Нæ республикæйы уагдæттæй ног арæзт бæстыхæйттæ кæмæн фæзынд, уыдонмæ ма ацы аз ноджыдæр бафтдзæн иу – Хъалонтæ æмæ æмбырдты исыны фæдыл комитет. Ног бæстыхай арæзт цæуы Чиаты Иосифы уынджы. Куы сырæза, уæд Хъайтарты уынгыл ныртæккæ кæм уæвынц, уырдæм та раконд æрцæудзæнис Мидхъуыддæгты горæтон управлени.
Мидхъуыддæгты управленийæн нырма æдзухон бынат нæй. Рæстæгмæ уыдысты Чиаты Иосифы уынгыл цы пырх рæвдауæндон уыдис, уым. Фæлæ та рæвдауæндоны арæзтадмæ куы æрывнæлдтой, уæд уырдыгæй дæр раконд æрцыдысты нæ горæтæн цæгатварс микрорайон «Мæскуыйаг»-ы цы агъуыстытæ ис, уыдонæй сæ иумæ.
Чиаты Иосифы уынгыл Хъалонты комитетæн ацы бæстыхай арæзт цæуы Инвестпрограммæйы фæлгæтты. Йæ проектмæ гæсгæ уый уыдзæнис æртæуæладзыгон, ныккæндимæ. Арæзтады иумæйаг фæзуат у 2 276,04 квадратон метры.
Арæзтад,архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд зæгъы, афтæмæй йæ арæзтадæн рахицæн æрцыд 55 милуан сомы. Объекты куыстытæ цæуынц цырд темптæй, нæй сын къуылымпыдзинæдтæ, ифтонг сты арæзтадон æрмæджытæй. Ныртæккæ амайынц систæ. Объект арæзт хъуамæ фæуа азы кæронмæ.
Ныртæккæ дзы кусы 16 адæймаджы æмæ техникæйы 2 иуæджы.
РÆЗЫ НОГ ГУЫРÆН ХÆДЗАР
Соматикон рынчындоны территорийыл цы медицинон комплекс арæзт æрцыд, уыдонмæ ма азы кæрон ноджыдæр бафтдзæнис ног гуырæн хæдзар. Арæзтады иумæйаг фæзуат у 5 300 квадратон метры. Куыд зонæм, афтæмæй уым уыдзæнис гуырæн хайад 30 сынтæгимæ, гинекологион хайад 20 бынатимæ æмæ сылгоймæгты консультаци. Ног гуырæн хæдзары арæзтад уыд æнæмæнгхъæуæг, уымæн æмæ зæронд, арæзт æрцыд 1955 азы æмæ дзуапп нал лæвæрдта йæ домæнтæн. Рæстæг домдта, нырыккон домæнтæн дзуапп чи дæтта, ахæм рынчындоны саразын.
Ног гуырæн хæдзар арæзт цæуы Инвестпрограммæйы фæл-гæтты. Йæ арæзтадæн рахицæн æрцыд 480 милуан сомы. Уый арæзт цæуы, раздæр цæстыты æмæ урологийы рынчындон кæм уыд, уый бынаты.
Ныридæгæн объект арæзт фæцис, кæнынц ма мидæггагон куыстытæ æмæ уыцы иурæстæджы кæнынц йæ территори йын схæрзарæзт кæныны фæдыл куыстытæ дæр. Гуырæн хæдзар дæр, хирургион корпусау, баиу уыдзæн сæйраг корпусимæ æмæ йæм сæрибарæй уыдзæн бацæуæн.
Гуырæн хæдзары арæзтадыл кусы арæзтадон организаци «Мегаполис – Т».
Уый ифтонг уыдзæн нырыккон медицинон ифтонггæрзтæй æмæ рынчынæй цы сывæллæттæ райгуырынц, уыдон нал хъæудзæн æндæр æмæ æндæр рæттæм хос кæнынмæ акæныны сæр.
РÆЗЫ НОГ УАЗÆГДОН
Кæд кæронмæ арæзт нæма фæцис уазæгдон «Ирыстон», уæддæр ныридæгæн бæрæг у, Театралон фæзуат ноджы кæй фæаивдæр уыдзæн ацы объекты сырæзтæй. Ам кусджытæн æдзух хъуысы сæ хъæлæба æмæ сæ техникæйы уынæр.
Зæгъын хъæуы уый æмæ сын бирæ æнтысы, кæд цыдæр куыстыты чысыл бафæстиат сты, уæд æндæр куыстыты та графикæй раздæр цæуынц. Ацы бонты объекты сæр æмбæрзт фесты æмæ кæнынц мансарды мидæггагон куыстытæ. Дих æй кæнынц гæ-рæнтыл гипсокартонæй, уадзынц æм хъæрмад, электроны тых, кæнынц сантехникон куыстытæ.
Дыккаг æмæ æртыккаг уæладзгуыты та кæнынц къулсæрдæн куыстытæ.
Ам кусджытæ архайынц цалдæр брига-æйæ. Уыдонæй алкæ-мæндæр ис йæхи куыст. Иутæ архайынц сантехникон куыстытæ бакæныныл, иннæтæ хуыйынц гипсокартонтæ, иннæтæ ламинат æвæрынц. Кусджытæн сæ фылдæр сты бынæттон цæрджытæ.
Ныридæгæн бæрæг у, уазæгдон кæй исы йæ раздæры хуыз. Объект мидæгæй арæзт цæуы ног проектмæ гæсгæ.
Куыд бæрæг у, афтæмæй уазæгдоны фæзуат у 6446 квадратон метры. Арæзт та æрцæудзæн 43 бынатæн.
Объекты арæзтады аргъ у 430 милуан сомы. Уыцы æхцайы фæрæзты иу хай фыст цæуы Инвестпрограммæйы фæлгæтты. Иннæ æхцайы фæрæзтæ та бадзырдмæ гæсгæ, самал кæндзæнис инвестор Бердиаты Вадим. Куыд зæгъынц, афтæмæй йæм уазæгдæттæ аразыны хъуыддаджы ис хорз фæлтæрддзинад.
Уазæгдоны арæзтады ныртæккæ кусы 73 адæймаджы.
Объект арæзт фæуыдзæн азы кæронмæ.
БЕСТАУТЫ Валя
Comments are closed, but trackbacks and pingbacks are open.