Президент æрдомдта æнæаргъæвгæ мадзæлттæ райсын

Республикæ Хуссар Ирыстоны Президент Бибылты Анатоли ауагъта кусæгон æмбырд горæт Къуайсайы рынчныдон хостæй сифтонг кæныны фарстыты фæдыл.

Паддзахады сæргълæууæг бабæрæг кодта Къуайсайы рынчындон, цыран хос кæнынц COVID-19 рынчынтæн æмæ уавæры фæдыл æруынаффæ кодта Æнæниздзинад хъахъхъæнын æмæ социалон рæзты министры хæстæ рæстæгмæ æххæстгæнæг Тотчиты Георгиимæ, уагдоны сæйраг дохтыр Цхуырбаты Ульянæ æмæ медицинон персоналимæ.

Рынчныдоны сæйраг дохтыр куыд радзырдта, афтæмæй сæм цæуынц бирæ адæм.

«Æз афтæ хъуыды кæнын æмæ мах уавæр стабилизаци скодтам. Рынчындоны хос кæнынц 18 пациентæн, иннæтæм нæ хъус да-рæм сæ хæдзæртты. Нæй ахæм рынчынтæ, кæцыты мах нæ басгарæм», – загъта уый.

Бибылты Антоли бузныджы ныхæстæ загъта æппæт медицинон кусджытæн æмæ бахатыд, цæмæй хосты ифтонгады уавæры фæдыл радзурой.

«Ныртæккæ алцыдæр æлхæнынц рынчынтæ. Æрæджы Æнæниздзинад хъахъхъæныны хаххыл æрластам хостæ, фæлæ сæ фылдæр фесты. Нæй нæм гепарин, дексаметазон, æндæр препараттæ», – загъта Цхуырбаты Ульянæ.

Президент бахæс кодта Тотчиты Георгийæн, цæмæй горæт Къуайса райса йæхи сæрмагонд контролмæ.

«Куыд зонын, афтæмæй дæуæн ис хæдивæг, Плиты Агуындæ, кæцы дзуапп кæны районтæн. Фæлæ мах уынæм куысты фæс-тиуджытæ. Горæт дард ран кæй ис, уымæ гæсгæ йæм хъæуы лæмбынæг хъусдард. Георги Феликсы фырт, æнæмæнгхъæуæг цы у, уыдон иууылдæр хъуамæ ласт æрцæуой абон», – банысан кодта Бибылты Анатоли.

Æмбырды рæстæджы уый æрдомдта, цæмæй саразой хосты номхыгъд. Уырдæм хаст æрцыдысты хостæ, тесттæ уадзынæн хардзон æрмæджытæ æмæ хи хъахъхъæныны фæрæзтæ.

Дохтырты ныхæстæм гæсгæ, уыдонæн нæ фаг кæны хи хъахъхъæныны дарæс.

«Махмæ ис хи хъахъхъæныны дарæс, фæлæ уыдоны мидæг зын у кусын, уæлдайдæр бирæ рæстæджы дæргъы. Уымæ гæсгæ махæн æнцондæр уыдаид хъуымацонфæсмын комбинезонты мидæг кусын», – загъта рынчындоны дохтыр.

Цхуырбаты Ульянæ бахатыд, цæмæй сæ хъус æрдарой, паци-ентты бирæ нымæцимæ кæй фæфылдæр сты хæлцады хæрдзтæ.

«Спайда кæнут иннæ мæйтæн æвæрд фæрæзтæй, уыдон уый фæстæ æххæст æрцæудзысты. Ууыл ма тыхсут», – загъта Президент.

Хицæнæй ма нысангонд æрцыд туаггуыры балонты цухдзинад.

Æмбырды рæстæджы нысан æрцыд рынчындонмæ туаггуыр æнæкъуылымпыйæ ласыны фæтк.

Тотчиты Георги бахатыд, цæмæй йын радзурой медицинон кусджыты ‘хсæн рынчынты тыххæй.

Цхуырбаты Ульянæйы ныхæстæм гæсгæ, рынчын сты дыууæ медицинон хойы. Уыдонæй сæ иу госпитализаци æрцыд рынчындонмæ, иннæ та æрбацæуы процедурæтæм. Кусынц дыууæ бригадæйы, кæцытæ ивынц сæ кæрæдзи.

Сæйраг дохтыр ма фехъусын кодта рынчынты фæдыл бæрæггæнæнты тыххæй.

«Бæлвырд тесттæ сты 30, æмæ мах ноджы æнхъæлмæ кæсæм тестты фæстиуджытæм, кæцытæ æрвыст æрцыдысты Цхинвалмæ», – банысан кодта уый.