РХИ-йы Хицауады Сæрдар Пухаты Эрикы сæрдариуæгадæй уыд коронавирусы инфекци COVID -19 ныхмæ архайды оперативон штабы рабадт. Уынаффæ кодтой æдасдзинады мадзæлттыл æмæ уæрæсейаг уæлдæр ахуыргæнæндæтты курсантты райсынмæ республикæйы медицинон уагдæтты цæттæдзинадыл.
Республикæйы сæйраг санитарон дохтыр Коцты Маринæйы информацимæ гæсгæ, йæ дæлбар комитет активонæй уадзы цæттæгæнæн мадзæлттæ курсантты карантинмæ райсыны тыххæй. Уæвæг информацимæ гæсгæ, курсанттæ сты 270 адæймаджы бæрц.
«Æрцæуынц нæм курсанттæ, æмæ уыдонæн мах цæттæ кæнæм бынæттæ республикæйы хосгæнæн-профилактикон уагдæтты. Мах бабæрæг кодтам Дзауы рынчындон. Куыд федтам, афтæмæй дзы нормалон уавæртæ ис, палатæтæ цæттæ сты, ис сæ хъарм дон дæр», – загъта Коцты Маринæ.
Йæ ныхæстæм гæсгæ, абон Новосибирск æмæ Рязанæй республикæмæ æрцæуынц курсантты иу къорд. Уыдон карантины уыдзысты Дзауы рынчындоны.
Рабадты рæстæджы ма уынаффæ цыд курсантты хæлцадæй æмæ медицинон персоналы та индивидуалон хъахъхъæнынады æмæ дезинфекцион æрмæджытæй сифтонг кæныны фарстатыл.
Æнæниздзинад хъахъхъæныны æмæ социалон рæзты министр Тотчиты Георги загъта, зæгъгæ, медперсоналæн ис, карантины чи хъуамæ уа, уыцы æрцæуæг æмбæстæгтимæ кусынæн æппæт уавæртæ дæр.
Хицауады Сæрдар æрсидт профилон ведомствоты къухдариуæггæнджытæм, цæмæй курсанттæн сорганизаци кæной карантины æмбæлон режим, æппæт санитарон нормæтæ бахъахъхъæнгæйæ.
«Карз карантин хъахъхъæнынмæ хъус дарын нæ иумиаг хæс у. Æрцæуæг курсанттимæ æппындæр мацы контакттæ хъуамæ уа. Æрмæстдæр æппæт фæткойтæ æмæ фæкъуындæггонд уавæртæ æххæст кæнгæйæ, æппæт домæнтæ карзæй æххæст кæнгæйæ, æппæт дунейыл цы вирус апарахат, уыимæ нæ тохæн уыдзæн æвæрццаг фæстиуæг», – банысан кодта Пухаты Эрик.
Comments are closed, but trackbacks and pingbacks are open.