Кусæгон балц – Луганскы Адæмон Республикæмæ

Цæмæй Республикæ Хуссар Ирыстон æмæ Луганскы Адæмон Республикæйы ‘хсæн арæзт æрцыдаид экономикон æмгуыстады тыххæй сразыдзинад, уый тыххæй Хуссар Ирыстоны делегаци РХИ-йы Экономикон рæзты министр Кокойты Геннадийы сæргълæудæй кусæгон балцы уыд Луганскы Адæмон Республикæйы.

Хуссарирыстойнаг делегацийы  йæхимæ райста Луганскы Адæмон Республикæйы сæргълæууæджы хæстæ æххæстгæнæг Леонид Пасечник.

Хуссарирыстойнаг фарсы æрдыгæй химæрайсты хайад райстой Хуссар Ирыстоны Экономикон рæзты министр Кокойты Геннади, йæ хæдивæг Козаты Роин æмæ Луганскы Адæмон Республикæйы Хуссар Ирыстоны рæстæгмæ æууæнкджын минæвар Хъараты Сослан. Луганскы Адæмон Республикæйæ та дзы уыдысты Луганскы Адæмон Республикæйы Фæсарæйнаг хъуыддæгты министры хæстæ æххæстгæнæг Владислав Дайнего, йæ хæдивæг Анна Сорока æмæ Экономикон рæзты министр Елена Костенко.

Кокойты Геннади куыд банысан кодта, афтæмæй ведомствойы минæвæрттæ республикæйы уыдысты 2017 азы æмæ хайад райстой II Экономикон форумы æмæ адæмон хæдзарады æнтыстыты равдыст «ВДНХ-2017»-ы. «Республикæ Хуссар Ирыстоны фæнды Луганскы Адæмон Республикæимæ йæ экономикон ахастытæ райрæзын кæнын машинæарæзтады, аграрон комплексы æмæ туризмы фадыджы», – банысан кодта Кокойты Геннади.

Хуссар Ирыстоны Экономикон рæзты министрады сæргълæууæг радзырдта, форумы рæстæджы скъуыддзаг кæй æрцыд дыууæ республикæйы экономикон фадыджы æмгуыстады тыххæй сразыдзинады проект бацæттæ кæнын.

Луганскы Адæмон Республикæйы сæргълæууæджы хæстæ æххæстгæнæг бузныджы ныхæстæ загъта Хуссар Ирыстоны къухдариуæгады æмæ адæмы адресыл, сæ зын рæстæджы – украинаг агрессийы рæстæджы сæ фарсмæ кæй балæууыдысты æмæ сын сæ хæдбардзинад кæй банымадтой, уый тыххæй.

«Мæн уырны, экономикæйы фады-джы æмгуыстады тыххæй сразыдзинадыл къухты æрфыст у нæ ахастыты фыццаг къахдзæф. Фæндвидар дæн, ацы сразыдзинад нын фадат кæй рат-дзæн, æрмæст нæ экономикæ сæндидзын кæнынæн нæ, фæлæ æндæр фадгуыты, æмгуыстад æмæ æмархайд сцырын кæнынæн дæр», – банысан кодта Леонид Пасечник.

Йæ рады Кокойты Геннади куыд загъта, афтæмæй Луганскмæ сæ балц у дыууæ паддзахады къухдариуæгады политикæйы логикон фæстиуæг, уый ноджыдæр иу æвдисæн у дыууæ республикæйы æмгуыстады æнæфæивгæ курсæн.

Экономикæйы фадыджы ацы сразыдзинад у фыццаг къахдзæф æппæт фадгуыты фæстиуæгджын æмгуыстады тыххæй.

Хуссар Ирыстоны Экономикон рæзты министры хæдивæг Козаты Роин дæр бузныг загъта Луганскы Адæмон Республикæйы къухдариуæгадæн, рæдауæй сæ кæй райста, уый тыххæй æмæ банысан кодта, зæгъгæ, Хуссар Ирыстоны къухдариуæгадæн дæр æхсызгон уыдзæн Хуссар Ирыстоны Луганскы Адæмон Республикæйы сæргълæууæджы хæстæ æххæстгæнæджы фенын. Уыцы ныхæстæн дзуаппæн Леонид Пасечник Луганскмæ фæхуыдта Республикæ Хуссар Ирыстоны Президент Бибылты Анатолийы.