Мæскуыйы уыд Абайты Васойы англисаг æвзагмæ тæлмацгонд ирон æвзаджы историон-этимологон дзырдуаты фыццаг томы презентаци. Афтæмæй ахуыргæндты сæйраг хæдзары банысан кодтой зындгонд советон æмæ уæрæсейаг æвзагзонынады дæсны, этимолог, педагог æмæ профессор Абайты Васойы райгуырды 120 азы бон.
Мадзалмæ æрбамбырд сты Васойы зонгæтæ, хиуæттæ, стæй йын йæ сфæлдыстадмæ куыдфæндыйы цæстæй чи нæ кæсы, уыцы адæм. Ныридæгæн мыхуыры рацыд дзырдуаты 50 экземпляры. Куыст ыл цæудзæн дарддæр дæр. Фундаменталон «Историко-этимологический словарь осетинского языка» арæзт у 5 томæй. Дзырдуатыл кусгæйæ, ахуыргонд пайда кодта дунейы 190 æвзагæй. Дзырдуат англисаг æвзагмæ ратæлмац кæныны хъуыды æрцыд Торчынты Амырханмæ.
Йæ рауадзыныл чи бацархайдта, уыдонæн Цæгат Ирыстоны сæргълæууæджы æмæ Хицауады номæй арфæйы фыстæджытæ радта Уæрæсейы Президенты цур Цæгат Ирыстоны минæвар Дзанайты Барис. Се ʻхсæн дохтыртæ, спортсментæ, бизнесментæ. Пандемийы тыххæй мадзалы хайад райсын алкæйы бон нæ баци. Чидæртæ æрбавдыстой видоæрмæджытæ сæ хъуыдытимæ дзырдуаты тыххæй. Презентацийы куыд загъдæуыд, афтæмæй Абайты Васойы ирон æвзаджы Историон-этимологон дзырдуат нымад у хуыздæрыл йæ æцæгдзинад æмæ иллюстрациты хуызы дæнцæгтæм гæсгæ. Ахуыргонды ацы куыст никуы базæронд уыдзæн, йæ ахадындзинад кæндзæн фылдæрæй фылдæр.
Comments are closed, but trackbacks and pingbacks are open.