Мæскуйы байгом мыхуыры фæрæзты æвдæм фестиваль «Красная площадь». Уый у литературон бæрæгбонтæн сæ ахсджиагдæр æмæ хъæугæдæр. Архайынц дзы Уæрæсейы бирæ регионтæ æмæ раздæры цæдисы республикæтæ. Фестиваль та æрвылхаттау æрбамбырд кодта фысджыты, чиныгаразджыты, культурæ æмæ аивады архайджыты алы рæттæй, цæмæй æппæт уазджытæн дæр сæ зæрдыл æрлæууын кæной, нæ царды чиныг кæсынæн цы стыр ахадындзинад ис, уый.
Равдыст-фестиваль цæуы Мæскуыйы Сырх фæзы. Ис дзы равдыст онлайнмæ гæсгæ дæр. Уый фадат дæтты æхгæд арæнты аххосæй æндæр рæттæй йæ бон Мæскуымæ æрбацæуын кæмæн нæ бацис, уыцы мыхуыры органтæн хайад райсынæн.
Фестваль дихгонд æрцыд сæрмагонд фæзтыл: «Аивадон æмæ сывæллæтты ахуырадон литературæ», «Уæрæсейы регионтæ», «Электрон чиныг», «Фыдыбæстæйы истори», «Антикварон чиныг», «Хъуыддаджы фæз» æмæ æндæртæ. Регионтæ хицæн цатырты равæрдтой сæ продукци. Ис дзы армукъа дæр мыхуыры продукцийæн.
Цæгат Ирыстонæй фестивалы архайынц рауагъдад «Ир»-ы директор Таутиаты Хъазыбег, йæ хæдивæг Тъехты Тамерлан, цехы хицау Зассеты Болат, журналтæ «Мах дуг»-ы сæйраг редактор Хетæгкаты Оксанæ, «Дарьял»-ы сæйраг редактор Цхуырбаты Алан æмæ «Ногдзау»-ы сæйраг редактор Сæлбиты Дианæ… Уыдонæй алчидæр хъуамæ фестивалы равдиса цы мыхуыры орган уадзы, уый æмæ йæ базонгæ кæна æндæр адæмыхæттытæн. «Ир» та уым равдисдзæн фæстаг азты уагъд чингуытæй мидисджындæр чи сты, уыдон.
Сырх фæзы фестивалы архайджытæ фембæлдысты Уæрæсейы зындгонд фысджытимæ, журналты редактортимæ, чингуыты рауагъдæтты минæвæрттимæ, мæскуыйаг ирæттимæ…
Журнал «Мах дуг»-ы сæйраг редактор Хетæгкаты Оксанæ Мæскуыйæ куыд фехъусын кодта, афтæмæй тынг разы сты сæ балцæй. «Æнхъæл куыд нæ уыдыстæм, ахæм бирæ адæм нæм цæуы, уæлдайдæр нæхи ирæттæ. Зæрдиагæй æлхæнынц «Ир»-ы уагъд чингуытæ, фылдæр ирон-уырыссаг дзырдуæттæ, скифтæ-аланты тыххæй нæ историйы чингуытæ, ирон аргъæуттæ, тынг цымыдис кæнынц нæ журналтæм дæр. Мах журналтæ уæй нæ кæнæм, фæлæ ирæттæй чи ʻрбацæуы, уыдонæн сæ лæвар кæнæм. Адæм дзы бирæ ис, кæд ацы низæй тæрсынц, уæддæр. Тынг æхсызгон у ирæттæ нæм бон изæрмæ къордгæйттæй кæй цæуынц æмæ ныл цин кæнынц, уый. Уыд нын цымыдисаг фембæлдтытæ æндæр мыхуыры разамонджытимæ литературæйы рæзты тыххæй. Уым цы хатдзæгтæ скодтой, уыдонæй мæ зæрдæмæ фæцыд журнал «Дружба народов»-ы сæйраг редакторы хæдивæг Александр Снегиревы ныхас. Уый куыд бафиппайдта, афтæмæй ныртæккæ адæм фыссынц раздæрæй фылдæр, курдиат кæмæ ис, уыдон дæр чысыл не сты. Уыцы ныхасæн, æвæццæгæн, бындур ис æмæ уый æхсызгон хабар у, уымæн æмæ ацы журнал у Уæрæсейы раззагдæр журналтæй иу. Ахæм ныхæсты фæстæ нæ ныфс бацæуы: нæй мыхуыры органтæн сæфæн, уыдонимæ ирон чиныгæн дæр. Махæн та нæ сæйраг нысан у, дунейы тыгъдады ма ирон адæм æмæ мыхуыр дæр кæй ис, уый равдисын фестивалы», – банысан кодта Оксанæ.
Фестивалы фæстæ ма уазджытæм ноджыдæр æнхъæлмæ кæсынц тымбыл стъолтæ, лекцитæ, фембæлдтытæ зынгæ фысджытимæ.
Джусойты Нинæ
Comments are closed, but trackbacks and pingbacks are open.