Дарддæр цæуынц æфсирон культурæтæ æфснайыны куыстытæ нæ республикæйы фермерон æмæ хисæрмагонд хæдзарадты. Зындгонд куыд у, афтæмæй ацы куыст кæнынц Знауыр, Ленингор æмæ Цхинвалы районты хоркуыстгæнджытæ.
Æппæты фылдæр ацы культурæтæ байтыдтой Ленингоры районы хæдзарадтæ, уый фæстæ та сты Знауыры районы хъæууон фæллойгæнджытæ. Ацы ахсджиаг æмæ æнæаргъæвгæ куыстмæ æппæты фыццаг бавнæлдтой Ленингоры районы комбайнертæ Габеты Хвича, Хуриты Зураб, Мæргъиты Илья æмæ Габеты Радик. Уыдон се ‘ппæт дæр сты сæ хъуыддаджы арæхстджын æмæ, йæ куыст бирæ чи уарзы, ахæмтæ æмæ æппæт амæлттæй дæр архайынц куыстытæ рæстæгыл æмæ æнæсæфтытæй ахицæн кæныныл. Тракторон бригадæйы бригадир Габеты Хвича куыд банысан кодта, афтæмæй тыллæг æфснайыны куыстытæ æххæст кæнынц, байтыдты фæзуæттæ цы бынæтты сты, уым се ‘ппæты дæр. Абреуы хъæуы быдыртæй уал карст фесты æмæ банай кодтой 140 га фæзуатыл. Цы тыллæг ма сын ис бабæстон кæнинаг, уый та карст фæуыдзысты иу боны æмгъуыдмæ.
Хойраг æфснайыны куыст æххæст цæуы Орчъосан æмæ Цъинагары быдырты дæр. Хъыгагæн, зæронд комбайн фехæлд æмæ сæ фæсауæрц хайæ хъуамæ сифтонг кæна «Агросервис» æввахс бонты æмæ дарддæр цыппар комбайны дæр кæндзысты сæ куыст. Бригадир куыд загъта, уымæ гæсгæ уал банысангонд рæстæгмæ карст фесты 650 гектары. Кæй зæгъын æй хъæуы, зæрдæйы фæндиаг нæу сæ хуымты тыллæгæрзады бæрæггæнæн – астæуккаг нымадмæ гæсгæ гектарæй æфснайынц 13-15 центнеры. Комбайнертæ фаг ифтонг сты æртаг æмæ сæрдæн æрмæджытæй æмæ сæ ныфс ис, сæ хуымтæ кæй бафснайдзысты 10 кусгæ бонмæ.
Хъæбæрхор æмæ фæззыгæнд мæнæуы хуымтæ кæрдынмæ бавнæлдтой Знауыры районы комбайнертæ дæр. Куыстытæ куыд æххæст цæуынц, уымæ йæ хъус дары Уелиты хъæуы фыццæгæм тракторон бригадæйы бригадир Наниты Талик æмæ сын æнтысгæ дæр кæны. Ацы бригадæйы комбайнертæ Цхуырбаты Вадик, Табуты Æхсар, Бабаты Радион, Наниты Алик æмæ Джиоты Вадик кæрдыны куыст кæнынц Уелит, Мугуты быдырты. Бригадир Нанийы-фырт радзырдта, зæгъгæ, уал Мугуты быдырты æркарстой 100 гектары, ис ма дзы 40 га кæрдинаг æмæ уый дæр бабæстон кæндзысты иу боны æмгъуыдмæ. Уелиты алфæмбылай зæххыты сын кæрдинаг ис 300 гектары фæзуатыл æмæ уал дзы бафснайдтой 80 га. Комбайнертæ кæрдыны куыстытæ æххæст кæнынц канд бынаты нæ, фæлæ ма се ‘ххуысы къух фæдаргъ кæнынц техникæйæ хъуаг хæдзарадтæм дæр. Цæвиттон, Арцеуы хъæуы 25 га карст фесты хисæрмагонд хæдзарады хоркуыстгæнæгæн, фæстæдæр та кæрдын райдайдзысты Къостайыхъæуы хицæн хæдзарадтæн.
ХУЫБИАТЫ Никъала
Comments are closed, but trackbacks and pingbacks are open.