмæй фæхуыздæр уой коронавирусы ныхмæ тох кæныны фæстиуджытæ», – загъта уый.
Анестезиологи æмæ реанимацийы зонадон клиникон центры анестезиологи æмæ реанимацийы сæргълæууæг Александр Хряпа æмæ Хирурги æмæ æнæаргъæвгæ медицинæйы зонад-иртасæн институты зæрдæ-дадзинты хирургтæ Владимир Комок æмæ Алан Дулаев хорзæхджын æрцыдысты Республикæ Хуссар Ирыстоны Кады грамотæтæй Республикæ Хуссар Ирыстоны коронавирусон инфекци COVID-19 аиуварс кæнынæн æххуысы тыххæй.
Александр Хряпа бузныджы ныхæстæ загъта Бибылты Анатолийæн йæ хъарм химæрайсты тыххæй.
«Махæн тынг æхсызгон у, Анатоли Ильяйы фырт. Мах архайдтам, нæ бон куыд уыд, афтæ æххуыс кодтам рынчынтæн», – загъта уый.
Президент бахатыд уазджытæм, цæмæй саргъ кæной хуссарирыстойнаг дохтырты куыстæн, кæцытæ абоны бон æххуыс кæнынц COVID-19-æй рынчынтæн.
«Мах æнгомæй куыстам дохтыртимæ. Æмæ кæд исты цухдзинæдтæ вæййы, уæд сæ уайтагъд сраст кæнынц, пациенттæ уый хъуамæ фæхатыдаиккой», – загъта Александр Хряпа.
Comments are closed, but trackbacks and pingbacks are open.