Цæгат Ирыстоны

      ХУЫЗДÆР  НОГАЗОН  ФÆЛГОН

Æрвылаз традицион чи сси, уыцы бæрæгбоны конкурс та расидт Дзæуджыхъæуы бынæттон администраци æртæ номинацийæ: «Коммерцион структурæты хуыздæр ногазон фæлгонц», «Бирæуæладзыгон хæдзæртты хуыздæр ногазон фæлгонц» æмæ «Хисæрмагонд хæдзæртты хуыздæр ногазон фæлгонц».

Конкурсмæ цы куыстытæ бавдисой, уыдонæн жюри аргъ кæндзæн сæ хæрзхъæддзинад æмæ дизайнæн.

Ацы ногазон конкурсæн ис стыр нысаниуæг. Цæрджытæй алчи дæр тырны йæ хæдзар, йæ кæрт бафснайын, саив кæныныл. Афтæ коммерцион структурæтæ дæр. Конкурс фадат ратдзæн адæмæн канд бæрæгбоны равг скæнынæн нæ, фæлæ горæт, сæ хæдзæрттæ, сæ куыстуæттæ саив кæнынæн дæр.

Ацы мæйы кæрон сæрмагонд къамис аргъ скæндзæн сыгъдæг, хуыздæр фæлгонцгонд бæстыхæйттæн. Уæлахиздзаутæ райсдзысты æхцайы премитæ.

Уымæй дарддæр Ногазмæ цæттæ цæуынц сывæллæтты хиирхæфсæн фæзтæ. Уыдоны уыдзæн алыхуызон конкурстæ, концерттæ, мастер-класстæ… Парчы Митын Дадайæн арæзт цæуы сæрмагонд «хæдзар». Уыдзæн сувенирты æмæ хæлцы армукъатæ. Ныртæккæ уынгты æмæ бирæуæладзыгон хæдзæртты къултыл æвæрд цæуынц электрон цырæгътæй фигурæтæ. Цæттæгæнæн куыстытæ хъуамæ фæуой декабры æмбисмæ.

Администрацийы разамынды хъуыдымæ гæсгæ, адæм дæргъвæтин рæстæджы тынг бафæлладысты низимæ баст карантины уавæртæй æмæ сын скæнын хъæуы, фадат цас амоны, уымæй бæрæгбоны равг.

ТАКСИТÆ – ДОХТЫРТÆН  ÆХХУЫСМÆ

Акци «Мы вместе»-йы фæлгæты «Иугонд Уæрæ-се» дарддæр архайы медицинон уагдæттæн ахадгæ æххуыс бакæныныл. Уый тыххæй бахатыдысты транспорты министрадмæ, цæмæй сын баххуыс кæной медицинон куыстуæтты рæстæгмæ транспортæй сифтонг кæнынæй.

Бæрæг куыд у, афтæмæй вирусæй рынчынтæ кæнынц фылдæрæй-фылдæр. Нал дæр дохтыртæ фаг кæны, нал дæр, дохтырты рынчынтæм чи хæццæ кæна, ахæм транспорт, кæд алы поликлиникæмæ дæр цалдæргай машинæтæ ис, уæддæр. Хатт, дохтыртæм æххуысмæ чи фæдзуры, уый æртыгай бонтæ æнхъæлмæ кæсын бахъæуы.

Сæудæджерад æмæ транспорты министр Бурдзиуты Валери куыд загъта, афтæмæй «Иугонд Уæрæсе»-йы куырдиат æнæмæнгæй æххæстгонд æрцæудзæн. Æмæ фæсидт хисæрмагонд такситы фирмæтæм, цæмæй рынчынтæм дохтырты лæвар ласой.

Ныридæгæн уал дохтырты фарсмæ æрбалæууыдысты «Такси Онлайн» æмæ «Яндекс Такси»-йæ цалдæр машинæйы. Уыдон фидаргонд æрцыдысты 1-æм, 4-æм æмæ 7-æм поликлиникæтæм. Гæнæн ис æмæ арфæйаг хъуыддагмæ æрбаиу уой такситы иннæ фирмæтæ дæр.

Уымæй дарддæр, дохтыртæм телефонæй зын бахауæн кæй сси, уый нымайгæйæ арæзт æрцыд нымæцон сервиз «Залина». Сæрмагондæй у ацы низы тыххæй арæзт.  Номыр 122 куы сисай, уæд райсдзынæ коронавирусимæ баст алыхуызон информаци: вирусы диагностикæ, дохтырмæ дæхи ныффыссын кæнæ йæм хæдзармæ фæдзурын, анализтæ раттын, рынчыны рæстæджы куыстимæ баст фарстатæ лыг кæнын, пособийы тыххæй бафæрсын…  Æппæт фарстытæн дæр райсдзынæ бæлвырд дзуапп. Уый у уæрæх социалон нысаниуæджы проект. Афтæ арæзт у æмæ йын йæ куыст уынынц республикæйы, стæй федералон хицауад дæр. Ахæм сервизтæ арæзт æрцыд Уæрæсейы алы регионы дæр.

Нæ уацх.