РХИ-йы парламенты Æддагон политикæ æмæ æхсæнпарламентон бастдзинæдты фæдыл комитеты сæрдар Коцты Игорь ра-дзырдта 2018 азы комитеты бакæнгæ куысты тыххæй.
«Мæнæн зын у Æддагон политикæ æмæ æхсæнпарламентон бастдзинæдты фæдыл комитеты куыстæн аргъ кæнын, аргъ ын хъуамæ скæной не ‘взарджытæ, фæлæ мæ хъуыдымæ гæсгæ ацæугæ аз, иумæйагæй сисгæйæ, фаг æнтыстджын уыдис нæ Комитетæн», – загъта Коцты Игорь.
Йæ ныхæстæм гæсгæ комитеты уæнгтæ рабадтыты æркастысты æмæ райстой къорд закъоны проекты, кæцытæ ахсджиаг уыдысты Хуссар Ирыстоны паддзахаддзинадæн. Сæ фылдæр хай хаудысты, ацы аз нæ Республикæ æндæр паддзахадтимæ цы сразыдзинæдтыл æрфыста йæ къух, уыдон сратификаци кæнынмæ.
Игорь куыд загъта, афтæмæй Комитетыл рацыдысты ахæм закъæттæ, куыд «Республикæ Хуссар Ирыстон æмæ Сириаг Арабаг Республикæйы ‘хсæн хæлардзинад æмæ æмгуысткæнынады тыххæй 2018 азы 23 июлы горæт Дамаскы къухтæ фыст кæуыл æрцыд, уыцы бадзырды ратификацийы тыххæй» РХИ-йы Закъон æмæ «Республикæ Хуссар Ирыстоны Хицауад æмæ Сириаг Арабаг Республикæйы Хицауады ‘хсæн базарадон-экономикон æмгуысткæнынады фæдыл Сразыдзинады ратификацийы тыххæй» РХИ-йы закъон.
«Сириаг Арабаг Республикæйы Парламентимæ куыстыл куы дзурæм, уæд зæгъын хъæуы, мах сæ кæй фæхуыдтам Хуссар Ирыстонмæ æмæ нæм ис се ‘рцыды рæстæджы æхсæнпарламентон сразыдзинадыл къухтæ æрфыссыны фæнд. Мæ хъуыдымæ гæсгæ ацы здæхты дыууæ парламенты куыст кæй уыдзæн æнтыстджын», – загъта комитеты сæрдар.
Афтæ ма банысан кодта, зæгъгæ, ацы аз Парламент райста РХИ-йы Закъæттæ «Республикæ Хуссар Ирыстон æмæ Сербаг Республикæйы ‘хсæн æмгуысткæнынады тыххæй Сразыдзинады ратификацийы тыххæй» æмæ «Товартæй базар кæныны режимы тыххæй РХИ-йы Хицауад æмæ УФ-йы Хицауады ‘хсæн 2012 азы 2 марты Сразыдзинадмæ ивындзинæдтæ бахæссыны фæдыл Суагъæйы ратификацийы тыххæй».
«Иннæ закъæтты проекттыл куы дзурæм, уæд уыдон сты æркæсыны стадийы. Тагъд æркастæуыдзæн «Республикæ Хуссар Ирыстоны æмбæстагдзинады тыххæй зæкъонмæ». Уый Парламентмæ æрбавдыста фæсарæйнаг хъуыддæгты министрад 2015 азы æмæ йæ баххæст кодта нæ профилон Комитет. Уый у вазыгджын æмæ ахсджиаг закъоны проект. Ууыл кусгæйæ ма хынцыд цыдысты депутатты фæндæттæ. Зæрдыл æрлæууын кæнын хъæуы, раздæры закъоны проект ист кæй æрцыд 2006 азы, Республикæ Хуссар Ирыстоны паспортизаци уадзыны рæстæгмæ. Уый фæстæ йæм хаст цыдис бирæ ивындзинæдтæ, фæндæттæ, уымæ гæсгæ райстæуыд уынаффæ, цæмæй ацы закъоны проект ногæй бакуыст æрцæуа. Абоны бонмæ ацы ахсджиаг закъоны проектыл куыст, зæгъæн ис, кæронмæ бахæццæ æмæ тагъд рæстæджы ист æрцæудзæнис», – бамбарын кодта парламентари.
Уый куыд зæгъы, афтæмæй ма Комитеты æркæсынмæ ис ноджыдæр къорд фарстайы, кæцытæ хауынц фæсарæйнаг хъуыддæгты министрадмæ, зæгъæм, дипломатон рангты тыххæй Уагæвæрд.
«Афтæ ма ис фæндæттæ нæ комитеты куыст фæхуыздæр æмæ организаци кæныны фæдыл. Комитетмæ бацæугæ æппæт фæн-дæттæм дæр æркæсæм æмæ архайæм, цæмæй алы фарст дæр оперативонæй рахæссæм Президиуммæ æмæ Парламенты сессимæ», – зæгъы Коцы фырт.
Банысан ма кодта, Комитет активонæй кæй кусы æвзарджытимæ, афтæ ма æндæр бæстæты парламентаритимæ дæр.
Уый размæ азтау, Ацы аз дæр сæйраг куыст цæуы Уæрæсейы Федерацийы Федералон Æмбырдимæ, куыд Федерацийы Совет, афтæ Паддзахадон Думæимæ дæр. Йæ рæстæджы мах нæ къухтæ æрфыстам сразыдзинæдтыл æмæ нын æрвылаз дæр вæййы иумæйаг рабадтытæ, бæлвырддæрæй та афæдз дыууæ хатты. Уыцы рабадтыты кæнæм иттæг æнтысгæ куыст, уынаффæ кæнынмæ рахаст æрцæуынц нæ паддзахады актуалон проблемæтæ. Федералон Æмбырдимæ куысты процесс дæр махæн у иттæг ахсджиаг. Уый у хорз бынат, куыд адæймæгты ‘хсæн, афтæ æхсæнпарламентон ахастытæ дæр сфидар кæнынæн. Æз кæддæриддæр фæзæгъын, не ‘хсæн алыварсон æмгуысткæнынад фадат дæтты уыцы фæлтæрддзинад райсынæн, кæцыйы мах хъуамæ райстаиккам, Республикæ уæззау хæстон уавæры куы уыд æмæ цалынмæ йæ хæдбардзинад нымад не ‘рцыд, уæдмæ. Уыцы фæлтæрддзинад иттæг ахсджиаг у не ‘хсæнпарламентон ахастытæ æмæ контакттæ рæзын кæнынæн, афтæ ма æндæр бæстæтæй нæ коллегæтимæ иу кæнæ иннæ æхсæнпаддзахадон фарстаты фæдыл раст уынаффæтæ райсыны тыххæй.
Ацы ахсджиагдæр цаутæй сæ иуыл Коцты Игорь банымадта РХИ-йы Парламенты Æддагон политикæ æмæ æхсæнпарламентон бастдзинæдты фæдыл Комитеты æмæ УФ-йы Паддзахадон думæйы Хæдбар Паддзахадты Æмхæларады, евразиаг интеграци æмæ æмфыдыбæстæйонтимæ бастдзинæдты комитетимæ иумæйаг рабадт, кæцы уагъд æрцыд РХИ-йы Парламенты бæстыхайы.
Уымæй дарддæр ма, депутат куыд зæгъы, афтæмæй Комитет дарддæр æнгом куыст кæны йæ рагон хæлæрттæ, иугъуызон фæндагыл кæимæ рацыдыстæм, уыдон Республикæ Абхазы Парламенты депутаттимæ. Дарддæр ма куыст цæуы Приднестроваг Молдоваг Республикæ æмæ Хæххон Къарабахы Республикæимæ, кæцытимæ кæддæриддæр цыдыстæм иу здæхты æмæ нын æхсæнпарламентон хаххыл ис æнгом контакттæ.
Парламентари радзырдта куысты ног здæхтыты тыххæй дæр. Уыдонæй сæ иу у Уæрæсейы Федерацийы регионты закъондæттынадон органтимæ æмархайд кæнын.
«Рагæй дзырдæуы Ирыстоны Цæгат æмæ Хуссары Парламентты ‘хсæн Сразыдзинадыл къухтæ æрфыссыныл æмæ ныр мæ бон у зæгъын, тагъд ыл къухтæ кæй æрфыстæуыд-дзæн. Уый нын фадат ратдзæнис хицæн фарстатыл уынаффæ кæнын æмæ сæ скъуыддзаг кæнынæн. Цæвиттон, ирон æвзаг æмæ ирон культурæмæ хауæг фарстатыл. Уый у иттæг цымыдисон æмæ ахсджиаг дыууæ республикæйæн дæр æмæ йæ реализаци кæнынмæ æрæвналдзыстæм тагъд рæстæджы», – зæгъы Коцты Игорь.
Кæронбæттæны уый радзырдта Федерацийы Советы рабадтмæ Комитеты делегацийы æрæджыйы балцы тыххæй, кæцыйæн уыдис хорз фæстиуджытæ. Ацы рабадты, йæ ныхæстæм гæсгæ, дзырд цыдис иууыл ахсджиагдæр фарстатыл, кæцытæ хаудысты нæ Республикæ æмæ не ‘мбæстæгты цардмæ.
«Фыццаг рады уынаффæ кодтам Уæрæсейы æмбæстагдзинад райсын фæхуымæтæг-дæр кæныны фарстайыл. Афтæ ма ныхас цыд, цæгатирыстойнаг фидауынгæнæг батальоны чи службæ кодта, уыдоны куысты стаж бахъахъхъæнын, мады капитал райсын æмæ дзы Хуссар Ирыстоны территорийыл пайда кæнын, афтæ ма не ‘мбæстæгты пенсион ифтонгады фарстатыл», – банысан кодта парламентари.
Республикæ Хуссар Ирыстоны Парламенты информацион-аналитикон службæ
Comments are closed, but trackbacks and pingbacks are open.