26-æм июлæй 2-æм августмæ Хуссар Ирыстоны территорийыл æрцыдис 3 фыдракæнды æмæ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикӕйы фӕндӕгтыл ӕрцыдис дыууæ фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой æртæ адæймаджы.
Алыгъуызон бархалынæдты фӕдыл бӕрндзинадмӕ конд ӕрцыдысты цыппар адӕймаджы.
Фæндагон змæлды æдасдзинады инспекци къуырийы дæргъы сбæлвырд кодта 234 фæткхалæн цауы. Уыдонæй 5 уыдысты нозтджынæй машинæ скъæрыны цаутæ.
Милицийы наркотикты ӕрзылдыл контроль кӕныны управленийы кусджытӕ оперативон информацийы фæдыл басгæрстой Цхинвалы районы Гудзабары хъæуы 61-аздзыд цæрæджы хисæрмагонд хæдзар æмæ цæхæрадоны ссардтой 3 гæны къутæры. Фæткхалæг æфхæрд æрцыдис.
26 июлы Дзауы районы милицимæ фехъусын кодтой, зæгъгæ, Хслебы хъæуы 59-аздзыд цæрæг 3 боны размæ ацыд хæдзарæй æмæ нал æрбаздæхт фæстæмæ. Агурæн мадзæлттæ ауадзыны фæстиуæгæн 26 июлы изæрæй Гуфтайы хъæуы цæугæдоны былгæрон мардæй ссардтой ацы æмбæстаджы. Развæлгъау куыд рабæрæг, афтæмæй фæмардуæвæг йæхи баппæрста доны.
29 июлы Ленингоры районы Дзукъатыхъæуы кæрон милицийы æмæ Паддзахадон æдасдзинады комитеты кусджытæ ссардтой 340 гæны къутæры, кæцытæ куынæг æрцыдысты.
30 июлы милицийы наркотикты ӕрзылдыл контроль кӕныны управленийы кусджытӕ оперативон информацийы фæдыл баурæдтой нæ горæты 44-аздзыд цæрæджы, кæцымæ сæ зæрдæ фехсайдта наркотиктæй спайда кæнынмæ. Басгæрсты рæстæджы йын йæ дзыппы ссардтой чысыл гæххæтты тыхтон, кæцыйы мидæг разынд урсбын хъæбæр буарад. Эксперттæ куыд рабæрæг кодтой, афтæмæй ацы зæрдæхсайгæ буарад у тыхджын наркотик «героин». Фæткхалæг куыд бамбарын кодта, афтæмæй ацы наркотик уæййаг уыдис интернеты сайты æмæ йын æхца дæр арвыста дистанцион хуызы горæт Дзæуджыхъæуæй, стæй йæ йемæ æрхаста Хуссар Ирыстонмæ. Уымæй уæлдай ма медицинон басгæрст куыд рабæрæг кодта, афтæмæй ацы æмбæстаг спайда кодта наркотикон буарадтæй «морфин» æмæ «марихуанайæ». Фыдгæнæг бады ахæстоны.
Горæт Цхинвалы милицийы управленийы кусджытӕ ма баурæдтой нæ горæты 49-аздзыд цæрæджы, кæцы спайда кодта наркотикон буарад «марихуанайæ».
30 июлы Знауыры районы Бехъмары хъæуы 62-аздзыд бынæттон цæрæджы хисæрмагонд хæдзар ссыгъд. Зынгхуыссынгæнæн службæйы кусджытæ ахуыссын кодтой арт, фæлæ уæддæр бирæ зиан æрхаста цæрæнуатæн. Куыд рабæрæг, афтæмæй зынгсирвæзты аххосаг уыд газы плитæ.
Comments are closed, but trackbacks and pingbacks are open.