Стыр Фыдыбæстæйон хæсты Уæлахизыл 73 азы сæххæсты боны цытæн Республикæ Хуссар Ирыстоны фæсивæдон политикон парти «Иууон Алани» ауагъта акци «Уæлахизы газет», зæгъгæ, ахæм номимæ, кæцы уагъд цыдис 8-9-æм майы.
Апрелы мæйы нæ республикæйы фæсивæдон æхсæнадон организаци «Иууон Алани» Татарстаны уагъдцæуæг ахуырадон форумы хайад куы райста, уæд йæ минæвæрттæ бахастой ахæм фæндон, цæмæй сæ инициативæмæ гæсгæ æрбиноныг кæной, цы проектыл архайдтой, уый саразыны хъуыддаг. Уыцы проект та у «Уæлахизы газет». Фæсивæдон организацимæ ис газет «Правда»-йы 1945 азы юбилейон номыры халдих, цыран официалонæй мыхуыр æрцыдис Советон Цæдисы стыр уæлахиз фашистон Германыл. Ацы проект ауадзыны фарс рахæцыдысты Уæрæсейы Федерацийы фæсивæдон организациты минæвæрттæ æмæ патриотон æнкъарæнтимæ уагъд æрцыдис куыд Уæрæсейы регионты, фæсарæнты, афтæ нæ республикæйы дæр.
Хуссар Ирыстоны акци «Уæлахизы газет» райдыдта Присы хъæуæй. Ам фæсивæдон организаци «Иууон Алани»-йы минæвæрттæ бацыдысты æмæ дидинджытæ сæвæрдтой, Присы хъæуæй Стыр Фыдыбæстæйон хæстмæ чи фæцыдис æмæ райгуырæн бæстæйы сæрвæлтау сæ сæртæ нывондæн чи ‘рхастой, уыцы хъæбатыр хæстонты номыл арæзт мемориалон комплексыл.
Банысан кæнын хъæуы уый, æмæ ацы мемориалон комплекс арæзт кæй æрцыд, Бибылты Анатоли ма РХИ-йы Парламенты Сæрдар куы уыдис, уæд. Æмæ йын бузныг зæгъынц æппæт хъæуы цæрджытæ дæр.
Уый фæстæ акци адарддæр кодтой горæт Къуайсайы æмæ нæ республикæйы районты.
Стыр Уæлахизы боны Театралон фæзуаты бæрæгбоны хайадисджытæн фæсивæдон организаци «Иууон Алани» арфæтæ æмæ бузныджы ныхæстимæ байуæрстой «Уæлахизы газет».
«Иууон Алани»-йы сæргълæууæг Коцты Михаил куыд банысан кодта, афтæмæй акцийы сæйраг нысан у, цæмæй хъахъхъæд цæуа Стыр Фыдыбæстæйон хæсты истори. «Махæн нæ дадатæ сæрмагондæй ацы газеты фæрцы базыдтой, немыцаг фашисттæ дæрæн кæй æрцыдысты æмæ йыл кæй фæуæлахиз Советон Цæдис, уый. Ацы газет уыд се стыр цин хæссæг æмæ йæ кастысты сæрыстыры æнкъарæнтимæ æмæ цæссыгкалгæйæ», – банысан кодта Коцты Михаил.
«Иууон Алани»-йы минæвæрттæ, уавæрæй пайда кæнгæйæ, стыр бузныджы ныхæстæ зæгъынц «Россотрудничество», РХИ-йы Хъахъхъæнынады министрад æмæ сæрмагондæй та Президент Бибылты Анатолийæн, акци ауа-дзынæн сын кæй баххуыс кодтой, уый тыххæй.
Нæ уацх.
Comments are closed, but trackbacks and pingbacks are open.