Республикæ Хуссар Ирыстон æмæ Луганскы Адæмон Республикæйы Генералон прокуратурæты сæргълæуджытæ сæ къухтæ æрфыстой Æмкуысткæнынады тыххæй сразыдзинадыл.

Хуссар Ирыстоны æрдыгæй сразыдзинадыл йæ къух æрфыста Генералон прокурор Дзæгъиаты Уырызмæг, Луганскы Республикæйы æрдыгæй та – Генералон прокуроры хæстæ æх-хæстгæнæг Сергей Горенко.

Документыл къухтæ æрфыссыны фæстæ, Дзæгъиаты Уырызмæг банысан кодта дыууæ республикæйы фыдракæндты ныхмæ тох кæнынæн сразыдзинад кæй фæахъаз уыдзæн, уый.

«Сразыдзинадыл мах куыстам иу афæдз. Дипломатон каналты руаджы кæрæдзийæн базонгæ кодтам документы текст æмæ афтæмæй æрцыдыстæм иу хатдзæгмæ. Ацы сразыдзинад фæахъаз уыдзæн дыууæ республикæйы фыдракæндты ныхмæ æмгуыст кæнынæн», – загъта Дзæгъиаты Уырызмæг

Уый куыд банысан кодта, афтæмæй документыл къухтæ кæй æрфыстæуыд, уымæй дыууæ республикæйы Генералон прокуратурæтæ дæр бæрнджын сты кæрæдзийæн алыварсон æххуыс кæнынæй æмæ дыууæ бæстæйы ведомствоты рæзтæн æмбæлон æххуыс кæнынæй.

Йæ рады Сергей Горенко дæр банысан кодта дыууæ республикæйы хæларадон ахастытæ. Зæгъгæ, ууыл дзурæг сты, дыууæ бæстæйы къухдариуæггæнджыты хайадистæй иууыл бæрзонддæр æмвæзадыл фембæлдтытæ.

«Ацы документыл къухтæ æрфыссыныл куы дзурæм, уæд æм мах рагæй цыдыстæм. Куыстам, цæмæй арæзт æрцыдаид иууон стратеги æмæ тактикæ. Ацы сразыдзинад здæхт у нæ дыууæ республикæйы цæрджыты цард фæхуыздæр кæнынмæ, юридикон æмæ физикон цæсгæмтты бартæ хъахъхъæнынмæ», – банысан кодта Генералон прокуроры хæстæ æххæстгæнæг Сергей Горенко.

Уый фæстæ дыууæ ведомствойы сæргълæуджытæ кæрæдзийы схорзæхджын кодтой майдантæй.

Дзæгъиаты Уырызмæг æмæ Генпрокуратурæйы минæвар Уалыты Васили хорзæхджын æрцыдысты «Æмархайды тыххæй» Луганскы республикæйы майдантæй. Дзæгъиаты Уырызмæг та ведомствæйон хорзæхтæй схорзæхджын кодта Сергей Горенко æмæ Луганскы Генпрокуратурæйы цалдæр минæвары.

***

Республикæ Хуссар Ирыстоны Мидхъуыддæгты министр Наниты Игорь æмæ Луганскы Адæмон Республикæйы Мидхъуыддæгты министр Игорь Корнет сæ къухтæ æрфыстой Барадон æххуыс бакæнын æмæ æмгуыстады тыххæй сразыдзинадыл.

Æхсæнведомствойæн сразыдзинады ахсджиаг нысаниуæджы тыххæй сæ хъуыдытæ загътой министртæ.

«Ацы сразыдзинадыл нæ къухтæ кæй æрфыстам, уымæй банысан кодтам, кæрæдзийæн барадон æххуыс æмæ нæ республикæты организацигонд фыдракæндты ныхмæ тохмæ нæ цæттæдзинад», – банысан кодта Наниты Игорь.

Дыууæ министрады ‘хсæн æмгуыстады ахсджиагдзинад банысан кодта Игорь Корнет дæр. Уый куыд загъта, афтæмæй дыууæ ведомствойы ‘хсæн сразыдзинад арæзт кæй æрцыд, уымæй стыр къахдзæф арæзт акондæуыд дыууæ æвзонг республикæты æмахастыты рæзты сæраппонд.

«Нырмæ дæр æмæ нырæй фæстæмæ дæр кусдзыстæм нæ республикæты ‘хсæн бастдзинæдтæ фидар кæныныл, организацигонд фыдракæндты ныхмæ хъомысджын тох кæндзыстæм», – банысан кодта Игорь Корнет.

Мадзалы фæстæ дыууæ ведомствойы сæргълæуджытæ зæрдылдарæн лæвæрдтæ бакодтой кæрæдзийæн.

***

Республикæ Хуссар Ирыстон æмæ Луганскы Адæмон Республикæйы Уæлвæткон уавæрты министрадты къухдариуæггæнджытæ сæ къухтæ æрфыстой Уæлвæткон уавæртæй развæлгъау бафæдзæхсыны æмæ сæ сликвидаци кæныны тыххæй сразыдзинадыл.

Документыл сæ къухтæ æрфыстой Республикæ Хуссар Ирыстоны Æмбæстагон хъахъхъæнынад, уæлвæткон уавæртæ æмæ стихион æнамонддзинæдтæ аиуварс кæныны хъуыддæгты фæдыл министр Цоциты Азæмæт æмæ Луганскы Адæмон Республикæйы Уæлвæткон уавæрты, сæ фæстиуджытæ æмæ стихион æнамонд-дзинæдтæ аиуварс кæныны хъуыддæгты фæдыл министр Евгений Кацавалов.

«Абоны бонæн стыр нысаниуæг ис. Ацы хъуыддагмæ мах цыдыстæм цалдæр азы дæргъы. Сразыдзинадыл нæ къухтæ кæй æрфыстам, уымæй юридикон статус радтам нæ адæмты, нæ республикæты æмæ нæ ведомствоты æнгом ахастытæн. Ацы документы руаджы æмгуыст кæндзыстæм дыууæ республикæйы хæрзиуæгæн», – документыл къухтæ æрфыссыны фæстæ банысан кодта Евгений Кацавалов.

Йæ рады Цоциты Азæмæт дæр йæ хъуыдытæ загъта дыууæ министрады æмгуысткæнынады тыххæй.

«Мах нырмæ дæр кæрæдзимæ цыдыстæм, кæрæдзийæн амыдтам нæ фæлтæрддзинад. Ныр та нæ ахастытæ рахызтысты хуыздæр, бæрзонддæр æмвæзадмæ», – загъта РХИ-йы Уæлвæткон уавæрты министр.

Мадзалы кæрон Евгени Кацавалов Цоциты Азæмæтæн балæвар кодта постон маркæ, кæцыйы рауагъдæуыд Хуссар Ирыстон æмæ Луганскы Адæмон республикæты ‘хсæн солидарондзинады нысанæн.

ОСИАТЫ Индирӕ

Comments are closed, but trackbacks and pingbacks are open.