Президент Гаглойты Алан фембæлд Уæрæсейы Федерацийы Хицауады Сæрдар Александр Новакимæ, кæцы Цхинвалмæ æрцыд Республикæ Хуссар Ирыстон æмæ Уæрæсейы Федерацийы ‘хсæн социалон-экономикон æмгуысткæнынады фæдыл Æхсæнхицауадон къамисы 22-æм рабадты хайад райсыны тыххæй.
Фембæлды рæстæджы Гаглойты Алан бузныг загъта уæрæсейаг делегацийы сæргълæууæгæн Уæрæсейы фарсæрдыгæй Хуссар Ирыстонæн æххуысы æмæ фарсхæцынады тыххæй.
«Ды фыццаг хатт æрцыдтæ Хуссар Ирыстонмæ æмæ мæ ныфс ис, нæ иумиаг куыстæй райгондæй кæй баззайдзынæ. Банысан кæнын мæ фæнды уый, æмæ хуссарирыстойнаг здæхты кусын куы райдыдтай, уæдæй фæстæмæ не ‘мгуыстад кæй рахызт ног, гъæдджындæр æмвæзадмæ», – загъта Президент.
Уыимæ иумæ хуссарирыстойнаг паддзахады сæргълæууæджы ныфс ис æнтыстджын куыстæй Æхсæнхицауадон къамисы фæлгæтты.
Йæ рады Александр Новак бузныг загъта Гаглойты Аланæн, зæрдиагæй йæ кæй райста, уый тыххæй.
«Нæ бæстæты ‘хсæн ахастытæ бæрзонд æмвæзадыл сты. Ацы аз ды фембæлдтæ Уæрæсейы Федерацийы Президент Владимир Владимиры фырт Путинимæ. Фембæлды рæстæджы уынаффæ цыд нæ бæстæты ‘хсæн базарадон-экономикон ахастыты перспективæйыл. Æз куыд Æхсæнхицауадон къамисы æмсæрдар, афтæ æххуыс кæндзынæн Хуссар Ирыстоны социалон-экономикон рæзтæн, базарадон-экономикон бастдзинæдтæн, афтæ ма социалон программæты реализацийæн, кæцытæ нысан æрцыдысты кæнæ ныридæгæн реализаци цæуынц», – загъта уый.
Александр Новак банысан кодта, зæгъгæ, Республикæ Хуссар Ирыстоны Хицауады Сæрдар, хуссарирыстойнаг фарсæрдыгæй Æхсæнхицауадон къамисы æмсæрдар Джуссойты Константинимæ иумæ уынаффæ кодтам къорд ног проекттыл, кæцытæ здæхт сты Хуссар Ирыстоны социалон-экономикон æмвæзад фæбæрзонддæр кæнынмæ.
«Ног проекттæ республикæйæн ратдзысты ног кусæн бынæттæ, паддзахадон бюджетмæ бацæудзæн уæлæмхас æфтиæгтæ, уыдæттæ та ахъаз кæндзысты адæмы царды æмвæзад фæбæрзонддæр кæнынæн», – загъта уый.
Александр Новак Гаглойты Аланæн ныфс бавæрдта Республикæ Хуссар Ирыстонæн Уæрæсейы Федерацийы æрдыгæй дарддæр дæр æххуыс кæнынæй.
—————
(Æхсæнхицауадон къамисы радон
рабадты æрмæджытæ мыхуыр
æрцæудзысты нæ газеты радон номыры.)
