Республикæ Хуссар Ирыстоны Хицауад кусынц Дзауы районы сывæллæтты улæфæн лагеры эксплуатацийы механизмтыл, цæмæй объект куса азы кæцыфæнды афоны дæр.
Уый тыххæй фехъусын кодта Хицауады Сæрдар Джуссойты Константин объекты радон инспекцийы рæстæджы.
Хицауады сæргълæууæгимæ уыдысты Арæзтад, архитектурæ æмæ цæрæнуатон-коммуналон хæдзарады министр Елдзарты Константин, Хицауады аппараты къухдариуæггæнæг Хъотайты Сæрмæт æмæ подрядон организаци ООО «Бадо»-йы генералон директор Уалыты Владислав.
Джуссойты Константин аразджытимæ æруынаффæ кодта объекты æппæт территорийыл куыстыты цыдыл, уыцы нымæцы цæрæн хатæнты мидæггагон планировкæйыл.
Лагеры фыццаг проектмæ хаст æрцыдысты иуæй-иу ивындзинæдтæ, фидæны лагеры уæлдай эффективондæрæй эксплуатаци кæныны нысанæн. Банысангонд æрцыд, уый кæй нæ домы уæлæмхас æхцайы фæрæзтæ, фæлæ адарддæр кæндзæн арæзтад фæуыны æмгъуыдтæ.
«Улæфæн лагерь у ахсджиаг проект республикæйæн, йæ куысты гуырахст у егъау. Æнæмæнгхъæуæг у арæзтады æппæт этаптыл контроль кæнын, цæмæй фидæны эксплуатацийы рæстæджы зындзинæдтимæ ма сæмбæлæм. Мах уæрæсейаг коллегæтимæ кусæм лагерь æнæхъæн аз кусыны механизмтыл», – загъта Хицауады сæргълæууæг, æмæ профилон службæтæн бахæс кодта, цæмæй æдзух контроль кæной бакæнгæ куыстыты гъæдыл.
Джуссойты Константин аразджыты хъусдард аздæхдта бацæуæн фæндæгты хидыл ахизæнмæ, бахаста фæндон йæ рауæрæх æмæ сфидар кæныны тыххæй. Йæ ныхæстæм гæсгæ, лагеры территорийыл æппæт объекттæ арæзт хъуамæ уой иу хуызы, улæфджытæн уой æнцонвадат æмæ æдас.
Аразджыты ныхæстæм гæсгæ, объекты цы æрмæджытæй пайда кæнынц, уыдон æмбæлон сты гъæды стандарттæн, бæстыхайы фасадтæ сфæлгонц кæнынæн пайда цæуы æрмæст бынæттон къæдзæх дуры хуызæн нæ, фæлæ ма фидар æрмæгæй.
Сывæллæтты Мзиугомы лагерь арæзт цæуы РХИ-йы социалон-экономикон рæзтæн ахъазгæнæг Инвестицион программæйы фæлæгтты æмæ у иу азæй иннæ азмæ рахæсгæ объект. Ныртæккæ лагеры фондз корпусы цæуынц сæрдæн æмæ сантехникон куыстытæ, уыимæ иумæ хæрзарæзт цæуы объекты территори. Фæнд кæнынц, зæгъгæ, сæрды лагеры улæфдзысты сывæллæттæ, афæдзы иннæ рæстæджы та ам баулæфын сæ бон уыдзæн бинонтæн дæр.
Хицауады сæргълæууæг базонгæ ис фæндаг «Эрцъо-Синагур»-ы арæзтадимæ дæр, кæцы у Синагуры зонæйы хъæутæн сæйраг автотранспортон артери. Аразджытæ ныфс æвæрынц йæ дæргъ 20 км кæмæн у, уыцы фæндагæн йе ‘мбисыл асфальт сæвæрыны куыстытæ кæй фæуыдзысты ацы аз.
