Республикæ Хуссар Ирыстон – Паддзахад Аланийы сæргълæууæг Гаглойты Алан æрæджы ауагъта æрвылкъуырион æмбырд республикæйы тыхон структурæты къухдариуæггæнджытимæ. Æмбырды хайад райстой Хицауады сæрдар Джуссойты Константин æмæ Уæлдæр тæрхондоны сæргълæууæг Коцты Олеся.
Дзабиты Инал æмæ Куымæридтаты Сæрмæты амæлæты цауты фæдыл уголовон хъуыддæгты фæдагурæн мадзæлтты фæдыл Президент бахæс кодта, цæмæй уголовон хъуыддæгтæ Генералон прокуратурæмæ бакусынмæ æрвыст æрцæуой. Фæстаг хатт, зæгъгæ, дзырд цæуы ацы фарстытыл.
«Куыд ис гæнæн, æмæ горæты æмæ Уæлдæр тæрхондоны прокуратурæты минæвæрттæн иу хъуыддаджы фæдыл уа бынтон æндæргъуызон хъуыдытæ.
Кæнæ хъуыддаг уыдзæн прокуратурæйы, науæд та прокуратурæйы кусджытæ сæ бынæттæй ист æрцæудзысты», – бахæс кодта Президент.
Уый ма тыхон структурæты сæргълæуджытæн бахæс кодта, цæмæй сæ хъус дарой хицæн кусджыты архæйдмæ.
Мидхъуыддæгты министр Гæззаты Валери уагдоны архайдæн хъыгъд аразгæйæ, информаци радта республикæйы министрады дæлбар дæлхæйтты куыст æмæ архайдæн, фæндагон-транспортон цауты, фыдракæндон архайды фæстиуджыты æмæ алыгъуызон æхсæнадон фæтк фехалыны тыххæй цал адæймаджы æфхæрд æрцыд, уыдон фæдыл.
Министр æрдзырдта фадыгон инспекторты куысты фæдыл, зæгъгæ, уыдон цæуынц æмæ бæрæг кæнынц цæрджыты домындзинæдтæ. Бæрæг бакуыстгонд графикмæ гæсгæ, горæтон æмæ районон управлениты фадыгон инспектортæ Уæлвæткон уавæрты министрады минæвæрттæ информаци æмæ æхсæнадон бастдзинады хайадимæ иумæ уадзынц рейдон мадзæлттæ улæфæн бынæтты æмæ донбылгæрæтты. Уыцы мадзæлттæ здæхт сты фæткхалæн цаутæ, зынгсирвæзтытæ ма æруадзын æмæ нæ алфæмблай сыгъдæгдзинад хъахъхъæнынмæ.
Бæстæйы сæргълæууæг æнæразыдзинад равдыста, улæфæн бынæттæй бирæ рæтты æнæуаг уавæры фенæн кæй ис, уый фæдыл. Уымæ гæсгæ бахæс кодта министрæн, цæмæй фадыгон инспектортæн ацы фарстмæ бæрнон ахаст æвдисын райдайой.
«Цы фадыгон инспекторы территорийыл бæрæг цæуа æнæуаг уавæры нывтæ, уыцы бынат уый сыгъдæг кæндзæн хæрзарæзтады комбинаты кусджытимæ иумæ. Æмæ уæд бæрæг кæндзысты фæткхалæн цаутæ улæфæн бынæтты. Уымæн æмæ донбылгæрæттæ сты чъизи, сывæллæтты ахæм бынæттæм акæнæн нæй гæнæн. Алчидæр хъуамæ уыцы бæрндзинад æнкъара æмæ йæ куыстмæ æмбæлон ахаст дара», – банысан кодта Президент.
Фæтк æмæ закъон хъуамæ, фыццаджыдæр, барадхъахъхъæнæг органты кусджытæ хъахъхъæной.
Хыгъдон рæстæджы Хуссар Ирыстоны æдасдзинады фадыджы оперативон уавæр у стабилон. Уый фæдыл фехъусын кодта Паддзахады Æдасдзинады комитеты сæргълæууæджы хæдивæг Туаты Алан.
Гаглойты Алан куыд банысан кодта, уымæ гæсгæ йæм ис ахæм информаци, æмæ комитеты иуæй-иу кусджытæ сæ службæйон бартæй пайдагæнгæйæ, архайынц, стигъынц æмæ кæйдæрты фыдракæндты æмбæрзынц. Уымæ гæсгæ Президент бахæс кодта, ацы информаци сбæрæг кæнын. Кæд сбæлвырд уа, уæд закъонмæ гæсгæ мадзæлттæ ист æрцæудзæн сæ ныхмæ.
Арæнгæрон службæйы къухдариуæггæнæг Алиханты Ва-лериан бæстæйы сæргълæууæгæн фехъусын кодта, паддзахадон арæнтыл æдасдзинад ифтонг кæныны фæдыл цахæм архайд цæуы, уый тыххæй.
Паддзахадон арæнтæ хъахъхъæныны фæдыл бардзырдмæ гæсгæ, Хуссар Ирыстоны Уæрæсейы Федералон æдасдзинады арæнгæрон управлениимæ æмархайды фæлгæтты райстой, Хуссар Ирыстоны территорийæ Гуырдзыстонмæ уадзæн пунктты организаци чи æрцыд, ахæм иуæй-иу мадзæлтты тыххæй информаци.
«Паддзахадон арæнтыл хизыны бынæттæ «Раздæхæн» æмæ «Переу»-ы гуырдзиаг фарс уагъта контролон мадзæлттæ. Сæйраджыдæр, документтæн истой сæ нывтæ, Хуссар Ирыстоны цæрджыты фарстой æхсæнадон-поли-тикон уавæры тыххæй», – дзырдта ныхасгæнæг.
Йæ ныхæстæм гæсгæ 20 æмæ 21 августы Душеты муниципалитеты Олдисы цæрæн пункты гуырдзиаг информацион фæрæзтæ интервьютæ истой Ленингоры цæрджытæй æмæ цымыдис кодтой – Хуссар Ирыстоны бынæттон органтæ сæ хъыг дарынц æви нæ. Ацы хъуыддагмæ сæ хъус дарынц Гуырдзыстоны Евроцæдисы миссийы кусджытæ. Арæнгæрон службæйы информацимæ гæсгæ змæлд «Сила в единстве»-йы лидер Давид Къацарава бæрæг кодта арæнтæм æввахс хъæутæ, уавæрмæ йæ хъус дардта æнæпилотон тæхæн аппараты руаджы.
Паддзахадон арæнты сæрты контрабандон æмæ æндæр æнæзакъонон товартæ æмæ уæзтæ ласын æмæ санитарон-эпидемиологон мадзæлттæ хъахъхъæныны тыххæй Арæн-гæрон управленийы къухдариуæгады хъуыдымæ гæсгæ «Переу»-ы паддзахадон арæныл хизыны бынаты хъæуы контролгæнæг органты куыст сорганизаци кæнын.
Бæстæйы таможнæйон комитет паддзахады бюджетмæ ацы аз 29 августæй фæстæмæ бахаста 7 милуан æмæ 773 мин сомы бæрц фæрæзтæ. Уый тыххæй та æмбырды рæстæджы фехъусын кодта комитеты сæргълæууæг Цхуырбаты Мурат.
Президент цымыдис кодта, комитетæй хæсджын цал уагдоны сты, уыцы фарстмæ. Йæ сæргълæууæджы ныхæстæм гæсгæ уыдон нырма сты фондз фирмæйы. Сæ иумиаг суммæ у 56 милуан сомы, уыдонæй нырма æрбаздæхтой 5 милуан сомы.
Гаглойты Алан бахатыд Контролон-нымайæн палатæйы къухдариуæггæнæджы хæдивæг Хуыбылты Вадиммæ, цæмæй куыст фæтагъддæр уа, уымæн æмæ цы басгæрстытæ бахæс кодта бæрæг куыстуæтты, уыдон ныддаргъ сты.
Хъахъхъæнынады министр Марат Павлов хыгъд скодта уагдоны куыстæн, зæгъгæ, æххæст гуырахстæй реализаци цæуынц планон мадзæлттæ. Сæйраг тыхтæ здæхт æрцыд министрады исад Контролон-нымайæн палатæйы минæваримæ инвентаризаци кæныны хъуыддагмæ.
Уый ма хыгъд скодта йæ кусæгон балцы фæстиуджыты тыххæй, фембæлд, Уæрæсейы Хъахъхъæнынады министрады хаххыл цы хуссарирыстойнаг курсанттæ ахуыр кæнынц, уыдонимæ, базонгæ сæ ахуыр æмæ царды уавæртимæ.
Президент бахæс кодта министрæн, цæмæй аспирантурæты цы курсанттæ ахуыр кæндзысты, уыдонæн ноджыдæр бамбарын кæной, коронавирусон инфекцийы ныхмæ æнæмæнгхъæуæг вакцинаци саразыны фæткойтæ.
Уæлвæткон уавæрты министры хæстæ æххæстгæнæг Цоциты Азæмæт дæр фехъусын кодта республикæйы æрцæугæ уæлвæткон уавæрты статистикæ, сæрмагондæй та, зынгсирвæзты цаутæ.
Президент банысан кодта, зæгъгæ, министрады кусджыты куыстмыздтæ фæфылдæр кæныны тыххæй документтæ ныридæгæн сты цæттæ, хъæуы ма чысыл моменттыл æруынаффæ кæнын.
Фембæлды рæстæджы уагдæтты куысты тыххæй информаци сарæзтой юстицийы министр Гаглойты Олег, Æддагон развæдсгæрсты службæйы сæргълæууæг Уарзиаты Алексей, Фиддонтæ æмæ æмбырдты фæдыл комитеты сæргълæууæг Къадзты Вадим.
Банысан кæнын хъæуы уый, æмæ бæстæйы сæргълæууæг алы министрад æмæ уагдоны разамонæджы раз дæр æрæвæрдта хæс, цæмæй сæ фадыгмæ хауæг фарстытæ раст, рæстæгыл æмæ гъæдджынæй бæстон кæной. Уымæн æмæ уыдон сты паддзахад æмæ йæ цæрджыты интерестæ æмæ домæнтæ.
КЪÆБУЛТЫ Маринæ
Comments are closed, but trackbacks and pingbacks are open.