Куыдз, дам, хæцаг йе ‘взæр цардæй свæййы… Фæлæ хатгай иуæй-иу куыдзы цæстытæм бакæсгæйæ уый бæрц зонд æмæ æмбарындзинад фендзынæ, æмæ адæймаг дисы бафты. Куыд æмæ кæй бон баци ахæм цæрæгой хæдзарæй расурын. Къæбылайæ йæ хицæуттæм хорз куы каст, хъазынæй дзы куы нæ æфсæстысты, уæд фæстагмæ цы кодтой. Нæ йæ зонæм мах дæр, адæм сæ хæдзарон цæрæгойтыл цæмæн фестырзæрдæ вæййынц, уый.
Азæй-азмæ дзæгъæл куыйты, гæдыты æмæ æндæр цæрæгойты нымæц кæны фылдæр. Бирæ аххосæгтæ ссарæн ис уымæн. Фæлæ сæйрагдæр сты адæм. Растдæр зæгъгæйæ та, сæ зæр-дæты ахасты раив-баив. Хъуыддаг уый мидæг ис, æмæ ахæмты сæ куыйтæ куынæуал фæхъæ-уынц, уæд сæ машинæтыл сæвæрынц æмæ сæ сæ цæрæн бынæттæй дард аппарынц. Аф-тæмæй дзæгъæл куыйты нымæц сбирæ ис æмæ адæймаджы размæ æнæнхъæлæджы куы кæцы къуымæй рагæпп кæнынц, куы – кæцы. Иу дзырдæй, уынгты æдæрсгæйæ ацæуæнтæ нал ис. Куыйтæ сты алыгъуызон низты, уыцы нымæцы æрранизы вирус хæсджытæ дæр.
Куыйтæ тезгъо кæнынц балгай, сывæллæттæн цы хъазæн фæзуæттæ арæзт æрцыд, уым дæр. Тæссаг у сывæллæттыл фæхæцынæй, иннæмæй та стыр тæссаг сты сывæллæтты æнæ-низдзинадæн дæр, хъазæн фæзуаты территори кæй чъизи кæнынц, уый тыххæй. Адæм куыд дзурынц, афтæмæй куыдзы хъуын хъуыры куы аирвæза, уæд уый зынын кæны астма. Куыйты ис æхсынчъытæ æмæ фæзынынц сывæллæтты дæр.
Горæты администрацимæ арæх æрбацæуы хъæстытæ цæрджытæй, райсом раджы æмæ изæрыгæтты куыйтæ æнæнхъæлæджы адæмыл куыд æрхъула кæнынц, уый тыххæй. Вæййы ахæм цаутæ дæр, æмæ хæцгæ дæр фæкæнынц адæймагыл.
Фæлæ æхсызгон у, дзæгъæл куыйты чи æмбырд кæны æмæ сæм чи зилы, ахæм хъæппæрисджын къорд нæ горæты кæй фæзынд, уый.
Ныртæккæ куыйтæ æмæ гæдытæм кæсынц æмæ зилынц хи фæрæзтæй. Кæмæн куыд йæ бон у, афтæмæй сæм фæкæсынц сæ зонгæтæ, æмæ цæрæгойтæн тæригъæд чи кæны, уыдон дæр. Фæлæ уый бирæйы фаг нæ кæны.
«Фæндид нæ, паддзахадон органты ‘рдыгæй нæм исчи куы фæкæсид, уый. Зæххы хай, кæнæ нын бæстыхай куы радих кæниккой, уæд мах бирæ къæбылатæн æмæ гæдытæн баххуыс кæниккам. Нымад куы уа муниципалон куыстуатыл, уæд махæн дæр æнцондæр уаид. Зивæг нæ кæнæм цæрæгойтæм зилын æмæ сæ сыгъдæг кæнынмæ. Кæниккам сын стерилизаци дæр, æмæ уæд бынтон дæр никæмæн уыдзысты тæссаг. Ничиуал сæ тæрсид, стæй цæрæгойтæ сæхæдæг дæр мæстыгæр нæ уаиккой. Ныртæккæ нæ бон цас у, уыйбæрц æххуыс кæнæм, адæймаджы аххосæй хъыгдард чи баййæфта кæнæ чи фæрынчын, уыцы куыйтæн. Базилæм сæм, ссыгъдæг сæ кæнæм. Фæлæ нын хорз фадæттæ куы уаид, уæд не ‘ххуыс уаид бирæ фылдæр», — загъта волонтертæй сæ иу.
Æмæ чи зоны хæстæгдæр рæстæг Цхинвалы фæзына ног приют – æххуыс кæй хъæуы, уыцы цæрæгойтæн.
Дриаты Лейла
Comments are closed, but trackbacks and pingbacks are open.