22-æм июны уыд Хуссар Ирыстоны Коммунистон партийы 14-æм съезд. Съезды фидар æрцыдис боны фæтк æмæ уый фæстæ Коммунистон партийы уæнгты раз бакæнгæ куысты тыххæй хыгъдон доклад сарæзта Хуссар Ирыстоны Коммунистон партийы сæрдар Коцты Станислав. Райдианы уый банысан кодта, зæгъгæ, абон у зæрдылдаринаг бон, 80 азы размæ райдыдта Стыр Фыдыбæстæйон хæст, кæцы хæсты æппæт Советон Цæдисы адæмтимæ хъæбатырдзинад æвдыстой Хуссар Ирыстоны æмбæстæгтæ дæр.
Нæ адæм ма июны мæйы æрымысынц æндæр æнамонд хабар дæр, 1920 азы гуырдзиаг адæм Хуссар Ирыстоны зынг æмæ арты бын куы фæкодтой, дзæвгар адæм куы фæмард, мингай адæймæгты райгуырæн бæстæйæ куы фæсырдтой, уыцы бон. Сæ номыл арæзт цы цыртытæ æрцыд, уыдонмæ дарæм нæ хъус, сæ алыварс сын ссыгъдæг кæнæм, бакæнæм реставрацион æмæ цалцæггæнæн куыстытæ.
Уый фæстæ съезды хайадисджытæ, æдзæмæй алæугæйæ, ссардтой уыцы рæстæджыты фæмардуæвæг æмбæстæгты рухс нæмттæ.
Дарддæр Коцты Станислав банысан кодта, зæгъгæ, 1992 азы Уæрæсе, Беларус, Украинæ æмæ Хуссар Ирыстоны Коммунистон партитæ цы цæг, иудзинад æмæ æнгомдзинад сарæзтой, уым абон ис 14 бæстæйы Коммунистон партитæ. Кæд арæх нæ, уæддæр рæстæгæй-рæстæгмæ се скондмæ бацæуынц æндæр бæстæты Коммунистон партитæ. Рæстæгæй-рæстæгмæ цы фембæлдтæ æмæ конференцитæ фæуадзынц, уым Хуссар Ирыстоны коммунисттæ дæр фæисынц хайад.
Уыимæ ма раныхасгæнæг банысан кодта, зæгъгæ, раздæры Советон Цæдисы Коммунистон парти цы мадзæлттæ æмæ бæрæгбонтæ нысан кодта, уыдон абон мах кæнæм дарддæр. Фылдæр кæнæм нæ рæнхъытæ, кусæм фæскомцæдисы æмæ пионерон организациты рæнхъытæ фæфылдæр кæныныл дæр. Нæ фæндтæ æмæ хъуыдытæ дардыл уыдысты, фæлæ нæ сæ сæххæст кæнынæн бахъыгдардта, ацæугæ азы дунейыл чи апырх, уыцы хæцгæниз. Уымæ нæ кæсгæйæ, Цæгат Кавказæй æрластам цалдæр тоннæйы ссад æмæ йæ байуæрстам нæ республикæйы дæрддаг хъæуты цæрджытыл.
Банысан кæнын мæ фæнды, уый дæр, цы Парламент æмæ Президент равзæрс-там, уыдон куыстмæ цахæмфæнды цæстæнгасæй ма кæсæм, сæ куыстæн сын цахæмфæнды нысаниуæг ма дæттæм, уæддæр раст нæу æмæ сæ хъыгдарæм, ныхдуртæ сын æвæрæм сæ хæстæ дарддæр æххæст кæнынæн. Мах хъуамæ архайæм æмæ тырнæм, цæмæй сын уæм æххуыс, цы рæстæг сын ис, уый бакусой кæронмæ.
Дунейы абоны уавæры тыххæй дзургæйæ та Станислав банысан кодта, зæгъгæ, дунеон уавæр абоны хуызæн æндыгъд никуыма уыд. Хорз не сты Гуырдзыстон æмæ Уæрæсейы ахастытæ дæр. Ацы фарст та мах æндавы тынгдæр. Уымæн æмæ исты быцæудзинæдты рæстæджы стырдæр уæз æрцæудзæнис нæ бæстæ æмæ нæ адæмыл.
Уый фæстæ съезды делегатты раз сæ хыгъдон докладтимæ раныхас кодтой горæт Цхинвал, Цхинвалы, Дзауы æмæ Знауыры райдиан партион организациты фыццаг секретартæ Габуты Ульянæ, Дудайты Альберт, Магкоты Эльвирæ æмæ Цхуырбаты Сослан. Уыдон сæ раныхæсты дзырдтой, куыд цухдзинæдтыл, афтæ рацæугæ рæстæджы сæ къухты цы æнтыстытæ бафтыдис, уыдоныл дæр.
Кæронбæттæны съезд сусæг хъæлæсæппæрстæй сфидар кодта Централон комитет æмæ Контролон-ревизион къамисы уæнджы ног сконд.
Гæззаты Иван
Comments are closed, but trackbacks and pingbacks are open.