Чи сты «дзыхы бахауӕг дзынгатӕ»?..

Кӕд ӕнӕхъӕн дунейы рӕстаг зондыл хӕст дзыллӕтӕ фидарӕй хӕцынц, ныртӕккӕ Уӕрӕсе Украинӕйы цы сӕрмагонд ӕфсӕддон операци ӕххӕст кӕны, уый фарс, кӕд æцӕгӕлон адӕмтӕ дӕр ӕмбарынц, Путин фашизмӕй ӕрмӕст Донбассы цӕрджыты кӕй нӕ ирвӕзын кӕны, фӕлӕ ӕнӕхъӕн Европӕйы, уӕддӕр та разынд, йӕ разы йын цӕлхдуртӕ чи ӕвӕры, ахӕм мидӕггагон знӕгтӕ.

Уымӕн ӕмӕ цыфӕнды арфӕйаг хъуыддаджы дӕр разыны уӕйгӕнджытӕ, рӕстдзинад чи дзырддаг кӕны, ахӕм ӕнаккӕгтӕ. Ахӕмтӕ уыдысты ӕмӕ уыдзысты. Уымӕн загъта Владимир Путин дӕр: «О, уыдон ныфс ӕвӕрдзысты афтӕхуыйнӕг фӕндзӕм колоннӕйӕ, национ уӕйгӕнджытӕй, ам ӕхца чи кусы, уым та, ӕгӕрыстӕмӕй, географион цӕстӕнга-сӕй дӕр – «цӕргӕ» чи кӕны, йӕ хъуыдыты та цагъарадон ӕмбарынадимӕ чи цӕры, ахӕмтӕй. Æз нӕ хӕрам кӕнын ахӕмты, кӕцытӕн виллӕтӕ ис Майамийы кӕнӕ французаг Ривьеры, кӕцытӕн сӕ бон цӕрын нӕу ӕнӕ бабызы игӕрӕй, ӕнӕ денджызон сӕтӕлджытӕ кӕнӕ афтӕхуыйнӕг гендерон сӕрибардзинадӕй. Проблемӕ бынтондӕр уый мидӕг нӕй, фӕлӕ, зӕгъдзынӕн ӕй ноджыдӕр, уый мидӕг – ахӕмтӕй бирӕтӕ сӕ менталон удыскондмӕ гӕсгӕ растӕндӕр сты уым, ам нӕ, фӕлӕ – нӕ адӕмимӕ, Уӕрӕсеимӕ. Уый нысан кӕны, уыдонмӕ гӕсгӕ – уыдонмӕ гӕсгӕ! – цыма сты уӕлбикъонтӕ. Уыдоны фӕнды, цӕмӕй ахӕмтӕ уой, сӕхи ахӕмтӕй ӕвдисгӕйӕ. Фӕлӕ уыдонӕй ферох, кӕнӕ та йӕ не ‘мбарынц бынтондӕр, кӕд афтӕхуыйнӕг уӕлбикъондзинады истӕмӕн хъӕуынц, уӕддӕр, спайдагӕнӕн кӕмӕй ис, ахӕм ӕрмӕгӕн, цӕмӕй сӕ максималон ӕгъдауӕй спайда кӕной нӕ адӕмы фыдбылызӕн.

Коллективон Ныгуылӕн фӕлвары не ‘хсӕнад нын ныдихтӕ кӕныныл, хӕстон фыдбылызтӕй, санкциты социалон-экономикон фӕстиуджытӕй спекуляци кӕнгӕйӕ, архайынц Уӕрӕсейы ӕмбӕстагон ныхмӕлӕууынад спровокаци кӕныныл, йӕ «фӕндзӕм колоннӕйӕ» пайда кӕнгӕйӕ, тырны йӕ нысан къухы бафтын кӕнынмӕ. Уыцы нысан та у, куыд ма йӕ загътон, афтӕмӕй – Уӕрӕсейы ныппырх кӕнын.

Фӕлӕ цыфӕнды адӕмӕн дӕр, уӕлдайдӕр – уӕрӕсейаг адӕмӕн, алы хатт дӕр  сӕ бон бауыдзӕн ӕцӕг патриотты ӕнаккӕгтӕ ӕмӕ уӕйгӕнджытӕй рахицӕн кӕнын ӕмӕ сӕ ату кӕндзӕн «дзыхы бахауӕг дзынгайау».

Путин кӕй кой кӕны, ахӕмтӕ та нӕ туг, не стӕгӕй дӕр разынд. Йӕ ном зӕгъын дӕр зын у, фӕлӕ та фыццаг Тотраты «рӕстдзинады  сӕрыл тохгӕнӕг» равдыста йӕ дӕндаг – сӕрмагонд операци дӕр ӕй не схуыдта, фӕлӕ «Украинӕмӕ бабырст». Украинӕмӕ бабырст, дам, ӕнӕдызӕрдыгӕй, нысан кӕны нӕ бӕстӕйы нырыккондӕр историйы иууыл стырдӕр ху-динаг. Æмӕ ма уый ӕргомӕй равдыста йе ‘рдзон удысконд, фӕлӕ афтӕ «сусӕгӕй» чи нымайы, уыдоны хӕйрӕг базонӕд ӕмӕ равзарӕд.

Ис ахӕмтӕ дӕр, кӕцытӕ комкоммӕ ӕлгъитынц къухдариуӕгады, нӕ хъӕбулты нын мӕлӕтмӕ ӕрвитынц, зӕгъгӕ. Фыццаджыдӕр, уӕрӕсейаг гарзджын тыхты контрактмӕ гӕсгӕ чи службӕ кӕны, уыдонмӕ нӕ къухдариуӕгад ницы бар дары, стӕй… Цӕмӕн стӕм ахӕм ӕнӕзӕрдӕтӕ?.. Нормалон адӕймаджы цӕст куыд хъуамӕ бауарза афтӕ зӕгъын: мӕлӕтмӕ?.. Знаджы хъӕбул дӕр ма амӕлӕд – махмӕ мӕлӕтмӕ ацӕуынӕн ничи ӕнтысы, хъуамӕ уӕлахизӕй ӕрыздӕхой сӕ хӕдзӕрттӕм! Фӕлӕ иууыл хъыгаг та уый у, ам дӕр та алчи йӕхицӕн политикон пайда кӕй агуры… Уӕдӕ ӕндӕр куыд схонӕн ис ахӕмтӕн, кӕцытӕ уынгты ӕнӕзонгӕ сылгоймӕгты дӕр уромынц, ӕмӕ сӕ ардауынц, цӕмӕй растой хицауады ныхмӕ, сӕ хъӕбулты сын «мӕлӕты дзыхмӕ» кӕй ӕрвитынц, уый тыххӕй, стӕй интернет-хызӕджы та ӕндӕр цыдӕртӕ ныффыссынц, махон ма, дам, кӕдӕм кӕсы, фылдӕр хӕстонтӕ, дам, цӕмӕннӕ ӕрвиты сӕрмагонд операцийӕн баххуыс кӕныны тыххӕй… Уый циу – «дывӕрсыг стандартты» цъаммардзинад ӕви знаджы куыроймӕ дон уадзын?.. Сӕ дыууӕ дӕр. Æмӕ фаг у ахӕмтӕн кӕрон скӕнын!..