Горæты машинæтæ дзæвгар кæй фæфылдæр сты, уый, кæй зæгъын æй хъæуы, нæу мæгуырау, фæлæ иуæй-иутæ сæ машинæтæ уынгты кæнæ та тротуарты кæй бауромынц, уый нæу раст. Тыхсын кæнынц фистæгæй цæуджыты. Ныры дуджы бинонтæн иу машинæ фаг нал у, сæумæрайсом æмæ изæры – куыстмæ цæуын æмæ фæстæмæ здæхыны афон армыдзаг горæты машинæтæй азмæлæн нал вæййы.
Паддзахадон автоинспекцийы бæрæггæнæнтæм гæсгæ, Хуссар Ирыстоны ис 20 мин хæдтулгæйы. Уым ма банысан кодтой, фондз азы размæ Хуссар Ирыстоны машинæты нымæц кæй уыд æрмæстдæр 12 мины.
Бирæуæладзыгон хæдзæртты кæртыты æхсæвæй-бонæй машинæтæй ахизæнтæ нæй. Суанг ма сæ тротуартыл дæр æвæрынц. Кардзыд адæм æмæ сывæллæтты цæуын фæхъæуы машинæты фæндагыл, уым та тынг тæссаг у, исты фыдбылыз куы ‘рцæуа, уымæй. Сæ машинæтæ ма сæвæрынц подъездты тæккæ бацæуæнты дæр. Ууылты цæугæ нæ, фæлæ куыд фæзæгъынц, машинæйæ хæдзары ‘хсæн, судзины фæдзæл дæр нал аласдзынæ…
Хуыцау бахизæд, фæлæ зынгсирвæзт куы ‘рцæуа, уæд дзы зынгхуыссынгæнæн машинæтæн бацæуæн дæр нал уаид. Афтæ тагъд медицинон æххуысы машинæ дæр.
Шофыртæ бавдæлынц æмæ сæ машинæтæ цалдæр хæдзары æддæдæр ныууадзынц. Иудзырдæй, бынат кæм ссарынц, уым.
«Зонæм æй, раст кæй нæ кæнæм, уый. Уаг халын дæр нæм нæ цæуы, кæй нын бауайдзæф кæнынц, уый дæр нæм хæрам нæ фæкæсы. Фæлæ нын æндæр гæнæн нæй», – загъта вокзалгæрон уынджы цæрджытæй сæ иу.
Зынаргъ шофыртæ! Транспорт кæуыл цæуы, уыцы фæндаджы сæрты бахизынæн ис сæрмагонд тæлм («зебрæ»). Сымахæн уæ хæс у, уыцы тæлмыл цæуæг фистæг бæлццонæн фæндаг раттын, стæй ма иннæ шофырты дæр ма хъыгдарын.
Адæмæн ис, кæм не ‘мбæлы, ахæм ран æвæрд транспортон фæрæзты хицæуттыл мидхъуыддæгты хайадмæ кæнæ цæрæн бынаты администрацимæ бахъаст кæныны бар. Фæндæгты змæлд гуымирæй чи халы, уыдон се ‘ппæт дæр хъуамæ цæуой карз æфхæрд, цыфæнды стыр чиновник, стæй кæйдæр хион куы уа, уæддæр.
Закъоны домæнтæ кæд тызмæг сты, уæддæр сæ æххæст кæнын хъæуы. Фæндаггон змæлды ацы æгъдау ног нæу. Алчидæр тынг хорз зоны, машинæтæ æнæмбæлгæ рæтты уадзæн кæй нæй, уый.
«Магазинты цур уæгъд бынат нал баззад æмæ дзы машинæтæй ахизæн нæй. Æдзæсгомдæр чи у, уый йæ машинæ батæры фистæгæй цæуджыты фæндæгтæм. Цæмæн афтæ у?», – зæгъы нæ горæты цæрæг Хъуылымбегты Галинæ.
Ацы фарст хауы автоинспекцийы кусджытæм, уырны нæ, кæй йыл бакусдзысты æмæ сæ къухты кæй бафтдзæнис бæрæг æнтыстытæ.
Паддзахадон автоинспекцийы кусджытæ сæ цæст дарынц фæткхалджытæм, аразынц рейдтæ æмæ профилактикон мадзæлттæ. Фæлæ уæддæр, республикæйы цæрджыты фылдæр хай не ‘ххæст кæнынц фæндæгтыл цæуыны фæткойтæ.
ДРИАТЫ Лейла
Comments are closed, but trackbacks and pingbacks are open.