Ног гуырæн хæдзары арæзтад у фæуынхъус

Горæт Цхинвалы ног республикон гуырæн хæдзары ног бæстыхайы арæзтад гинекологион хайадимæ цæуы графикæй раздæр. Сфидаргонд æмгъуыдмæ гæсгæ медицинон уагдон экспулатацимæ  лæвæрд хъуамæ æрцыдаид 2019 азы декабры мæймæ, фæлæ гæнæн ис, арæзтад фæуа цалдæр мæйы раздæр.

Абоны бон арæзт дыууæуæладзыгон корпусы фесты  электрохæххыты,  æмæ мидæггагон инженерон хызæгты монтажгæнæн куыстытæ, уагъд æрцыдысты æддагон коммуникацитæ дæр.

Арæзтад, архитектурæ æмæ цæрæнуатон-коммуналон хæдзарады министры хæдивæг Гуыцмæзты Ильяйы ныхæстæм гæсгæ, бæстыхаймæ хъæрмад бауагътой ивгъуыд азы æмæ уый аразджытæн зымæгон рæстæджы фадат радта  мидæггагон куыстытæ бакæнынæн. Хинайæнтæ æмæ санитарон æлхъынцъытæ арæзт æрцыдыс-ты кафелон плиткæйæ.

«Объекты арæзтад цæуы графикæй раздæр. Ныртæккæ кусджытæ æвæрынц санфаянс. Хъæуы ма ауындзгæ цартæ æмæ  хирургион рухсгæнæнтæ бакæнын, дуæртты блоктæ монтаж кæнын, къултæ ахурын æмæ медицинон уагдæттæн специалон линолеум æвæрыны куыстытæ фæуын. Уыимæ ма хæрзарæзт цæуы йæ алварс территори дæр. Иннæ куыстытæ фæуыдзысты цалдæр мæймæ. Хъæудзæн ма бæстыхайы ифтонггæрзтæй сифтонг кæнын. Уыдон заказ æрцыдысты, арæзтадон фирмæ архайы се ‘рласыныл.

Объекты кусынц 35 адæймаджы æмæ уæззау техникæйы æртæ иуæджы», – загъта уый.

Дыууæуæладзыгон бæстыхай ныккæндтимæ у 5700 квадратон метры æмæ дзуапп дæтдзæн нырыккон домæнтæн. Гуырæн хайад у 35 адæймагæн, гинекологион – 20 адæймагæн. Бæстыхайы ис дыууæ операцион залы.

«Проекты ис индивидуалон гуырæн палатæтæ найæнтæ æмæ санитарон æлхынцъытимæ, мæдтæ æмæ ноггуырд сывæллæтты иумиаг палатæтæ, интенсивон терапийы палатæтæ, функционалон диагностикæйы кабинеттæ, фидæны мæдтæн та хосгæнæн физкультурæйы кабинет.

Бæстыхайы арæзт æрцыд дыууæ лифты. Иу – бæлцæттæн æмæ иу та – уæзтæ ласынæн. Ныккæнды уыдзæн техникон хатæнтæ æмæ персоналæн дæр хатæнтæ», – банысан кодта министры хæдивæг.

 Гуырæн хæдзар арæзт цæуы 2018-2019 азтæн Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты.

Ног гуырæн хæдзар суыдзæн Республикон соматикон рынчындоны медицион кластеры хай, специалон ахизæнæй йæ баиу кæндзысты операцион-хирургион корпус æмæ рынчындоны сæйраг бæстыхаимæ.