Фæстаг азты нæ горæты уынгты машинæты нымæц дзæвгар кæй фæфылдæр, уымæ алчи иугъуызон цæстæй нæ кæсы. Иутæ йæ нымайынц хъæздыгдзинадыл. Æндæртæ та сæйраг хъæздыгдзинадыл нымайынц сæхи æмæ сæ алыварс адæмы æнæниздзинад.
Машинæ дын уа, уый кæй зæгъын æй хъæуы, хорз у, дæ хъуыддаг дзы сараздзынæ тагъддæр æмæ æнцондæрæй. Афтæ ничи никæмæн зæгъдзæнис уæ бинонтæй алкæмæн дæр сæрмагонд машинæ цæмæн ис? Фæлæ ма ахъуыды кæнæм, алы машинæ дæр мæй судзы дыууæ-æртæ мин сомы аргъ æртаг. Хæдзары цалдæр машинæ куы уа, уæд, кæй зæгъын æй хъæуы, уый бинонты исад æмæ фæрæздзинадыл æндавдзæн мæгуырауæрдæм.
Горæты машинæтæ æгæр бирæ кæй ис, уый аххосæй ма хæлд цæуынц, æрмæст фæндæгтыл æдасæй цæуыны фæткойтæ нæ, фæлæ ма иуæй иуты зæрдæйыуаг дæр. Уымæн æмæ арæх бирæтæ сæ машинæтæ бауромынц, кæм не ‘мбæлы, адæмы кæм фæхъыгдарынц, ахæм бынæтты, газонтыл, тротуартыл, искæй рудзгуыты бын. Иуæй-иу шофыртæ та сæ комкоммæ баскъæрынц бирæуæладзыгон цæрæн хæдзæртты рахизæнтæм. Исчи сын куы бауайдзæф кæны, уæд се ‘хсæн быцæутæ дæр рауайы, къæм бахауы сæ сыхагон ахастыты.
Машинæтæ дзæвгар кæй фæфылдæр сты, уый тыххæй фæфылдæр сты æвæлтæрд шофыртæ дæр. Уый та, хъыгагæн, арæх æркæны æнамонддзинадмæ. Ацы фарстыл дзургæйæ ма мæ банысан кæнын фæнды уый дæр æмæ иуæй иу ныййарджытæн сæ кæстæр машинæ скъæрыны бар куы райсы, уæд фенхъæлынц, зæгъгæ, у цæттæ шофыр, фæлæ цæмæй æвзонг адæймаг машинæ æдæрсгæ скъæра, уый тыххæй æнæмæнг хъæуы практикæ. Практикæ райсыны тыххæй та – рæстæг.
Машинæ скъæргæ-скъæрын арæхдæр цы фæткхалæн цаутæ æруадзæм, уыдонæй иу у телефонæй дзурын. Ацы фарсты тыххæй мæнæ цы зæгъы, бирæ азты автоскъолайы ахуыргæнæгæй чи фæкуыста, уыцы хистæр кары æмбæстаг Джыгкайты Георги.
Раздæр фæндæгтыл æдасæй цæуыны фæткойтæ хæлд цыдысты æрмæстдæр иуæй-иу шофыртæм фаг фæлтæрддзинад кæй нæ уыд, уый аххосæй. Ныр та – машинæ æгæр тагъд æмæ нозтджынæй скъæрыны цаутæ. Раст ма нæ кæнынц, машинæ скъæргæ-скъæрын телефонæй чи дзуры, уыдон дæр. Уырны мæ, фæстаг азты фæндæгтыл цы аваритæ æрцыд, уыдон аххосæгтæй иутæ кæй систы, шофыртæ телефонтимæ кæй фæархайынц, уый.
Мæргъиты Марат, æвзонг шофыр: Машинæ скъæрыны бартæ райстон хæрзæрæджы – дыууæ азы размæ. Афтæ нæ зæгъдзынæн æмæ мæ фæлтæрдзинад æмæ зонындзинæдтæ хуыздæр сты, къорд азты шофыры куыст чи кæны, уыдонæй, фæлæ архайын, цæмæй цæугæ-цæуын ма дæр искæй батыхсын кæнон, ма дæр – мæхи. Кæсын ме ‘мкарæнтæй машинæйыл чи цæуы, уыдонмæ. Фенын сын сæ æнæхъуаджы митæ дæр, бакæнын сын уайдзæфтæ, фæлæ сæ алчи нæ аразы хатдзæгтæ. Тынгдæр та мæсты кæнын, рулыл бадгæйæ телефоны чи фæдзуры, уыдонмæ. Уымæн æмæ мæм телефонæй дзурæг кæсы расыг шофыры хъуызæн. Ахæм шофырæн рулы бæсты йæ хъуыдытæ вæййынц æндæр кæмдæр æмæ кæй зæгъын æй хъæуы, куыд æмбæлы, афтæ нал фæхъуыды кæны йæ развæндагыл.
Паддзахадон автоинспекцийы кусæг, милицийы дæлбулкъон Æлборты Роланд та, шофыртæй телефоны дзурын бирæ чи уарзы, уыдон тыххæй афтæ зæгъы:
– Кæд авариты сæйрагдæр аххосæгтæ сты тагъд скъæрын æмæ расыгæй машинæ скъæрын уæддæр сæ фæстæ нæ лæууынц, скъæргæ-скъæрын телефонæй дзурын чи уарзы, уыцы шофыртæ. Кæд шофырæн æндæр гæнæн нæй, хъуамæ адзура, кæна сдзуапп кæна, уæд хъуамæ машинæ баурома змæлд кæм нæ хъыгдара, ахæм ран.
ГÆЗЗАТЫ Иван
Comments are closed, but trackbacks and pingbacks are open.