Мæскуыйы цæрæг ирæтты ‘хсæн бирæ ахæмтæ ис, кæцытæ стыр бавæрæн бахастой æмæ хæссынц нæ адæмы удварн æмæ культурæйы рæзтмæ. Нымайгæ сæ нæ кæндзыстæм, Ирыстоны цæрæг адæм сæ хорз зонынц, фæлæ уæддæр сæ иууыл зындгонддæртæм хауы Мæскуыйы Нывгæнджыты цæдисы уæнг, Цæгат Ирыстон-Аланийы сгуыхт нывгæнæг Лотиты Игорь.

Лотиты Игорæн Иунæг Кадджын Хуыцау рæдауæй балæвар кодта нывгæнæджы курдиат. Хæрзчысылæй райдыдта цымыдис кæнын Нарты кадджытæм, таурæгътæм, аргъæуттæм, нæ адæмы историон цаутæм, æмæ сæ йæ зæрдæйы къуымтæм хæстæг уымæн айста. Уæлдай цымыдисаг æм кастысты Тугъанты Махарбеджы конд нывтæ. Æппынкъаддæр-иу къуыри дыууæ хатты Беслæнæй ссыд Дзæуджыхъæумæ, цæмæй музейы фена Тугъанты Махарбеджы нывтæ. Курдиатджын нывгæнæг кæй басгуыхт, уый тыххæй сæ ныхас кæронмæ нæма загътой аивады дæснытæ, нæ дæр йæ патриотизм æмæ удуæлдай куысты тыххæй. Лотийы-фырт ныр цалдæр дæс азы Уæрæсейы алыхуызон архивты агуры, бирæ азты дæргъы Уæрæсейы паддзахы æфсады рæнхъыты нæ адæмæй йæ æфсæддон хæс чи æххæст кодта, уæлдайдæр та, Уæрæсейы паддзахы конвойы чи службæ кодта, уыдоны. Мидхæсты фæстæ уыдон рохуаты баззадысты. Æмæ сæ уал æмæ уал азы историйы уылæнты бынæй уæлæмæ исы, сæ сурæттæ сын кæны. Лотиты Игоры æрмадзмæ бацæугæйæ, уыцы сурæттæм бакæсгæйæ, адæймагæн йæ зæрдæ сриссы. Цы диссаджы адæм нæм уыдис, цы! Сæ бакаст – аив, се ппæт дæр саджы фисынтыл амады хуызæн. Сæ цæстæнгасæй дæр зыны сæ уæздандзинад. Лотийы-фырт уал азы дæргъы историйы уылæнты бынæй кæй исы, ахæм фæлгæнцтæ канд Цæгат Кавказы республикæты нæ, фæлæ æнæхъæн Уæрæсейы дæр никæцы адæммæ ис. Уыдон цæттæ экспозицитæ сты Ирыстоны национ музейтæн.

Мæскуыйы Лотийы-фыртæн арæх вæййы равдыстытæ. Петербурджы, Мæскуыйы музейтæ дзы иугæндзон курынц, цæмæй сын уæй кæна йæ конд нывтæ. Фæлæ сæ никæмæн дæтты. Игорь афтæ фæзæгъы: «Мæ куыстытæ хъуамæ уой æрмæстдæр Ирыстоны. Æмæ хорз уаид, Ирыстоны национ музейты куы байгом кæниккой Хæстон Намысы залтæ. Уым хъуамæ уой, нæ рагфыдæлтæм цы хъайтартæ уыд, уыдоны сурæттæ, паддзахы заманы хъайтарты сурæттæ, мидхæсты æмæ Фыдыбæстæйы Стыр хæсты хъæбатырты сурæттæ. Уадз æмæ нæ адæм, нæ фæсивæд зоной нæ хæстонты истори, уой сæрыстыр нæ фыдæлтæй».

Фидæны зындгонд нывгæнæг райгуырд Буроны поселокы фæллойгæнæг бинонты æхсæн. Суинаг лæппумæ нывгæнæджы курдиат кæй ис, уый фыццаг рахатыдта Беслæны аивадон скъолайы бындурæвæрæг æмæ фыццаг директор, Петербурджы аивадон академийы рауагъдон Тогуызты Барис. Игорь йæ фыццаг фæлварæнтæ райдыдта фондзаздзыдæй. Райдианы кодта йæ бинонты сурæттæ. Кæд фæлвых фæлварæнтæ уыдысты, уæддæр ыл сагътой разæнгардгæнæн базыртæ.

Астæуккаг скъола каст фæуыны фæстæ Игорь ахуыр кæнынмæ бацыд Дзæуджыхъæуы Дзанайты Азанбеджы номыл аивадон училищемæ. Ам ын хуызфыссынады аивады сусæгдзинæдтæ чи æргом кодта, уыдон уыдысты Ирыстоны номдзыд нывгæнджытæ Дзантиаты Юри, Бедойты Шалва æмæ æндæртæ. Ацы фæрнджын хистæрты зондамынд ын абон дæр у фæндаг амонæг. Училище каст куы фæци, уæд йæ ахуыр адарддæр кодта Мæскуыйы Суриковы номыл аивадон академийы. Ам бонæй-бонмæ фидардæр кодта æмæ кæронмæ райхæлд йæ диссаджы курдиат. Ирон аивадуарзджытæ Игоры сæйраджыдæр базыдтой зæдты æмæ дауджыты фæлгæнцтæ нывгæнæгæй.

Игорь куыд зæгъы, афтæмæй ирон адæмæн ис диссаджы эпос. Уый лæууы, бердзенты, сомихы æмæ дунейы æндæр стыр адæмты зонд æмæ хъуыдыйæ сфæлдисгæ хæзнаты æмрæнхъ. «Нарты кадджыты зæдтæ æмæ дауджытæ куыд æвдыст æрцыдысты, афтæ сæ иу адæмыхатты эпосы дæр нæ федтон. Нæ нывгæнджытæй ацы темæйыл æнæмæлгæ уацмыстæ чи фæлдыста, уыдоны зонæм не ‘ппæт дæр: Тугъанты Махарбег, Дзанайты Азанбег, Абойты Зауырбег… Фæлæ сæ æз равдыстон мæхирдыгонау, ацы нывгæнджытæй никæй ссадвæдыл ацыдтæн, афтæмæй».

Стæй ма иу ахсджиаг фиппаинаг: Лотиты Игорь, цалынмæ, цы хæстоны фæлгонц аразынмæ бавналы, уый кæд цы майдан, цы хæрзиуæг райста, уыдон не сбæлвырд кæна архивты документтæм гæсгæ, уæдмæ иу ныв дæр не скæны. Уый цæуыл дзурæг у? Курдиатджын нывгæнæг йе сфæлдыстад, йе сфæлдисгæ фæлгæнцтæм бæрнон ахаст кæй дары, ууыл.

Лотиты Игоры конд куыстытæй цардмæ кæсынц æцæг хъайтартæ, паддзах Никъала II йæ цард кæуыл æууæндыд, уыцы хæстон хъæбатыртæ. Курдиатджын нывгæнæг йæ фæлгæнцты хуызистытæ æмæ историон документтæм гæсгæ ахæм куыстытæ кæны ныр æртын азы дæргъы. Йæ сæйраг нысан у Ирыстоны номдзыд хæстонтимæ ныры фæлтæры базонгæ кæнын. Лотиты Игорæн ахæм куыстыты равдыст «Осетинский Конвой Императорского величества»-йы тыххæй лæвæрд æрцыд Мæскуыйаг облæсты Губернаторы преми «Бородино». Экспозици арæзт æрцыд Романовты хæдзарыл 400 азы сæххæсты бонмæ.

Лотиты Игорь фæстаг азты кæны, йæ бæрзонддзинад Уæрæсейы императоры Конвойы чи уыд, уыцы ирыстойнаг минæвæртты портреттæ. Æмбырд кодта зæронд хуызистытæ, алыхуызон службæты рагон æвæрæнты æмæ архивты сын фембырд кодта сæ биографитæ, семæ баст цаутæ. Автор йæхæдæг куыд зæгъы, афтæмæй алы портрет дæр у ирон адæмы цард, Ирыстоны истори æвдисæг æмæ дзы хъуамæ сæрбæрзонд уæм.

Игорь йæ конд нывты тыххæй йæхæдæг афтæ фæдзуры: «Нæ разагъды хæстонтæн сæ ирон уæздандзинад, сæ миддунейы хъæздыгдзинад нывты дæр бæрæг у. Хъыгагæн, рæстæг цæуы æмæ æмæ нын йемæ ивгъуыдмæ хæссы нæ хæзнаты. Цыма нæм баззад, уыдон хъæуы цæстыгагуыйау хъахъхъæнын. Нæ фыдæлты ном, се гъдау, сæ намыс хъуамæ хæссæм цæсгомджынæй, æнæзæрдæхудтæй. Уый мæхицæн банымадтон стыр хæсыл. Æмæ та-иу ногæй ссыдтæн Мæздæгмæ æрмæг æмбырд кæнынмæ – зæронд къамтæ, нывтæ, газеттæ. Æмæ иу цыдæртæ ссардтон».

Историон документтæм гæсгæ Мæздæджы районы Новоосетиновкæйы, Черноярскийы æмæ иннæ станицæты цард бирæ ирон хъазахъхъæгтæ. Бирæтæ сæ систы паддзахы æфсады инæлæрттæ: Хъуысаты, Абациты, Тугъанты мыггæгты минæвæрттæ. Игорæн йæхи фыдæлтæ дæр службæ кодтой императоры æфсады.

«Нæ фыдæлтæй нын цы баззад, уый æвæджиауы хъæздыгдзинад у, æмæ йæ хъахъхъæнын хъæуы. Ничи нын баххуыс кæндзæн нæ историон æмæ удварнон бынтæ бавæрынæн нæхи йедтæмæ. Æз мæ хистæртæй дæр арæх хъуыстон нæ фыдæлты тыххæй. Рагæй мæ фæндыд, ахæм исты æрхъуыды кæнын, сæ нæмттæ рох куыд нæ уой, уый тыххæй, фæлæ Советон рæстæг паддзахы заманы тыххæй æргом дзурæн нæ уыд. Уæд мæ фæндтæ мæ къухы нæ бафтыдысты. Цы къамтæ-иу ссардтон, уыдонæн-иу сæ фылдæр æбæрæг уыдысты. Зæгъæм, лæууы ирон лæг æфсæддон уæлæдарæсы – фæлæ чи у, кæцæй у, уый бæрæг нæу, кæцы æфсæддон хайады службæ кодта æмæ афтæ дарддæр. Уæлдай хъыг та цæуыл кодтон? Паддзах йæ цард кæуыл æууæндыд, йæ ныфс чи уыд, уыцы адæмы къамтæ музейты дæр кæй не сты, ууыл. Фылдæр хатт иу сæ ссардтон бырæтты, кæнæ кæй аппæрстой, ахæм зæронд гæххæттыты хсæн», – зæгъы Лотиты Игорь.

Ирон мифологийы зæдты æмæ дауджыты темæйыл Игорь цы нывтæ скодта, уыдонæн сæрмагонд равдыст уыд Дзæуджыхъæуы Тугъанты Махарбеджы номыл аивадон музейы. Куы йæ гом кодтой, уæд музейы адæмæй къухбакæнæн дæр нæ уыд. Равдыст фенынмæ чи æрбацыд, уыдоны ‘хсæн уыд иу ацæргæ сылгоймаг. Нывгæнæджы куыстытæ куы федта, уæд йæ цины цæссыгтæ тыххæй уромгæйæ загъта: «Мæнæ диссаг, кæдæй-уæдæй мæхи цæстытæй федтон, нæ фыдæлтæ кæмæ куывтой, кæмæн табу кæнæм, уыцы зæдты æмæ дауджыты фæлгонцтæ. Бузныг дын уый тыххæй, Игорь, кæй нын сæ равдыстай хæдхуыз æмæ аивæй».

Лотиты Игорь нырмадæр цæуы сфæлдыстадон рæзты фæндагыл. Ирон адæмæй паддзахы æфсады чи службæ кодта, уыцы инæлæрттæй сæ фæлгæнцтæ кæмæн скодта, уыдон ныридæгæн сæдæйæ фылдæр сты, фæлæ уый нывгæнæг фагыл нæ нымайы æмæ сæ агуры, цæмæй сæ базонгæ кæна сæ туг се стæг адæмимæ, уæлдайдæр суинаг фæлтæрæн. Уыцы фæлтæрæй аивады фæндагыл чи ныллæууыд, уыдоны дæр разæнгард кæны ахæм удуæлдай куыстмæ, æфтауы сæ аивады раст фæндагыл.

 

Comments are closed, but trackbacks and pingbacks are open.