Стыр Фыдыбæстæйон хæстмæ Цхинвалы районы Дменисы хъæуæй ацыд 135 æвзонг лæппуйæ фылдæр. Уыдонæй 21 уыдысты Джиголатæй, 12 – Лолотæй æмæ 11 та – Уалытæй. Иннæтæ та уыдысты хъæуы цæрæг иннæ мыггæгтæй. Се ‘ппæтæн дæр хæсты быдырæй хъæумæ хъуыстысты сæ хъæбатырдзинæдтæ, фæлæ, хъыгагæн, хæст куы фæцис, уæд фыдыбæстæмæ сæ уарзондзинад кæм бахсыст, уыцы хъæу, хиуæттæ æмæ зонгæтæм нал æрыздæхт се ‘мбисæй фылдæр. Уыдонæн бæргæ раджы æмбæлд сæ нæмттæ сæнусон кæнын, фæлæ уæддæр уыцы хæс æххæст æрцыдис æрмæстдæр авд азы размæ.
Цыртыл ма фыст æрцыдысты, гуырдзиаг-ирон хæсты Дменисы хъæуæй цы 35 цæрæджы бабын сты, уыдоны нæмттæ æмæ мыггæгтæ дæр.
Æвæццæгæн, аразджытæ нæ бакодтой цæсгомджын куыст æмæ цыртæн згъæлын райдыдтой йæ къулты æмæ пъолты плиткæтæ. Адæм дæр æм сæ хъус рæстмæ нал дардтой æмæ йæ хуыз бонæй-бонмæ ивта мæгуырауæрдæм, хæлдис. Уавæр сраст кæныны сæраппонд хъæууон администрацийы сæргълæууæг Дзукъаты Вилорд бахатыд Цхинвалы районы администрацийы сæргълæууæг Бæззаты Иналмæ. Уыдон иумæ æруынаффæ кодтой, сарæзтой хъæугæ документтæ, ссардтой специалисттæ æмæ йе сцалцæггæнæн куыстытæм æрæвнæлдтой августы райдианы. Цырты бындурон къултæ суæгъд кодтой зæронд плиткæйæ, ныссыгъдæг æй кодтой æмæ райдыдтой ног плиткæ æвæрын. Куыстытæ кæронмæ æрхæццæ сты августы мæйы фæстаг бонты.
Хъæууон администрацийы сæргълæууæг банысан кодта: «Цалцæггæнæн æмæ реставрацион куыстытæ куы райдыдтой, уæдæй фæстæмæ æрвылбон дæр, бæрæг кодтон, цы темптæй цæуынц, уый æмæ сæ гъæд. Æппæт куыстытæ дæр гъæдджын сты, цалцæггæнджытæ æмæ реставрацигæнджытæ спайда кодтой æрмæстдæр хæрзгъæд æрмæджытæй», – зæгъы уый.
Хæрзарæзт ма цæуы цыртæн йæ алыварс дæр. Ацы хæстæ йæхимæ райста Хуссар Ирыстоны Парламенты депутат Къуезерты Арсен.
Гæззаты Иван
