«Мах хъӕуы сабырад!..»

Ацы ӕнӕавтор, ӕнӕном фыстӕг фӕзынд Гуырдзыстоны интернет-тыгъдады, фӕлӕ йыл ӕмбӕлон органты цӕст куы рхӕцыд, уӕд рахастой уынаффӕ, цӕмӕй йын йӕ фӕндаг ӕрӕхгӕной, ӕмӕ, цы гӕнӕн ма ис, уымӕй йӕ мачиуал бакӕса, Гуырдзыстоны ахӕм хъуыдыгӕнджытӕ дӕр кӕй ис, уый ма базоной, кӕмӕ не «мбӕлы» уыдон. Уый адыл фыстӕджы текст фӕтары, фӕлӕ мах дӕр иууыл хуыртӕ кӕм ӕхсӕдӕм – фыстӕджы текст рӕстӕгыл бафтыд нӕ къухы ӕмӕ йӕ хӕссӕм газеткӕсджыты тӕрхонмӕ. Чизоны дзы тӕлмацы аххосӕй иуӕй-иу хъуыдытӕ бынтон ма райхӕлой, фӕлӕ йын йӕ мидис рахӕссынхъом бауыдзыстӕм, цас гӕнӕн ис, уымӕй йын йӕ политикон цӕстӕнгас ӕмӕ  дзырдуатон уаг бахъахъхъӕнгӕйӕ…

«Ныр мӕйӕ фылдӕры бӕрц, Гуырдзыстоны зынаргъ ӕмбӕстӕгтӕ, мах нӕ хъус дарӕм, ӕрвылбон дӕр Украинӕйы зӕххыл чи цӕуы, уыцы фыдракӕндтӕм. Хӕст, кӕнӕ йӕ уырыссӕгтӕ фӕдсафынӕн куыд хонынц, афтӕ – «ӕфсӕддон операци» – алы бон дӕр конфликты дыууӕ фарсӕрдыгӕй хӕссы зӕрӕдты, сабиты, сылгоймӕгты, ӕмӕ, сӕ нымӕц бӕлвырд кӕмӕн нӕу, уыцы ӕфсӕддонты цард. Уый у ӕвирхъаудзинад ӕмӕ ӕнӕадӕймагон ахаст. Ацы уавӕры мах не ппӕт дӕр хӕцӕм украинаг адӕмы ӕвварс, исӕм лигъдӕтты, ӕрвитӕм гуманитарон ӕххуыс, кӕцы ныридӕгӕн нымайгӕ у, сӕдӕгай тоннӕтӕй фыццаградон,  ӕнӕмӕнгхъӕуӕг дзаумӕттӕ ӕмӕ ӕгӕрстӕмӕй «дывӕрсыг нысаниуӕгимӕ» фӕрӕзтӕ дӕр (ӕнӕпилотон хӕддтӕхджытӕ ӕмӕ ӕндӕртӕ), фӕлӕ цыфӕнды рӕдаудзинадӕн дӕр ис бындур ӕмӕ кӕронбӕттӕн хахх… Алчи дӕр ӕй ӕмбары, ӕмӕ, мах ӕрвонг зонды арӕнтӕй куы ахизӕм, уӕд гӕнӕн ис ӕмӕ суӕм хӕсты хайадисджытӕ. Не мфыдыбӕстӕйонтӕй бирӕтӕн сӕ фӕрс нӕ рахӕцыд Гуырдзыстоны хицауад, цӕмӕй баххуыс кодтаиккой Украинӕйӕн, уырдӕм, уырыссӕгтимӕ тох кӕнынмӕ бархионтӕ арвитыны тыххӕй. Фӕлӕ сӕ уый нӕ бахъыгдардта нысангонд бынатмӕ сӕхигъӕдӕй фӕхӕццӕ уӕвынӕн.

Уый ӕмрӕстӕджы, кӕд оппозицион парти Гуырдзыстоны Иууон национ змӕлд Гуырдзыстонмӕ ӕрсидт санкциты ӕвварс рахӕцынмӕ, уӕддӕр нӕ хицауад алы хатт дӕр вӕййы, Уӕрӕсейӕн европӕ кӕй расиды, уыцы санкциты ныхмӕ, уый «ӕнӕэффективон тохы фӕрӕзыл» нымайгӕйӕ.

«Сымах гуырдзиаг адӕмы номӕй хъуамӕ рахӕцат, уӕлдӕфон тыгъдадмӕ ахасты Евроцӕдис кӕй расидт, уыцы санкциты фарс», – фехъусын кодта Гуырдзыстоны Иууон национ змӕлды сӕргълӕууӕг Ника Мелия.

Уымӕн дзуапп радта Гуырдзыстоны премьер-министр Иракли Гарибашвили:

«Кӕд дзырд санкиты ӕвварс балӕууыныл цӕуы, уӕд… Цымӕ цы домынц мӕнӕй? Цӕмӕй мӕ адӕмӕн санкцитӕ расидон? Æмӕ уымӕй зиан кӕуыл ӕрцӕудзӕн? Нӕ адӕмыл, нӕ экономикӕйыл, нӕ милуангай ӕмфыдыбӕстӕйонтыл, кӕцытӕн сӕ бон нӕ бауыдзӕн финансон операцитӕ сӕххӕст кӕнын ӕмӕ афтӕ дарддӕр. Уымӕ гӕсгӕ мӕ фӕнды ноджыдӕр иу хатт банысан кӕнын, ӕнӕхъуаджы эмоцитӕ нын кӕй ницы ратдзысты. Уый нӕ, фӕлӕ разиан кӕндзысты нӕ националон интерестӕн, нӕ адӕмы интерестӕн…».

Цӕй, зондджындӕр уӕм!..

Мӕ зынаргъ хӕлӕрттӕ, реалондзинад ӕй куыд ӕвдисы, афтӕмӕй нӕ адӕм, санкциты ӕвварс рахӕцгӕйӕ, Уӕрӕсейы Федерацийы экономикӕйӕн бынтондӕр ницы знаггад ракӕндзысты. Фӕлӕ… Нӕ бӕстӕйы экономикӕ у бынтон къуындӕг, ӕмӕ комкоммӕдӕр баст у дунеон экономикӕйыл, кӕцы нырмадӕр йӕ астӕу не сраст кодта коронавирусы пандемийы азарӕй, ӕмӕ ноджы ныллӕмӕгъдӕр, Украинӕ ӕмӕ Уӕрӕсейы хсӕн чи райдыдта, уыцы локалон конфликты фӕстиуджытӕй.

Дунеон ӕмӕхсӕнад Уӕрӕсейы экономикӕйы ныхмӕ кӕй расидт, уыцы санкцитӕ комкоммӕдӕр бандӕвтой махыл, ӕртаджы аргъы рӕзт ӕмӕ инфляцийы  хуызы.

Иу уысмы бӕрц дӕр ма ахъуыды кӕнӕм, цыма, куыдфӕндыйӕ дӕр, нӕ хицауад раст нӕу. Цӕй, нӕ хъусдард аздахӕм, нӕ политикон оппозици нӕ цы домы, уымӕ. Иууон националон змӕлд махӕй домы экономикон санкцитӕ райсын, не фсӕддонты ӕмӕ ӕмбӕстӕгты бархионтӕй хӕстмӕ арвитын, нӕ зӕххыл фӕсарӕйнаг ӕфсӕддон тыхтӕ равӕрын, ӕмӕ рӕстӕгмӕ оккупацигонд территориты фарст тыхы фӕрцы аскъуыддзаг кӕнын.

Мӕ хъуыдымӕ гӕсгӕ, махӕй домынц, цӕмӕй Европӕйы сынгсирвӕзт ахуыссын кӕнӕм бензинӕй! Иууон националон змӕлд ӕмӕ нӕ йӕ ӕмцӕдисонтӕ цы домынц, уый нысан кӕны – Уӕрӕсеимӕ нӕ ахастыты ӕндыгъддзинад ӕмӕ нӕ сӕрсӕфӕны былыл ӕрлӕууын кӕнын – хӕст нын расидын.

Фӕлӕ ма батагъд кӕнут уӕ хӕдӕхстӕ ӕрцӕттӕ кӕныныл, ам ма ис, цӕуыл ауынаффӕ кӕнӕм, ахӕм цыдӕртӕ дӕр! Мах хъуамӕ нӕ зӕрдыл дарӕм, хӕстмӕ нӕ чи разӕнгард кӕны, уыдон, цыфӕнды нӕм ма сидой, уӕддӕр сӕхӕдӕг нӕ ацӕудзысты хӕцынмӕ, уыдон баддзысты кӕнӕ сӕ кабинетты, кӕнӕ – сӕ фӕсарӕйнаг хӕдзӕртты. Хӕцынмӕ цӕттӕ чи уыд ӕмӕ кӕй фӕндыд, уыдон ныртӕккӕ хӕцынц Украинӕйы. Ныртӕкӕ мах уынӕм, Евроцӕдис дӕр ӕмӕ Америкӕйы Иугонд Штаттӕ дӕр, фактон ӕгъдауӕй, сӕ къух кӕй систой Украинӕйыл, ӕрмӕстдӕр сын ӕхсӕнгӕрзтӕ ӕмӕ танкты ныхмӕ тохгӕнӕн фӕрӕзтӕ ӕрвитгӕйӕ. Нӕдӕр сын, ныфс сын кӕмӕй бавӕрдтой, уыцы ӕфсадӕй ӕххуыс кӕнынц, нӕ дӕр хӕдтӕхджытӕй! Æмӕ уый фӕстӕ уыдон махӕн баххуыс кӕндзысты?!

Мӕ зынаргъ ӕфыдыбӕстӕйонтӕ, цӕй ӕмӕ хуыздӕр ахъуыды кӕнӕм, цахӕм уавӕры стӕм ныртӕккӕ мах ӕмӕ нӕ бӕстӕ… Æз зӕгъин афтӕ: ӕвзӕр, фӕлӕ сабырдзинад хуыздӕр у, цӕйнӕфӕлтау амӕлӕм, кӕй нӕ ӕмбарӕм, ахӕм ран ӕмӕ, кӕй хъӕуы, уый бӕлвырд кӕм нӕу, ахӕм хӕсты! Æз хомаг нӕ дӕн, нӕ дӕр фос дӕн ӕмӕ нӕдӕр искӕмӕн пайдайы хӕсты амӕттаг дӕн!».

Афтӕ, гъе… Куыдфӕндыйӕ дӕр, цы уӕззау уавӕры бахаудысты, уымӕ ӕнӕкӕсгӕйӕ гуырдзы хъуыды кӕнынц сӕ бӕстӕйы хъысмӕтыл, куыд хуыздӕр, куыд пайдадӕр сын уыдзӕн, уыдӕттыл. Мах та, махӕй гуырдзыйы хсӕн цы фӕндӕгтӕ ис, уыдоны сындзӕхгӕд скӕныны бӕсты сӕ байгом кӕныныл дзурӕм, сӕ бакӕнынӕй сын ныфсытӕ ӕвӕрӕм…

Гуырдзы, цы уавӕры бахаудысты, уыцы уавӕры дӕр кӕрӕдзиӕмбарынадмӕ сидынц, мах та –  къордтӕ, дихтӕ кӕнынмӕ… Республикӕ Хуссар Ирыстоны Уӕлдӕр тӕрхондон Президентон ӕвзӕрстыты дыккаг тур 28 апрелы, ома, кусгӕбон ауадзыны тыххӕй уынаффӕ ӕнӕзакъононыл кӕй банымадта, уый нӕ адӕмы иу хаймӕ раст нӕ фӕкаст… Цы дзы ис ӕнӕрастӕй, ӕнӕзакъонӕй? Ам, нӕхимӕ, нӕ бон у ӕмӕ 28 апрель расидӕм улӕфт бонӕй, фӕлӕ фыццаг туры Цӕгат Ирыстон, Мӕскуы ӕмӕ Абхазы чи схъӕлӕс кодта, уыцы адӕм та цы фӕуой – сӕ хъӕлӕстӕ нӕ фыццаг туры хъуыдысты, ныр нӕ нал хъӕуынц?!. Уыдоны тыххӕй дӕр улӕфт бонтӕ расиддзысты, кӕм цӕрынц, уыцы бӕстӕтӕ? Æмӕ дзурынц: Цӕгат Ирыстон, Мӕскуы ӕмӕ, дам, Абхазы чи цӕры, уыдоны, дам, чи фӕрсы, уыдон, дам, нын цӕмӕн хъуамӕ скъуыддзаг кӕной нӕ хъысмӕт, уыдонӕн, дам, цы бар ис, ӕмӕ ӕвзӕрстыты бон кусгӕ бонӕй улӕфт бонмӕ хӕссын кӕной?..

Афтӕ хъуыды кӕнут, нӕ?..

Омӕ, хорз… Кӕд уыдоны ничи фӕрсы, кӕд уыдонӕн уый бар нӕй, цӕмӕй ӕвзӕрстыты дыккаг тур дӕр кусгӕ боны бӕсты улӕфт бонмӕ хӕссын кӕной, уӕд нӕ цӕмӕн хъӕуынц сӕ фыццаг туры ратгӕ хъӕлӕстӕ дӕр?.. Уӕд бавдӕлут ӕмӕ фыццаг туры цы проценттӕ райстат, уыцы проценттӕй Цӕгат Ирыстон, Мӕскуы ӕмӕ Абхазы райсгӕ процентты аппарут ӕмӕ сын сӕ иумӕйаг нымӕц афтӕмӕй банымайут…