Мæскуыйæ нæм æрæхъуыст æхсызгон хабар. УФ-йы Хицауады Сæрдар Дмитрий Медведевы Уынаффæмæ гæсгæ не ‘мбæстаг æвзонг сылгоймаг Дыгъуызты Заринæ нысан æрцыд «Ростуризм»-ы ног къухдариуæггæнæгæй.
Дыгъуызты Заринæ Валерийы чызг райгуырд 1985 азы горæт Цхинвалы. 2002 азы тынг хорз нысæнттыл каст фæцис Колыты Аксойы номыл паддзахадон аивæдты лицей. Уый фæстæ йæ ахуыр адарддæр кодта Уæрæсейы Мидхъуыддæгты министрады дунеон ахастыты Мæскуыйы паддзахадон институты дунеон журналистикæйы факультеты. Уæлдæр ахуырад райсыны фæстæ 2008 азæй 2012 азмæ куыста Уæрæсейы Федерацийы Хицауады пресс-службæ æмæ информацийы Департаменты.
2012 азæй 2019 азмæ та куыста æхсæнадон бастдзинæдты æмæ коммуникациты фæдыл Уæрæсейы Федерацийы Президенты Управленийы. 2015 азæй уыд УФ-йы Президенты Администрацийы Управленийы егъау дунеон мадзæлтты фæдыл департаменты хистæр. 2015 азы йын лæвæрд æрцыд дыккаг къласы æцæг паддзахадон уынаффæгæнæджы къласон цин. Архайдта информацион-аналитикон здæхтимæ дунеон æмæ уæрæсейаг алыгъуызон мадзæлтты, уыцы нымæцы 2014 азы Сочийы Олимпиадæ, 2018 азы футболæй дунейы чемпионаты, афтæ ма къорд егъау паддзахадон инфраструктурон проекттæ сорганизаци æмæ бацæттæ кæныны.
«Йæ профессионалон фæлтæрддзинадмæ гæсгæ «Ростуризм»-ы ног сæргълæууæгæн йæ бон суыдзæн уæрæсейаг турпродукт раразмæ кæнын, куыд мидæггагон, афтæ фæсарæйнаг базары дæр», – банысан кодта туриндустрийы Уæрæсейы цæдисы вице-президент Юрий Барзыкин. «Хъуыды кæнын афтæ, æмæ «Ростуризм»-ы ног къухдариуæггæнг снысан кæнынæй акцент арæзт æрцыд нæ ресурсты, потенциал æмæ турпродукты размæцыдыл. Растдæр уымæ гæсгæ æвзæрст æрцыд профессионал, кæцы куыста ацы фадыджы, æмæ, кæй зæгъын æй хъæуы, хорз зонгæ у ацы куыстимæ æмæ сифтонг кæндзæн фадыджы куыст ног механизмтæ æмæ технологитæй спайда кæнгæйæ», – загъта Барзыкин.
УФ-йы вице-премьер Ольга Голодец «Ростуризм»-ы хистæрæй Дыгъуызты Заринæ нысан кæй æрцыд, уымæн комментаритæ кæнгæйæ, банысан кодта, зæгъгæ, «Ростуризм»-мæ æрбацыд ног æвзонг æмæ хъаруджын командæ, цæмæй ног импульс лæвæрд æрцæуа фадыджы рæзтæн.
Дыгъуызты Заринæ ма у «Амурский тигр»-ы центры цæстдарæн советы уæнг, кæцы арæзт æрцыд Путины инициативæмæ гæсгæ. Организацийы нысан у амураг тигрты бахъахъхъæнын æмæ фылдæр кæнын.
Мах дæр арфæ кæнæм Дыгъуызты Заринæйæн ахæм бæрнон бынаты йæ кæй снысан кодтой, уый тыххæй. Нæ зæрдæ йын зæгъы ноджы стырдæр æнтыстытæ Стыр Уæрæсейы зæххыл.
ДЖИОТЫ Екатеринæ
АРФÆ – ДЫГЪУЫЗТЫ ЗАРИНÆЙÆН
Цытджын Заринæ Валерийы чызг,
Зæрдæбынæй дын арфæ кæнын Уæрæсейы Федерацийы туризмы фæдыл Федералон агентады къухдариуæггæнæджы бæрнон бынатмæ дæ кæй снысан кодтой, уый сæраппонд.
Ацы бынатмæ дæ кæй снысан кодтой, уый ссис де ‘нтыстджын æмæ эффективон архайды фæстиуæг. Ног бæрнон бынат дын уæрæх фадæттæ ратдзæн «Ростуризм»-ы раз лæууæг хæстæ аскъуыддзаг кæныны тыххæй нысан-мæтырнындзинад, курдиат æмæ сфæлдыстадон ахаст равдисынæн.
Цытджын Заринæ Валерийы чызг, мæ зæрдæ дын зæгъы фидар æнæниздзинад, æвидигæ энерги æмæ æнтыстытæ.
Республикæ Хуссар Ирыстоны Президент
БИБЫЛТЫ Анатоли
Comments are closed, but trackbacks and pingbacks are open.