Ахуыр-хъомыладон куыстыл лæуд у дæргъвæтин азты Цхинвалы районы Къостайыхъæуы астæуккаг скъола. Ацы скъола райдианæй фæстæмæ схъомыл кодта дугæн аккаг æмбæстæгтæ æмæ уыдонæй хистæр фæлтæр ахуыры азты фæстæ сæ царды бонты уырдыг лæууыдысты хæрзиуæгон хъуыддæгты, æндæртæ та нырма дæр сты Ирыстон æмæ йæ адæмæн иузæрдион лæггадгæнджытæ. Уыдон та уыдысты æмæ сты нæ институты, стæй та университеты лектортæ æмæ иумæйагахуыргæнæндоны ахуыргæнджытæ, хъæууон хæдзарады специалисттæ, нывгæнджытæ, журналисттæ, спортсментæ æмæ адæмон хæдзарады æндæр дæсныйæдты кусджытæ. Кæд скъола бирæ зындзинæдтыл сæмбæлд, цалдæр хатты бæстыхай бæллæхты бахауд, уæддæр та ногæй æрлæууыд йæ хæрзиуæгон куыстыл æмæ уырдыг лæууы рæзгæ фæлтæры раз. Уыцы фыдæвзарæнты скъола бахауд, нæ сыхæгтæ та нæ адæмы ныхмæ тугкалæн хæст куы расидтысты, уæд. Фæлæ нæ фарсмæ æрбалæууыд Уæрæсейы хицауад æмæ йæ æгæрон æххуысы фæрцы хъæуы ногæй сырæзт рæсугъд дыууæуæладзыгон скъолайы агъуыст æмæ дзы ныр цалдæр азы рæзгæ фæлтæр исынц фаг зонындзинæдтæ.
Фæлæ зæгъын хъæуы, кæд скъола йæ дуæрттæ æрæджы байгом кодта, уæддæр алцæмæ дæр рæстæгæй рæстæгмæ хъæуы фæкæсын æмæ йын йæ чысыл аиппытæ фæхъæуы иуварс кæнын. Уыцы ахсджиаг фарст сæ зæрдыл дарынц æмбæлон органтæ æмæ архайынц, цæмæй уыдон скъуыддзаг цæуой банысангонд æмгъуыдты. Уымæ гæсгæ æрæджы аразджытæ ацы ахуыргæнæн уагдоны райдыдтой мидæггагон цалцæггæнæн куыстытæ æмæ уал сын бантыст ирон æвзаг æмæ литературæ æмæ математикæйы кабинеттæ æмбæлон уагмæ æркæнын. Дарддæр кусджытæ Къæбулты Харитон æмæ Витали ахæм куыстытæ кæнынц фыццаг уæладзыджы цалдæр кабинеты. Цæмæй ахуыры процесс ма къуылымпы кæна, уый тыххæй кусджытæ сæ куысты уæлхъус балæууынц сихорæй фæстæмæ.
ХУЫБИАТЫ Никъала
