19-æм июлы Цхинвалы Пионерты парчы фыццаг хатт ауагъдæуыд концертон программæ «Ирон хъазт». Хайад дзы райстой нæ республикæйы зарæггæнджытæ æмæ музыканттæ. Паркмæ йæ фæллад уадзынмæ чи цыдис, уыдон æрæмбырд кодтой сæ алыварс æмæ æхцондзинад истой ирон музыкæйы зæлтæй. Уæлдай тынг цин кодтой сабитæ, кæцытæ ралидз-балидз кодтой æмæ кафыдысты. Концертмæ кæсджытыл дæр зынд, тынг æхсызгон сын кæй у ацы мадзал æмæ цымыдисæй кастысты артистты алы номырмæ дæр.
Горӕты администрацийы культурӕйы, фӕсивӕд ӕмӕ спорты управленийы сæргълæууæг Тасойты Игорь куыд фехъусын кодта, афтæмæй ахæм фæсивæдон хиирхæфсæн мадзæлттæ уагъд цæудзысты суанг сæрды фæудмæ. «Къуыри дыууæ хатты Пионерты парчы уагъд цæудзæнис ацы концертон программæ – æртыццæджы æмæ майрæмбоны. Конд уы-дзæнис дыууæ хайæ – «Националон музыкæ» æмæ «Кафты музыкæ»-йæ. Алы æртыццæджы дæр ма-иу программæмæ бафтдзæнис «80-æм азты дискотекæ», алы майрæмбоны та – «нырыккон популярон фæсивæдон музыкæ», – банысан кодта Тасойты Игорь.
Ацы хиирхæфсæн мадзæлтты дарддæр дæр хайад исдзысты нæ республикæйы аивæдты дæснытæ.
ДЖИОТЫ Александр
Comments are closed, but trackbacks and pingbacks are open.