Куыд æрвылхатт, афтæ та ныр дæр Æвзæнгты республикон библиотекæйы кусджытæ сæ директор Тъотъоты Ленæйы сæргълæудæй майы мæйы нысаниуæгджын бонтæй иу фæрсты дæр нæ ахызтысты æмæ сæ банысан кодтой цытджын æгъдауæй.
Стыр Фыдыбæстæйон хæсты Стыр Уæлахизы 73 азы боны цытæн библиотекæйы кусджытæ бацæттæ кодтой дыууæ фотостенды. Иу стенд дзы уыд сæрмагондæй Советон Цæдисы дыууæ хатты Хъайтар æмæ Монголты Адæмон Республикæйы Хъайтар, армийы инæлар Плиты Иссæйы райгуырды 115 азы цытæн. Æвзæнгты библиотекæмæ бирæ æвзонг чиныгкæсджытæ кæй цæуынц, уымæ гæсгæ сын ацы фотостенд фæахъаз уыдзæн Плиты Иссæйы стыр сгуыхтдзинæдтимæ базонгæ уæвынæн. Тъотъоты Ленæйы ныхæстæм гæсгæ, уыдон арæх ауадзынц, хъомыладон нысаниуæг кæмæн ис, ахæм мадзæлттæ сæ чиныгкæсджытæн. Ныр дæр библиотекæмæ фæхуыдтой нæ горæты скъолаты хистæркъласонты æмæ сæ лæмбынæг базонгæ кодтой Ирыстоны номдзыд фырты царды æмæ тохы хабæрттимæ. Плиты Иссæйы хуызæн хъæбатыр гуырдты тыххæй хъуамæ Ирыстоны цæрджытæй алчидæр зона чысылæй стырæй, уымæн æмæ уый йе стыр хъæбатырдзинæдтæй скад кодта йæ радтæг Ирыстон æмæ адæмæн æмæ сæ базонын кодта æнæхъæн дунейæн.
Иннæ фотостенд та хуыйны «Славные сыны Осетии», зæгъгæ. Стенд арæзт æрцыд 1941-1945 азты Стыр Фыдыбæстæйон хæсты ирон хъайтарты тыххæй. Уагдоны кусджытæ сæ чиныгкæсджыты базонгæ кодтой, фотостен-ды цы ирон хъайтарты нывтæ ис, уыдоны хæстон цардвæндаг æмæ хæстон сгуыхтдзинæдтимæ. Фотостенды бын æвæрд æрцыдысты хъайтартыл фыст æрмæджытæ.
15-æм майы мадæлон æвзаджы боны цытæн ныридæгæн библиотекæйы кусджытæ сорганизаци кодтой, 2018 азы цы ног чингуытæ райстой, уыдоны равдыст æмæ семæ базонгæ кæндзысты сæ чиныгкæсджыты. Ног чингуыты ‘хсæн сты куыд ирон фысджыты чингуытæ, афтæ уырыссаг æмæ фæса-рæйнаг авторты чингуытæ дæр.
Куыд æрвылаз, афтæ та уагдоны кусджытæ 20 май – Мысæн бонмæ Зары трагедийы амæттæгты номыл бацæттæ кæндзысты фотостенд. Стенды æвæрд æрцæудзысты Зары трагедийыл уацтæ фыст кæм уыд, уыцы газеттæ æмæ чингуытæ. Банысан кæнын хъæуы уый дæр, æмæ ахæм мадзæлтты руаджы рæзгæ фæлтæр кæй зонгæ кæнынц Ирыстоны стыр гоймæгтимæ æмæ сæ Райгуырæн зæххыл цы трагикон цаутæ æрцыд гуырдзыйы аххосæй, уыдонимæ.
Джиоты Екатеринæ
Comments are closed, but trackbacks and pingbacks are open.