Онлайн-ахуырад. Цы ӕмбӕхсы рӕсугъд термин йæ фӕстӕ

Цас тагъддӕр здӕхы нӕ цард йӕ раздӕры донвӕдмӕ, уый бӕрц нын нӕ цӕстытӕ тынгдӕр гом кӕны нӕ ахуырады уавӕрмӕ. Афтӕ чи дзуры, зӕгъгӕ, ӕрвылбоны традицион боны ахуырад, дӕрддзӕфы ахуырад ӕмӕ онлайн-ахуырады ӕхсӕн ницы хъауджыдӕр ис, уый тынг рӕдийы. Ӕцӕг ахуыргӕнджытӕн ныридӕгӕн бӕстон бӕлвырд у: уыдон сты бынтон ӕндӕр ахуырады уагӕвӕрдтӕ. Пандеми GOVID-19 кӕй расайдта, уыцы бирӕмӕйон иппӕрд ахуырадӕй рохы уацары бакодта нӕ ахуырдзау фӕсивӕды стырӕй-чысылмӕ.

Дӕрддзӕф ахуырадмӕ раст цӕстӕй каст куы ‘рцӕуа, уӕд уый суыдзӕн хорз ӕххӕстгӕнӕн традицион ахуырады программӕтӕм. Уӕлдайдӕр та студент исты аххосӕй йӕ ахуыр кӕронмӕ куы нӕ ахӕццӕ кӕна, уӕд. Бирӕ чызджытӕн   бинонты уавӕртӕм гӕсгӕ сӕ бон нал бавӕййы боны ахуырмӕ рахизын. Ӕмӕ ахӕм уавӕры дӕрддзӕфмӕ ахуырады курсытӕ, кӕд боны ахуыры ӕххӕстӕй нӕ баивой, уӕддӕр сын фӕахъаз уыдзӕн ахуырады фӕлгӕтты баззайынӕн. Уыимӕ, зӕгъын ӕмбӕлы, традицион ахуырад ӕххӕстӕй баивын йӕ бон кӕй нӕ бауыдзӕн, уый. Иннӕрдыгӕй та, алцы дæр хонын хъӕуы сӕхи нӕмттӕй. Бынтон ног ахуырады хуыз онлайн-ахуырад у – фӕсаууонмӕ ахуырады формӕ. Традицион ахуырады уагӕвӕрды тыгъдады фӕсаууонмӕ ахуырады уыдис ӕнӕ-мӕнгӕй ӕххӕстгӕнгӕ фӕлварӕнты сесситӕ, ома, лӕгӕй-лӕгмӕ комкоммӕ ны-хас. Ахуыргӕнӕгӕн та уыдис йе студентты зонындзинӕдты ӕмвӕзад комкоммӕ бӕрӕг кӕныны фадат. Фӕлӕ уӕддӕр фӕсаууонмӕ ахуырады бон нӕ уыдис ӕххӕст ахуырад дӕттын, ӕмӕ уымӕ гӕсгӕ студенттӕ ахуыр кодтой иу аз фылдӕр (6 азы). Ам ныхас цӕуы программӕ ӕххӕст кӕныны рӕстӕгыл.

Традицион ахуырады уагӕвӕрды цӕмӕй искæцы лекцион курсы программӕ сӕххӕст кӕнай, уый тыххӕй равдисын хъӕуы бӕрӕг зонындзинӕдтӕ ӕмӕ фӕлтӕрддзинад. Уый тыххӕй уыдис, ӕнусты дӕргъы чи ныффидар, ахӕм цӕстдарды хуызтӕ: фӕлварӕнтӕ, зачет-тӕ,  контролон куыстытӕ ӕмӕ ӕндӕртӕ. Ницавӕр тесттӕ баивдзысты музыкалон курдиат, ӕвзаджы ӕнкъарынад, ныв кӕнынмӕ арӕхстдзинад ӕмæ а.д. Суанг ӕппӕты хуыздӕр тестон уагӕвӕрд дӕр ӕххӕссы ӕрмӕст зонындзинӕдты кӕцыдӕр хайыл, уымӕ гӕсгӕ йӕ бон нӕу сбӕрӕг кӕнын, уыцы зонындзинӕдты хӕрзхъӕддзинад, ома, ӕвзарыны хъомыс ӕмӕ аргъ кӕныны курдиат. Абон иунӕг тесты бон дӕр нӕу сбӕрӕг кӕнын адӕймаджы гӕнӕнтӕ хъуыды кӕнынмӕ, сфӕлдыстадон хуызы исты фарстытӕ лыг кӕнынмӕ. Афтӕмӕй та студенты цӕттӕдзинад ахӕм фарстытӕ лыг кӕнынмӕ сбӕрӕг кӕны уӕлдӕр ахуырады хӕрзхъӕддзинад, куыд профессионалон хуызы цӕттӕ кӕныны уагӕвӕрды хай, афтӕ.

Ахуырад у, кӕрӕдзийы фӕстӕ ахуыр  чи цӕуы, ахӕм уагӕвӕрды ранывӕст. Ӕмӕ кӕд традицион ахуырады ис растӕвӕрд ӕмӕ ноггӕнгӕ цӕуӕг бирӕвӕрсыг уагӕвӕрд хӕрзхъӕддзинад бӕлвырд кӕнынмӕ, уӕд онлайн-ахуырады мидӕг та уымӕн йӕ кой дӕр нӕй. Сомбоныл нӕ хъуыды кӕнгӕйӕ, ныгуылӕйнаг, растдӕр та америкайаг ахуырад дӕнцӕгӕн кӕй исӕм, уый фыдыбӕстӕйы ахуыргӕнджыты стыр тыхсты ӕфтауы, уымӕн ӕмӕ уый дунейы мидӕг размӕцыдыл нымад никуы цыдис.

Фӕлӕ Уӕрӕсейы, ӕппӕты размӕцыддӕр ахуырады бӕстӕйы, цӕмӕдӕр гӕсгӕ цармыстыгъд бакодтой ӕмӕ дӕнцӕгӕн исы америкæйаг ахуырад. Ныгуылӕн Европӕ ӕмӕ Америкæйы ис дыууӕ хуызы ахуырад: иу – сӕхицӕн, иннӕ – колониалон бӕстӕтӕн. Ӕмӕ се ‘хсӕн ис стыр хицæндзинад. Дыккӕгтӕн парахат кӕнынц ахӕм зондамындтытӕ: «Мах хъӕуынц кусӕг къухтӕ», «онлайн-дзыллон ахуырад» ӕмӕ ӕнд. Уыдонмӕ мах лӕмбынӕг куы ‘ркӕсӕм, уӕд сбӕрӕг вӕййы, модӕйы чи бацыд, уыцы ныгуылӕйнаг педагогтӕ ӕмӕ психологты куыстыты лӕмӕгъ тӕлмацтӕ англисаг ӕвзагӕй нын кӕй амонынц, уый. Ахӕм уӕлӕнгай, ӕнӕбындур архайдӕн фидӕн нӕй ӕмӕ нӕ уыдзӕн, уымӕ гӕсгӕ афоныл ӕрлӕууын ӕмӕ ахъуыды кӕныны рӕстӕг раджы ӕрцыд. Уæрæсейы фыдыбӕстӕйы ахуырадӕн ном чи скодта, уыцы профессурӕ сӕ размӕцыд программӕтӕ ивынц, чиновниктӕ ӕнӕ-зондӕй размӕ кӕй тӕрынц, уыцы домӕнты уагӕвӕрдмӕ гӕсгӕ. Фӕлӕ ныр-тӕккӕ сагъӕс кӕнын хъӕуы ахуырады мидисыл. Рӕсугъд терминты фӕстӕ тутт бынат йедтӕмӕ ницы ис. Абон фыдыбӕстӕйы традицион ахуырады уагӕвӕрд хъахъхъӕд куы нӕ ӕрцӕуа, уӕд ма, нӕ уӕлдӕр скъола кӕуыл ӕнцой кӕны, уыцы цӕджындзтӕ дӕр, ӕлыгӕй кондау, ныппырх  уыдзысты. Уый тыххӕй ӕмхъӕлӕсӕй комкоммӕ куы нӕ зӕгъӕм, уӕд нӕ ахуырадӕй ницыуал баззайдзӕн.

Дарддӕр куыд уыдзӕн, уымӕн ничима ницы зоны. Фӕлӕ, нӕ ахуырад сӕрсӕ-фӕны был кӕй ӕрлӕууыд, уый дызӕрдыггаг нӕу.

Æрмæгыл бакуыста 

ДРИАТЫ Лейла