Советон Цæдисы рæстæджы адæм чиныгæн стырдæр аргъ кодтой. Хуссар Ирыстоны цæрджытæй-иу бирæтæ сæ кæрдзыны æхца дæр нæ бавгъау кодтой ног чингуытæ балхæныны тыххæй. Æгæрыстæмæй-иу радты дæр слæууыдысты чингуытæуæйгæнæн магазины æмæ-иу сæ цы чингуытæ хъуыд, уыдон-иу сæ къухты куынæ бафтыдысты, уæд-иу мæстæйдзагæй аздæхтысты. Уæд, чи ахъуыды кодтаид, æмæ кæддæр радты цы чингуыты тыххæй лæууыдысты, уыдоны бирæ цæрджытæ библиотекæтæм ратдзысты, ууыл.

Советон Цæдисы ныппырхимæ, нæ царды Интернеты æмæ алыгъуызон нырыккон технологиты фæзындимæ чиныгæн уадиссаг кад нал уыд. Фæлæ, та ныр чиныгмæ цæрджыты цымыдисдзинад фылдæр кæнын райдыдта. Уый бæрæг у уымæй дæр, æмæ нырма кæд раздæрау нæ, уæддæр адæм чиныгагур цæуын кæй райдыдтой библиотекæтæм, чиныгуæйгæнæн магазинтæм. Кæй зæгъын æй хъæуы, змæст æмæ хæстон азты нæ республикæйы библиотекæты чингуыты фонд скадавар, фæлæ ныр хъуыддаг хуыздæрырдæм ивын райдыдта.

Ацы бонты æвзæнгты республикон библиотекæйы чингуыты фонд бæрæг фæхъæздыгдæр алыгъуызон чингуытæй. Библиотекæйы тæрхджытыл фæ-зындысты ахæм чингуытæ: «Ирон адæмон сфæлдыстад» -2 томы, «Ирон æмби-сæндтæ æмæ диссæгтæ», ирон-уырыссаг æмæ уырыссаг-ирон дзырдуæттæ, Хаджеты Таймуразы, Икъаты Владимиры, Гуыцмæзты Алешы  – «Ирон литературæйы анталогитæ», Айларты Измаиль –  «Ирон фарн», Джусойты Нафи – «Классикон драматургийы библиотекæ», «Фыдæлты намыс» æмæ «Иры хур ыскасти Нарæй», Хуыгаты Уасил – Равзаргæ уацмыстæ, Медойты Боболкæ – «Ирон æвзаджы лексикæ æмæ фразеологи», «Нарты кадджытæ», Джыккайты Шамиль – «Намыс» æмæ «Изæрмилты кувын», Хуыгаты Сергей – «Нарты фарнæг», Хъазиты Мелитон – «Нæ ис, нæ бис», Бигъуылаты Иринæ – «Рутен Гаглоев. Жизнь и деятельность».

Æвзæнгты республикон библиотекæйы чингуыты фонд ма баххæст уырыссаг фысджыты чингуытæй дæр: Лев Толстой – «Война и мир», «Анна Каренина», Александр Пушкин – «Евгений Онегин», Марк Твен – «Приключения Тома Сойера», Федор Достоевский – «Братья Карамазовы», «Знаменитые люди Кавказа» – автор æмæ аразæг А.А. Бетуганов, Алек-сандр Куприн – «Гранатовый браслет», Дон Р.Р. Толкин – «Властелин колец», Михаил Лермонтов – «Демон», «Сказания о нартах» – ирон æвзагмæ Ю.Лебединскийы тæлмац, афтæ ма Александр Дюмайы – «Сорок пять» æмæ æндæр чингуытæй.

Библиотекæйы директор Тототы Ленæ нын радзырдта: «Æртæ-цыппар азы размæ РХИ-йы Культурæйы министрады кусджытæн фембæлд уыд РХИ-йы Хицауады Сæрдар Хъуылымбегты Доментиимæ. Фембæлды алы æмæ алы фарстытыл æруынаффæ кæныны фæстæ йæм бахатыдысты, цæмæй сын баххуыс кодтаид республикæйы библиотекæты чингуыты фонд баххæст кæнынæн, уымæн æмæ хæстон азты бынтон смæгуыр сты ног чингуытæй. Уый сын сæ куырдиат æнæ хъусдардæй нæ ныууагъта,  фарст аскъуыддзаг кодта æввæрццагæй æмæ ныр цыдæриддæр чингуытæ мыхуыр цæуы Цхинвалы типографы, ома, бынæт-тон рауагъдад цы чингуытæ рауадзы, уыдонæй лæвæрд æрцæуы республикæйы библиотекæтæн дæр. Чингуытæ библиотекæтыл адих кæны РХИ-йы Культурæйы министрады библиотекæты куысты фæдыл сæйраг специалист Дриаты Нателæ. Бирæ хатт нæхæдæг дæр заявкæтæ радтæм Культурæйы министрадмæ уырыссаг зынгæ фысджыты чингуытæ самал кæныны тыххæй æмæ уыдонæн дæр куыд гæнæн фæвæййы, афтæ нын нæ куырдиат æвæрццагæй аскъуыддзаг кæнынц.

Иу ныхасæй, фæстаг азты нæ библиотекæйы чингуыты фонд кæй фæхъæздыгдæр, уый у Хицауады Сæрдар Хъуылымбегты Доменти æмæ Культурæ-йы министрады руаджы æмæ сын уый тыххæй зæгъæм бузныг».

Æвзæнгты библиотекæйы кусджытæ арæх сорганизаци кæнынц алыгъуызон культурон мадзæлттæ, поэзийы изæртæ, конкурстæ, мысæн изæртæ æмæ афтæмæй сæхимæ кæнынц чиныгкæсджыты. Библиотекæты фонд бахъахъхъæнын дæр у ахсджиаг фарст. Бирæ чиныгкæсджытæ ахæссынц чингуытæ, фæлæ сæ фæстæмæ рæстæгыл не ‘рбахæссынц. Ахæм цауты рæстæджы библиотекæйы кусджыты бахъæуы уыдонмæ хæдзæрттæм бацæуыны сæр.

Тототы Ленæ ма куыд загъта, уымæ гæсгæ æвзæнгты библиотекæмæ фылдæр цæуынц хистæр кълæсты ахуыргæнинæгтæ, фæлæ сын æхсызгон у уыцы факт дæр æмæ сæм арæх чиныгагур кæй æрбацæуынц хистæр кары адæм дæр. «Нæ библиотекæйы фонд кæй фæ-хъæздыгдæр, уый хуыздæрæрдæм бандавдзæн чиныгкæсджыты нымæцыл. Ныфс нæ ис, нæ чиныгкæсджытæ бæрæг кæй фæфылдæр уыдзысты, уымæй. Табуафси, æрбацæут нæм», – загъта библиотекæйы директор.

Банысан кæнын мæ фæнды уый дæр, æмæ фæстаг рæстæджы бæрæг æнтыс-тытæ кæй ис, куыд æндæр къабæзты, афтæ культурæйы фадыджы дæр. Стыр-дæр хъусдард здæхт цæуы библиотеæкты куыстмæ дæр, уымæн æмæ чиныг у зонды суадон. Арæзт æмæ цалцæг цæуынц Культурæйы хæдзæрттæ, цæуынц библиотекæтæ. Дæргъæвтин азты дæр-гъы хæстон уавæрты цæргæйæ, ма чи ахъуыды кодтаид æмæ ма не ‘взонг республикæ чингуытæ уадзынхъом фæуыдзæн. Фæлæ, табу Хуыцауæн нæ цард размæ цæуы æмæ нæ ныфс ис, не ‘взонг паддзахадæн ноджы стырдæр æнтыстытæ кæй уыдзæн, уымæй.

Джиоты Екатеринæ

Comments are closed, but trackbacks and pingbacks are open.