Цыппæрдæс азы рацыд Уæрæсейы ‘рдыгæй Хуссар Ирыстоны хæдбардзинад банымайыны бонæй. Хуссар Ирыстоны адæм 26 август нымайы йæ царды иууыл ахсджиагдæр бонтæй сæ иуыл. Уæрæсе Хуссар Ирыстоны хæдбардзинад кæй банымадта, уый ирон адæмæн æнæкæрон цины бон у æмæ йæ алыхатт дæр банысан кæнынц стыр цины æнкъарæнтимæ, хъæлдзæг зæрдæйы равгимæ.
Нæ республикæйы районты, алы къуымы хæдбардзинады бон уагъд æрцæуынц бæрæгбонон мадзæлттæ.
Иу ахæм мадзал бацæттæ кодтой Цхинвалы районы Дменисы хъæуы Культурæйы хæдзары дæр. Мадзалы организатортæ уыдысты Культурæйы хæдзары директор Икъаты Ануси æмæ библиотекæйы кусæг Джиголаты Заремæ.
Культурæйы хæдзармæ бахизæны арæзт æрцыд чингуыты равдыст, къулыл конд уыд хæдбардзинады боны цытæн арæзт къулын газет. Мадзалмæ æрбацыдысты хъæуы цæрджытæ, хъæууон администрацийы кусджытæ, скъоладзаутæ.
Мадзалмæ æрбацæуджытæн бæрæгбоны цытæн арфæйы ныхæстæ ракодта Икъаты Ануси. – «Абон Ирыстонæн стыр бæрæгбон у. Мах, ирон адæм цæрæнбонты цæмæдæриддæр бæллыдыстæм, уый нæ къухы бафтыд. Мах бузныг зæгъæм стыр Уæрæсейæн – нæ хæдбардзинад нын кæй банымадта, нырæй фæстæмæ сабыр арвы бын æдæрсгæйæ кæй цæрдзыстæм. Дыууын азы дæргъы куыд нæ хъæу, афтæ æппæт Хуссар Ирыстоны адæм зын æмæ уæззау фæндæгтыл фæцыдысты, бирæ хъизæмæрттæ æмæ фыдæбæттæ бавзæрстой. Фæлæ уæддæр быхстой, фæрæзтой, æнхъæлмæ кастысты хуыздæр фидæнмæ», – загъта уый. Икъаты Ануси мадзалмæ æрбацæуджытæм бахатыд, цæмæй сæрибардзинады сæрвæлтау сæ цард чи радта, уыдоны ном иу уысм æмырæй алæугæйæ ссарой. Иу уысм æмырæй алæугæйæ ма ссардтой Украинæйы сæрмагонд операцийы рæстæджы фæмардуæвæг хæстонты нæмттæ.
Бæрæгбонон мадзал барæсугъд кодтой скъоладзаутæ. Уалыты Аслан аив бакаст æмдзæвгæтæ: «Хæдбар Ирыстон», «Салдаты монолог» æмæ «О, Иры зынгхуыст хъæбултæ». Афтæ рæсугъд æмæ сæ зæрдæмæхъаргæ бакаст æмæ йын залы бадджытæ бирæ рæстæг кодтой къухæмдзæгъд. Зарджытæ «Пусть проходят года», «Отмените войну» рæсугъд азарыд Тыджыты Мæдинæ.
Мадзал рауад цымыдисон. Райгондæй баззадысты мадзалмæ æрбацæуджытæ æмæ йæ организатортæ дæр.
ДЗЕБЫСАТЫ Гуло
Comments are closed, but trackbacks and pingbacks are open.