КÆМÆН ФÆФЫЛДÆР ЙÆ ПЕНСИ

Нæ республикæйы цæрджытæ сæ фылдæр сты Уæрæсейы Федерацийы æмбæстæгтæ. Пенситæ æмæ æндæр социалон æххуыстæ дæр исынц уым. Апрелы мæйы УФ-йы пенсион фонды æрцыд къорд ивындзинæдтæ. Уый тыххæй нын радзырдтой Цæгат Ирыстон-Аланийы пенсион фондæн нæ республикæйы цы филиал ис, уый минæвæрттæ.

Апрелы мæйæ Уæрæсейы æмбæстæгты цалдæр къордæн бафтыд сæ пенситæм, цæмæй ныры пенситæ индексацигонд цæуой фæцæрыны минимумы бæрцмæ. Афтæмæй пенсиисджыты пенсион ифтонгад фылдæр уыдзæн фæцæрыны минимумæй индексаци æмæ æрвылмæйон бафыстытæ цас уыдзысты, уыйбæрц.

Хъыгагæн, ацы ног нымад, апрелы мæйæ, не ‘рхауд æфсæддон, тыхон æмæ барадхъахъхъæнæг органты кусджытæм. Фæлæ социалон (кармæ гæсгæ) пенси фæфылдæр 1-æм апрелæй. Бæрæг куыд у, уымæ гæсгæ уыцы бафыстыты бæрц уыдзæн 2,4 проценты бæрц, пенсиисæг цы регионы цæры, уымæ гæсгæ. Ныртæккæ социалон пенси астæуккаг нымадæй у 9055 сомы, рæзгæ та скæндзæн 10,280 соммæ. Пенсийы ацы хуыз хъуамæ ма уа фæцæрыны минимумæй къаддæр. Кæд æмæ къаддæр уа, уæд пенсиисæгмæ æмбæлы паддзахады уæлæмхас æххуыс райсын. Фæдзæхстон (фæллойадон) пенсиисджыты пенситæм дæр бафтдзæн 7 проценты, æмæ уый та цалдæр хатт фылдæр уыдзæн инфляцийы æмвæзадæй. Пенсимæ æфтыд æрцæудзæн дыууæ фæлтæрæй. Фыццаг сæм бафтдзæн 1-æм апрелæй 4 проценты, стæй та июлы мæйæ 3 проценты. Индексацийы фæрцы уый уыдзæн 1мин соммæ æввахс. Кусгæ чи кæны, уыдон пенситæм закъонмæ гæсгæ индексаци не ‘мбæлы. Уыдонæн сæ пенситæм æфты баллтæм гæсгæ. Иу баллы аргъ у 80 сомы. 2019 азæй кусæг пенсиисджытæн лæвæрд æрцæудзæн иууыл фылдæр 3-гай пенсион баллтæ. Закъон куыд амоны, уымæ гæсгæ фæллойадон пенсийæн индексацийы бар ис æрмæстдæр пенсиисæг йæ куыст куы ныууадза, уыцы бонæй. Уыцы бонæй фæстæмæ та раздæр цы бакуыста, уыцы азы индекстæ цæуынц нымад æмæ æфтыд йæ пенсимæ.

Уымæй дарддæр ма хъуамæ алчидæр зона адæймагыл 80 азы цы мæй сæххæст уа, уыцы мæйæ фæстæмæ йæ пенсимæ кæй æфты 5 443 сомы. Уый тыххæй йæ сæрмагондæй Пенсион фондмæ цæуын нæ хъæуы. Йæ дарæджы чи фесæфта – уыдонмæ хауынц сидзæр сывæллæттæ, ныййарджытæй сæ иу кæнæ дыууæ дæр кæмæн нал сты, уыдон. Ахæмты пенситæм дæр бафтдзæнис иу мин сомы бæрц.

Цæгат Ирыстон-Аланийы пенсион фонды филиалы ма нын куыд загътой, афтæмæй пенсион ифтонгады хъуыддаджы ногæй цы ис, уымæ хъус дарæн ис УФ-йы Пенсион фонды сæрмагонд сайтыл.

Нæ уацх.