Соматикон рынчындоны территорийыл цы медицинон комплекс арæзт æрцыд, уыдонмæ ма ноджыдæр бафтыдис иу – ног гуырæн хæдзар. Куыд æппæт медицинон кластер, афтæ уый дæр арæзт æрцыд Уæрæсейы Федерацийы финансон æххуысы руаджы. Арæзт фæцис графикæй раздæр.

Ног гуырæн хæдзар у нырыккон домæнтæм гæсгæ. Арæзт та æрцыд 2018-2019 азтæн социалон-экономикон рæзтæн Инвестпрограммæйы фæлгæтты. Йæ арæзтадæн рахицæн кодтой 490 милуан сомы. Æмæ кæд  æппæт саразгæ документацимæ гæсгæ йæ арæзтад план цыдис азы кæронмæ, уæддæр уый сырæзт графикæй дыууæ мæйæ раздæр.

Гуырæн хæдзары арæзтады иумæйаг фæзуат у 5300 квадратон метры. Бæрæг куыд у, афтæмæй уым уыдзæнис гуырæн хайад 30 сынтæгимæ æмæ гинекологион хайад 20 бынатимæ, физиологион хайад 10 бынатимæ æмæ сылгоймæгты консультацийы хайад 50 сылгоймагæн.

Ног гуырæн хæдзары арæзтад уыд æнæмæнгхъæуæг, уымæн æмæ зæронд арæзт æрцыд 1955 азы æмæ дзуапп нал лæвæрдта йæ домæнтæн.

Гуырæн хæдзар дæр хирургион корпусау баиу ис сæйраг корпусимæ æмæ уый та дзурæг у æнцонвадатыл.

Ног гуырæн хæдзары уыдзæн æппæт уавæртæ дæр, ифтонг æрцæудзæн нырыккон медицинон ифтонггæрзтæй æмæ рынчынæй цы сывæллæттæ райгуырынц, уыдон нал хъæудзæн æндæр æмæ æндæр рæттæм хос кæнынмæ акæнын.

Банысан кæнын хъæуы уый, æмæ нæ  республикæйæн 2018-2019 азтæн социалон-экономикон рæзтæн рахицæн æрцыд Уæрæсейы бюджетон фæрæзтæй 4,5 миллиард сомы. Уыдонæй нæ горæты медицинон кластеры арæзтадæн рахицæн æрцыд 500 милуан сомы. Уымæй размæ 2015-2017 азты Инвестпрограммæйы арæзтадæн Уæрæсейы Федераци рахицæн кодта 9,1 миллиард сомы æмæ уыдонæй та медицинон кластеры арæзтадæн рахицæн æрцыд 1,5 миллиард сомы.

Бестауты Валя

Comments are closed, but trackbacks and pingbacks are open.