Инвестпрограммæ

КУЫСТЫТÆ ЦÆУЫНЦ РÆВДЗ

Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты цы объекттæ арæзт цæуынц, уыдонæй иу у гуырæн хæдзары бæстыхай. Ныртæккæ ам куыстытæ сты сæ тæмæны. Аразджытæ кусынц дыккаг уæладзыджы монолитон каркас аразыныл. Фыццаг уæладзыджы та амайынц къултæ. РХИ-йы Арæзтад, архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд зæгъы, афтæмæй объект эксплуатацимæ лæвæрд хъуамæ æрцæуа ацы азы кæронмæ. Йæ арæзтадæн рахицæн æрцыд 480 милуан сомы. Ног гуырæн хæдзар уыдзæн æртæуæладзыгон, уыдзæн ын ныккæнд дæр. Куы сырæза, уæд ам уæвдзысты гуырæн хайад 300 бынатимæ, гинекологион хайад 20 бынатæн æмæ сылгоймæгты консультаци, цыран иу рæстæджы райсæн уыдзæн 50 адæймаджы. Уыдзæн дзы дыууæ операцион залы, индивидуалон палатæтæ, хинайæнтимæ, мæдтæ æмæ ноггуырдтæн палатæтæ, интенсивон терапийы палатæтæ, функционалон диагностикæйы кабинеттæ, репродукцийы кабинет. Суинаг мæдтæн та – хосгæнæн физкультурæйы кабинет. Развæлгъау зонæнтæм гæсгæ ам æдæппæт кусдзæнис 118 адæймаджы. Проектмæ гæсгæ йæ иумæйаг фæзуат та уыдзæн 5300 квадратон метры.

Гаглойы фырт куыд зæгъы, афтæмæй ног гуырæн хæдзарæй ахизæн уыдзæн операцион-хирургион корпусмæ.

РÆЗЫ ЦЫРД ТЕМПТÆЙ

Цырд темптæй рæзы сырх агуыри дурæй фондзуæладзыгон хæдзар Гуыбаты æфсымæрты уынгыл. Йæ арæзт æмæ йæ уындæй ныридæгæн цæст здахы йæхимæ. Уый арæзт цæуы 75  хæдзары бинонтæн. Аразджытæ кусынц дыккаг уæладзыджы æддаг æмæ мидæггаг систæ амайыныл. РХИ-йы Арæзтад, архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд загъта, афтæмæй йæ арæзтадæн рахицæн æрцыд 216,4 милуан сомы. Æх-хæст сты кусæгдыхæй. Æдæппæт дзы кусы 36 адæймаджы. Æххæст сты техникæйæ дæр. Развæлгъау ардæм бауагъд æрцыдысты дон, канализацион хæххытæ. Иудзырдæй, нæй къуылымпытæ сæ куысты æмæ сын æнтысгæ дæр уы-мæн кæны, – зæгъы Гаглойты Сергей.

Сергей ма куыд загъта, афтæмæй бындур æвæрд æрцыд дыккаг бирæуæладзыгон корпусæн дæр. Уый дæр арæзт цæуы 75 бинонтæн. Аразджытæ ам кусынц фундаментон блоктæ æвæрыныл, сæрдынц сæ сау чъиуæй, æвæрынц монолитон колоннæтæ. Ам та æдæппæт кусы 26 адæймаджы. Ис сæм техникæйы 3 иуæджы. Дыууæ хæдзар дæр хъуамæ арæзт æрцæуой 2019 азы кæронмæ. Аразгæ та сæ кæны подрядон организаци СТМ-ЮГ. Зæгъын хъæуы уый, æмæ куыстытæ конд кæй цæуынц гъæдджынæй, æнæзæрдæ-худтæй. Сæ куысты нæй зындзинæдтæ. Æппæт куыстытæ дæр æххæст цæуынц снысангонд графикмæ гæсгæ. Ацы бирæуæладзыгон хæдзары арæзтады аргъ та у 2 милуан 184 мин сомы аргъ.

ХÆРЗАРÆЗТ ЦÆУЫ

КОЦОЙТЫ АРСЕНЫ УЫНГ

Цалцæггæнæн куыстытæ сæ тæмæны сты нæ горæты Коцойты Арсены уынджы дæр. Зæгъын хъæуы уый, æмæ ацы уынг рагæй фæстæмæ дæр кæй ис æдзæллаг уавæры. Ам-иу арæх стыдтой канализацион хæххытæ æмæ-иу дзы ахизæнтæ нал уыдис.

Куыд иннæ уынгты, афтæ ам дæр нырма куыстытæм æрывнæлдтой «Водоканал»-ы кусджытæ. Æппæт коммуникацион куыстытæ дæр хъуамæ баконд æрцæуой 20 августмæ. Канализацион хæххыты баивыныл кусынц 5 адæймаджы. Æххæст сты техникæйæ дæр. Канализацион æмæ донуадзæн хæххыты иу кæнынц хæдзæрттæм дæр. Зæгъын хъæуы уый, æмæ æппæт куыстытæ дæр кæй цæуынц гъæдджынæй. Уый та у «Водоканал»-ы инженер Сиукъаты Иваны хъæппæрисон архайды руаджы.

Ам æппæт куыстытæ дæр цæуынц развæлгъау сфидаргонд планмæ гæсгæ æмæ та рæхджы рафидаудзæн ацы уынг дæр.

Уый фæстæ асфальтмæ цæттæгæнæн куыстытæм æрывналдзæн «Дорэкспо-строй».

Бестауты Валя