В. Путин йæ къух æрфыста Хуссар Ирыстонимæ æфсæддон сразыдзинады ратификацийы тыххæй закъоныл

Уæрæсейы Федерацийы Президент Владимир Путин йæ къух æрфыста Хуссар Ирыстоны Гарзджын тыхты хицæн дæлхæйтты Уæрæсейы Федерацийы Гарзджын тыхты скондмæ бакæныны фæткы тыххæй Уæрæсейы Федераци æмæ Республикæ Хуссар Ирыстоны ‘хсæн сразыдзинады ратификацийы тыххæй федералон закъоныл. Уый тыххæй хъусын кæны Уæрæсейы паддзахады сæргълæууæджы официалон портал.

Бæрæг куыд у, афтæмæй дыууæ паддзахады ‘хсæн ацы сразыдзинадыл къухтæ æрфыстæуыд 2017 азы 31 марты Æмцæдисад æмæ интеграцийы тыххæй бадзырды фæлгæтты.

2017 азы 21 июлы документ сратификаци кодта Республикæ Хуссар Ирыстоны Парламент, 2018 азы 24 январы æнгæс уынаффæ райста Уæрæсейы Федерацийы Паддзахадон Думæ. Къуырийæ къаддæр æмгъуыдмæ  31 январы сразыдзинады хорзыл банымадта УФ Федералон æмбырд æмæ йæ къух æрфыссынмæ барвыста Уæрæсейы Президентмæ.

Сразыдзинады нысан æрцыдысты, Хуссар Ирыстоны æмбæстæгтæй Уæрæсейы Федекрацийы æмбæстагдзинад кæмæ ис, РХИ-йы æфсæддон къамисариаты хыгъды чи лæууынц æмæ дыууæ паддзахады гарзджын тыхтæй сæ иуы чи баслужбæ кодта, уыдон контрактмæ гæсгæ Уæрæсейы Федерацийы æфсады скондмæ райсыны фæтк.

Уыдон сæхи фæндонмæ гæсгæ дарддæр службæ кæнынмæ æрвыст цæудзысты Хуссар Ирыстоны территорийыл дислокацигонд  уæрæсейаг æфсæддон  базæмæ.

Уæрæсейы Федерацийы Гарзджын тыхты сконды æфсæддон службæйы тыххæй контракт аразгæйæ, уыцы æмбæстæгтæ хъуамæ сæрибар æрцæуой Республикæ Хуссар Ирыстоны Хъахъхъæнынады министрады æфсæддон службæйæ. Уыдон дарддæр службæ кæндзысты уæрæсейаг закъонмæ гæсгæ. Уымæй дарддæр, сразыдзинадмæ гæсгæ, дыууæ бæстæйы гарзджын тыхтæй иуы чи баслужбæ кодта, уыцы æмбæстæгтæ сæрибар цæуынц иннæ бæстæйы гарзджын тыхты æфсæддон службæмæ æрсидтæй. Сразыдзинадмæ гæсгæ бæстонгонд цæуы, Республикæ Хуссар Ирыстоны Гарзджын тыхты чи баслужбæ кодта, уыцы  æмбæстæгты æфсæддон чинты банымайыны фарст дæр.

Сразыдзинады дзырдæуы, ацы документы фæлгæтты цы информаци лæвæрд цæуы, уый бахъахъхъæныныл дæр.

Æрæджы Уæрæсейы Федерацийы Хъахъхъæнынады министр Сергей Шойгу куыд бамбарын кодта, афтæмæй  сразыдзинад «бандавдзæн ацы регионы æдасдзинад дарддæр сфидар кæныныл, æмæ, кæй зæгъын æй хъæуы, уый уыдзæн ноджы иу фактор, цæмæй æппындæр макæмæ сæвзæра  хæстон архадтытæ ногæй райдайын, кæнæ 2008 азы цаутæ сфæлхат кæныны хъуыды», – банысан кодта Сергей Шойгу.

Хуссар Ирыстоны Хъахъхъæнынады министры хæстæ æххæстгæнæг Гассеты Ибрагим йæ рады амæйразмæ фехъусын кодта, зæгъгæ, сразыдзинадыл къухтæ æрфыстæн ис ахсджиаг нысаниуæг. Йæ ныхæстæм гæсгæ,  документ цæттæ кæнгæйæ, уæрæсейаг коллегæты æрдыгæй «стыр куыст бакондæуыд, æппæт фарстаты тыххæй дæр ссардæуыд компромисстæ». Ацы сразыдзинады руаджы Хуссар Ирыстон  «ноджы тынгдæр сфидар кæндзæн паддзахады хъахъхъæнынад æмæ æдасдзинад,  уавæртæ сараздзæн дыууæ бæстæйы хъахъхъæнынады ведомствоты активон æмархайдæн», – банысан кодта Гассеты Ибрагим.

Хъахъхъæнынады министрады сæргълæууæг  бамбарын кодта, зæгъгæ, ратификацион грамотатæ кæрæдзимæ радтыны фæстæ æртæ мæйы æмгъуыдмæ Хуссар Ирыстоны бакуыст æрцæудзæн РХИ-йы Гарзджын тыхты ног организацион-штатон структурæ.

«Ууыл æруынаффæ кæндзысты уæрæсейаг фарсимæ æмæ йæ сфидар кæндзæн Хуссар Ирыстоны Президент. Уымæй æхсæз мæйы фæстæ  та  рахиздзыстæм ног организационштатон структурæмæ», – загъта хъахъхъæнынадон ведомствойы сæргълæууæг.

«Æппæт фарстаты фæдыл дæр консультацитæ цæуы  уæрæсейаг фарсимæ», – банысан кодта Гассеты Ибрагим.