Цахæмфæнды хæсты дæр знаг йæ амæттагæн бахъавы йæ риссагдæр æмæ ахсджиагдæр бынæттæм. Ирон адæмæй ма 20-æм азы геноцидæй чи аирвæзт, уыдоны та Советон Гуырдзыстон репресситы фæрцы скуынæг кæнынмæ куы æрхъавыд, уæд фыццаграды бавнæлдта, ирæттæй сæ ныхмæ барадон æгъдауæй чи æрлæууыдаид, уыдонмæ. Нæ республикæйы Генералон прокуратурæйы сайтыл ис, зæрдæ сæ бакæсгæйæ кæмæн ныккæрзы, ахæм æрмæджытæ, «Мысынады чиныг», зæгъгæ, ахæм номимæ. Уым ис, советон системæ авд дуары æхгæдæй кæуыл дардта, ахæм, документалон æгъдауæй фидаргонд факттæ.Уыдонæн дæр уыд сæхи нæмттæ æмæ биографитæ. Бирæтæн дзы уыд бинонтæ, хъомыл кодтой хъæбултæ æмæ хъæбулы-хъæбултæ. Уыдонæй алкæй дæр фæндыд амонд Ирыстонæн, сæ туг æмæ се стæгæн, се ‘ввахс адæмæн, зæххыл адæймаджы цардæй цæрын. Фæлæ иу дуджы уыдонæй алкæй цард дæр цæхгæр фæивта – иутæ калдысты ингæнтæм, сæ сæртæ æхст, афтæмæй, иннæтæ сæфтысты ахæстæтты ныккæндты, сындз телæй æхгæд бынæтты, тардтой сæ лагертæм æмæ уым фестадысты лагерон рыг.

1990-2008 азты Гуырдзыстоны расидгæ хæсты трагикон цауты тыххæй мысынад, дыууынæм æнусы æртынæм азты терроры тыххæй мысынад æмæ йæ тæккæ карзы – 1937-1938 азты, ирон адæмы мысынады ныууагътой арф æмæ трагикон фæд, куыд ирон адæммæ ахасты геноцидон политикæйы иу фæзынд, афтæ.

Цас уыдысты уыдон, репресситæ æмæ æнæзакъондзинады амæттæгтæ? Цыфæнды нымæц дæр, æгæрыстæмæй, нæ ныры къаннæг республикæмæ ахасты дæр, нæ уыдзæн бæрæг-бæлвырд. Репрессигонд чи æрцыд, уыдоны нымæц иуæй-иу иртасджыты нымадæй  у 400 адæймагæй фылдæр, 100 мин адæймаджы бæрц, иумæйаг нымæцæй.

Республикæ Хуссар Ирыстоны Централон паддзахадон архивы æрмæджытæм гæсгæ дæсгай адæймæгтæ ахст æмæ хыгъдгонд цыдысты Хуссар Ирыстоны арæнтæн æддейæ, хуссарирыстойнаг статистикæмæ æнæбахаугæйæ, æмæ афтæмæй, Хуссар Ирыстоны репрессигонд адæмы иумæйаг нымæц хизы цыппарсæдæ адæймагæй уæлæмæ. Паддзахадон архивы уæвæг «1937-1938 азты репрессигонд адæмы номхыгъд»-ы ис 373 адæймаджы.

ХХ æнусы 30-æм азты репресситы историимæ хæрзчысыл зонгæ чи у, уыдонæн дæр зындгонд у, репресситæн кæй уыд политикон нысан, хаттæй-хатт сын кæй лæвæрдтой национ нысаниуæг. Гуырдзыстоны Мидхъуыддæгты адæмон къамисариаты бардзырдтæм  гæсгæ,  куынæггæнæг бюрократи æмæ статистикæйы раиртæстгонд зонæнты куыд зыны, афтæмæй ирæттæ æмæ абхазæгты ныхмæ репресситæн уыд уæлдай æгъатырдзинады характер Гуырдзыстоны иннæ районтимæ абаргæйæ. Стыр террорæй Ирыстон баййæфта иууыл тыхджындæр цæф, æмæ хуссайраг бынæттон уавæрыл куы дзурæм, уæд Хуссар Ирыстоны цæрджытæй репрессигонд чи æрцыд, уыдонæн практикон æгъдауæй сæ 99 проценты уыдысты ирæттæ. Ирæттæ æмæ абхазæгтæ потенциалон æгъдауæй уыдысты уæлбикъон Гуырдзыстоны титулон нацийы ‘рдыгæй дæлдзиныг æмæ ассимиляцийы объект – хъуамæ этапгай скуынæг уыдаиккой, кæнæ цæхгæр фæивтаид сæ туг, се стæджы сконд.

1937-1938 азты Гуырдзыстоны уагъдцæуæг репресситæн сæ нысан уыд æнæгуырдзиаг адæмты физикон æгъдауæй скуынæг кæнын æмæ гуырдзиаг нацийы уæлбикъон скæнын, ирон этнос ныцъист кæнын, ирон культурæйы хæдгъуыздзинад скуынæг кæнын, цæмæй ист æрцæуа сæ автономи, æмæ ма йын уа æрмæстдæр символикон нысаниуæг, æмæ уый ахъаз кæна гуырдзиаг нацийы номæй Гуырдзыстоны уæлбикъондзинадæн. 30-æм азты гуырдзиаг национализмы ноджы рагондæр дугты традицитыл æнцой кæнгæйæ, Тбилисы хицæуттæ уагътой националон ны-саниуæгмæ гæсгæ дискриминацийы æвзæр политикæ, хуссайраг ирæттæй уæлдай национ активон-дзинад чи æвдыста, уыдоны физикон æмæ социалон æгъдауæй скуынæг кæныны нысанмæздæхт политикæ. Цæмæй цасдæрбæрцæй ирон адæмы хуссайраг хайы сæрымагъзæй ист æрцæуа (куынæггæнæг органты профессионалон æвзагæй афтæ хуынд) хъуыдыхъомдзинад, цæмæй цыфæнды хуызы ныхмæлæууынады æнкъарæн дæр мард æрцæуа адæмы удысконды.

Кæмæдæриддæр ирон националон акти-вондзинад уыд, уыдон практикон æгъдауæй иууылдæр куынæг æрцыдысты гуырдзиаг Мидхъуыддæгты адæмон къамисариаты къухæй, фæмардуæвджыты бæрæг фылдæр хай уыдысты бæрзонд ахуырдзинадимæ  курдиатджын адæм; фыццаградон цæф сæмбæлд уæлдай курдиатджындæртыл, афтæ ма арæх репрессигонд цыдысты сæ бинонтæ æмæ æввахсдæр къабæзтæ. Репресситы бирæнымæц иртасджытæ æмæ æвдисæнтæ нысан кæнынц, «уыцы хаймæ хауæг репресситы амæттаг чи фæцис, уыдонæн  æндæр реалон ахоссæгтæй бамбарынгæнæн кæй нæй, уымæн æмæ репрессигонд æрцæуæг адæмы биографитæ уыдысты коммунизмы идейæтыл, социалон рæстдзинад, æмæ активон социалон арæзтадыл æнувыддзинад, хисæрмагонд хæрзæгъдаудзинад æмæ намыс, адæмы хорзæх æмæ уарзондзинадыл дзурæг, æмæ амонынц чысылнымæц ирон элитæйы, ÆПК (б) службæгæнджытæ æмæ сæ бинонты куынæггæнæг аппараты нысанмæздæхт куынæгкæнынадмæ, цæмæй ныбиноныг уа ирон этносы ныллæг æмвæзадыл социалон статус. Бирæбæрцæй, кæд сæйраджы сæйраг нæ, уæддæр 1930 азты репресситæ æхсæнады хъуыдымæ гæсгæ æмбæрстгонд цæуынц ахæм хуызы, куыд Гуырдзыстоны ССР партион æмæ куынæггæнæг органтæм баирвæзæг гуырдзиаг националистты ‘рды-гæй мастисæн уыцы ирон национ змæлды активистæм ахасты, кæцытæ æххæст кодтой националон-ирвæзынгæнæг тох,  сæ бартæ сын чи дæлдзиныг кодта, уыдоны ныхмæ, нырма гуырдзиаг æлдæртты, фæстæдæр та Гуырдзыстоны официалон хицæутты ныхмæ, 1917-1922 азты гуырдзиаг къухдариуæгады рдыгæй фидарæрцæуæг контролкæнынады ныхмæ, Ирыстоны хус-сайраг æмæ цæгатаг хæйттыл барæй адих кæныны æмæ хуссар хайы Гуырдзыстоны ССР юрисдикцимæ бакæныны ныхмæ, кæцытæ домдтой Хуссар Ирыстоны Уæ-рæсейы скондмæ бакæнын æмæ Цæгат Ирыстонимæ баиу уæвын, хастой аккаг хай-бавæрд Хуссар Ирыстоны автономон областы рæзты хъуыддагмæ.

Уæлдæр загъд цы рцыд, уыдоныл фæндвидарæй баууæндæн ис репрессиæрцæуджытæй алкæй тыххæй дæр анализ кæныны фæрцы. Репресситы интенсивондзинады къæпхæнæн саргъ кæныны тыххæй статис-тикон фæрæзтæй дæр куы спайда кæнæм, бæлвырддæр зæгъгæйæ, репресситы чи бахауд, уыдонæн сæ 95 проценты нæлгоймæгтæ кæй уыдысты æмæ уыдонæн сæ астæуккаг кар 20 азæй 60 азмæ кæй уыд, уый хъусдардмæ куы райсæм, уæд нæ къухы бафтдзæн ахæм зонæнтæ, кæцыты иртасджытæ нымайынц катастрофæйыл.

Ацы мысынады чиныг уæлдай хатт фидар кæны Хуссар Ирыстоны ХХ æнусы 30 азты репресситы бæрæг-бæлвырд хайы нысан-мæздæхт характеры тыххæй зындгонд хатдзæг. Хуссарирыстойнаг бæрзонд рангы прокурортæ бахаудысты репресситы æмæ сæ Гуырдзыстоны Мидхъуыддæгты адæмон къамисариаты паддзахадон управлени ахста антисоветон архайды тыххæй, кæд Хуссар Ирыстоны Советон хицауад сфидар кæныны хъуыддаджы активон хайадисджытæ уыдысты, уæддæр. Уыдонæн сæ биографитимæ, сæ историон æвдисæндартимæ куы базонгæ уай, уæд уайтагъд бæрæгæй разындзæн, сæ нæмтты нысаниуæг куыд бæрзонд уыд Ирыстоны дыууæ хайы дæр.

Хуссар Ирыстоны Советон хицауад сфидар кæныны активон хайадисджытæ тох кодтой хуссайраг ирæтты национ хæдгъуыздзинады сæрвæлтау, æххæст кодтой националон-сæрибаргæнæг тох, сæ бартæ сын чи дæлдзиныг кодта, уыдоны ныхмæ, нырма гуырдзиаг æлдæртты, фæстæдæр та Гуырдзыстоны официалон хицæутты ныхмæ, 1917-1922 азты гуырдзиаг къухдариуæгады рдыгæй фидарæрцæуæг контролкæнынады ныхмæ, Ирыстоны хуссайраг æмæ цæгатаг хæйттыл барæй адих кæныны æмæ йын йæ хуссар хайы Гуырдзыстоны ССР  юрисдикцимæ бакæныны ныхмæ, кæцытæ домдтой Хуссар Ирыстоны Уæрæсейы скондмæ бакæнын æмæ Цæгат Ирыстонимæ баиу уæвын, хастой аккаг хайбавæрд Хуссар Ирыстоны автономон областы рæзты хъуыддагмæ.

Кæй зæгъын æй хъæуы, гуырдзиаг пад-захад, куыд меньшевикты рæстæджы, аф-тæ большевикты рæстæджы дæр, уыдта ирон активистты æмæ сæ фарсхæцджыты дæр, уыдта сын сæ иудзинадмæ тырнындзинад æмæ сæ нымадта æгъатыр знæгтыл, йæ зæрдыл дардта 1920 æмæ 1925 азты, кæцы рæстæджы Хуссар Ирыстон арæзта, «стыр-гуырдиаг арæзтады» плæнттæн стыр тæс-сагдзинад чи хаста, ахæм бафæлвæрдтытæ – тбилисаг контролы бынæй раирвæзын æмæ дихгонд райгуырæн бæстæйы иудзинады тыххæй. Æртынæм азты репресситы уæрæх-дзинадæй спайда кæнгæйæ гуырдзиаг хицæуттæ милмæ систой æмæ комкоммæ ныц-цавтой растæндæр ирон националон змæлды активистты, ахæмты фæдыл зилгæйæ – чидæриддæр Хуссар æмæ Цæгат Ирыстоны баиу кæныны фарст æвæрдта, чидæриддæр хайад иста иумæйагирон мадзæлтты, ар-хайдта мадæлон æвзаджы рæзтыл, тох кодта ирон  скъолатæ сæхгæнын æмæ национ культурæ скуынæг кæныны ныхмæ, командон фæткы хуызы ирон фыссынад гуырдзиаг альфавитмæ куы ракодтой, уæд, цæмæй реализаци æрцыдаид уыцы къордты УСФСР цæрæг абазинтæ æмæ ирæттæй ахицæн кæ-ныны политикон план, бацæттæгонд æрцы-даид систематикон ассимиляци.

Уымæ гæсгæ нæ фыдыбæстæйон прокуратурæйы историйы фыццаг сыф кæй кадджын нæмттимæ баст у, уыцы хуссарирыстойнаг прокуратурæйы къухдариуæггæнджыты сконды астæумагъз, афтæ Хуссарирыстойнаг революционерты æппæт плеядæ дæр Гуырдзыстоны Мидхъуыддæгты адæмон къамисариаты æрымысгæ хъуыддæгтæм гæсгæ бахаудысты репресситы, куыд антисоветон архайд кæнын æмæ æрымысгæ  национализмы тыххæй, реалонæй та 1921 азы регулярон æгъдауæй иу автономон республикæйы арæнты Хуссар æмæ Цæгат Ирыстоны баиу кæныныл кæй архайдтой, уый тыххæй.

Хуссарирыстойнаг прокуратурæйы йæ фæзындæй фæстæмæ цыдæриддæр прокурортæ куыста, уыдон уыдысты сæ фæлтæр-ты хсæн нымад адæм, уæззау рæстæджытæ чи бавзæрста æмæ уыцы рæстæджыты чи бахсыст, ахæмтæ. Хуссарирыстойнаг прокуратурæйы райгуырд æмæ рæзт, куыд «революцион закъондзинады рухс» (растæндæр – Революцион), афтæ æнæ фæхицæн кæн-гæйæ баст у номдзыд гоймæгтимæ, хæстон командиртимæ, кæцытæ активон хайад ис-той 1917-1921 азты революцион æмæ партизанон змæлдты, Хуссар Ирыстоны сове-тон хицауад сфидар кæныны хъуыддаджы: Гæдиаты Никъала Юрийы (Секъайы) фырт, Абайты Владимир Михаилы фырт, Гояты Михаил Григолы фырт, Бахъаты Уасил Барисы фырт, Гасситы Никъала Максимы фырт, Плиты Олгъа Семены чызг æмæ ирон ныхмæлæуды хъæбатыр Санахъоты Мате Къыбылы фырт. Историон цаутимæ æмбаст чи уыд, уыцы прокурорты биографион факттæ, æцæгæйдæр, уникалон уыдысты. Областы фыццаг прокурор Гæдиаты Никъала, куыд гоймаг, афтæ сырæзт ирон литературæйы бындурæвæрджыты хъуыстгонд бинонты æмæ æнусы тæккæ райдианы ирон сфæлдыстадон интеллигенцийы корифейты хсæн, стыр хайбавæрд бахаста уыцы азты прокуратурæйы интелектуалон потенциал сырæзын кæнынмæ.

Фыццаг бонтæй фæстæмæ ног прокуроры бахъуыд йæхи сæрмагонд цард ферох кæныны сæр. Уыд, сæ кæрон дæр кæмæн нæ зынд, уый бæрц кусинæгтæ. Зындзинæдтæй нæ тæрсгæйæ Гæдиаты Никъала уайтагъд фæцалх куыстыл. Йæ пркуророн архайд æмæ къахдзæфты никуы фæзынд ныхмæвæрддзинæдтæ йæ хæстæ æмæ хæрзæгъдаудзинады хсæн. Æмæ уыцы иугъæдондзинады Гæдиаты Никъала алы хатт дæр уыдта йæ царды нысан. Хæдбар адæймаг, арæх областы уæлдай вазыгджындæр проблемæтыл ЦÆК-ы уынаффæ кæныны рæстæджы  фидар æмæ принципиалон позицийыл лæуд кæй уыд, уый тыххæй Никъала нæ аирвæзт гуырдзиаг репрессион системæйы цæстныдзæвæнæй, тынг æгоммæгæс, æнæбæсæтгæ фигурæйыл нымад сæм кæй уыд, уымæ гæсгæ æппынфæстаг фæхауæггаг йæ бынатæй, иугæр уыцы заманы прокурорты  хæдбардзинад, фыццаграды процесуалон нæ, фæлæ политикон уыд, уæд ада-гъа æмæ йын уыдаид аирвæзыны фадат, æмæ фæцис Гуырдзыстоны Мидхъуыддæгты адæмон къамисариаты паддзахадон æдасдзинады управленийы амæттаг.

Comments are closed, but trackbacks and pingbacks are open.