“ИР”-Ы КУСДЖЫТЫ ФЕМБÆЛД ЧИНЫГКÆСДЖЫТИМÆ
Республикæйы паддзахадон рауагъдад “Ир”-ы директорæй æрыгон ахуыргонд Таутиаты Хъазыбеджы куы снысан кодтой, уæдæй нырмæ цалдæр мæйы йеддæмæ нæма рацыд, фæлæ рауагъдады куысты хуыздæрырдæм бирæ ивддзинæдтæ æрцыд. Фыццаджыдæр, коллектив æнгом бастдзинæдтæ сарæзтой автортæ æмæ чиныгкæсджытимæ, алы чиныгæн дæр скæнынц презентаци. Дыккаджы, сæйраг æргом аздæхтой æрыгæтты сфæлдыстадмæ. Директор куыд зæгъы, афтæмæй фыццаг рады каст цæудзæн æрыгон авторты къухфыстытæм. Уæдæ Дзæуджыхъæуы рагæй чи нал ис, чингуыты ахæм дукани дæр фæзынд Таутийы – фырты руаджы. Рæхджы фæзындзæн дыккаг.
Ацы бонты та Республикон зонадон библиотекæйы “Ир”-ы кусджытæ радон сфæлдыстадон фембæлд сарæзтой чиныгкæсджытимæ. Фембæлды сæйраг нысан уыд, фæстаг рæстæг цы чингуытæ рацыд, уыдоныл афæлгæст саразын, адæмæн сæ базонын кæнын. Библиотекæмæ æрбацыдысты республикæйы интеллигенцийы минæвæрттæ, ног чингуыты автортæ æмæ редактортæ.
Директор фембæлды архайджыты размæ рахаста ног рауагъд чингуыты æмæ дзы алкæйы тыххæй дæр цыбырæй радзырдта. Фыццагдæр, ныхас цыд рауагъдады раздæры редактор Хуыгаты Сергейы чиныг “Къостайы авдæн”-ыл. Чиныджы редактор Дзанайты Ирæ куыд радзырдта, афтæмæй Сергейы сфæлдыстады стыр бынат ахсы Къостайы ном, бирæ йæм ис уый тыххæй фыст уацмыстæ. Ныр та поэты юбилейон азы лæвары хуызы рауад чиныджы ахæм ном. Ирæ ма радзырдта чиныджы мидисыл, куыд ыл куыста, цы стыр нысаниуæг ын ис æмæ афтæ дарддæр. Йæ ног чиныджы тыххæй йæ хъуыдытæ загъта Сергей йæхæдæг дæр.
Ирон театры йæ фæзындæй абоны онг цы фæрнджын адæм куыста æмæ кусы, уыдонæн, стæй аивадуарзджытæн, æвæджиауы лæвар ракодта рауагъдады редактор Цæрæкты Аллæ. Уый халгай фембырд кодта театры истори æмæ дзы алы артисты тыххæй дæр хицæн æрмæг бацæттæ кодта. Йæ чиныг “Уæлтæмæны æрдæфæнтæ”-йы мидис æмæ ахадындзинадыл радзырдта Аллæ йæ-хæдæг, стæй журналист Гасанты Валери.
Прозаикон уацмыстæ арæх нал сты, уæлдайдæр абоны цардыл, стæй æрыгон авторты фыст. Уымæ гæсгæ ахæм уацмыс куы фæзыны, уæд æй стыр зæрдиагæй рауадзы “Ир”. Уый тыххæй бирæ ныхас цыд æрыгон фыссæг Виктор Чигиры повесть æмæ радзырдты æмбырдгонд “Часы затмения”-йыл. Чиныг кæд æрæджы рацыд, уæддæр дзы дуканиты бирæ нал аззад. Стыр аргъ ын скодтой чиныгуарзджытæ. Автор йæхæдæг радзырдта йæ чиныджы тыххæй, стæй йæ фидæны плæнтты тыххæй. Куыд фехъусын кодта, афтæмæй рауадзынмæ цæттæ у йæ дыккаг роман.
Ныхас ма цыд, “Ир” фæстаг рæстæг кæй рауагъта, уыцы иннæ чингуытыл: Хуыгаты Ирланы “Вечный огонь”, Цæголты Василийы “За Дунаем”, Уырымты Петяйы “Сабиты цин”, Гæдиаты Секъайы “Æмбырдгонд уацмыстæ”, Хъуысаты Генрийы “Путешествие в былое”, Зæнджиаты Владимиры “Сугубо мужская история”, Мзокты Аслæнбеджы “Мæ зæрдыл лæууæн – ирон дзырдаивад” , стæй ма Гуыбырты Зæлинæйы, Колыты Виталийы, Соттиты Риммæйы, Хохойты Энверы, Айларты Асæхмæты æмæ ин-нæты чингуытыл.
Чиныджы ахадындзинадыл нæ царды, “Ир”-ы куысты тыххæй ма сæ хъуыдытæ радзырдтой ахуыргонд Цыбырты Людвиг, поэт Гуырдзыбегты Иринæ, 13-æм скъолайы директор Сæлбиты Иринæ, зарæггæнæг Дауыраты Эдуард, публицист Мзокты Аслæнбег…
Ирыстоны фысджыты æмдзæвгæтæ аив бакастысты 13-æм скъолайы ахуырдзаутæ.
Таутиаты Хъазыбег кæронбæт-тæны куыд загъта, афтæмæй рауагъдады сæйраг редактор Тъехты Тамерланимæ ноджы зæрдиагдæрæй архайдзысты. Чиныгкæсджыты ифтонг кæндзысты бæрзонд аивадон æмæ зонадон æмвæзадыл фыст хæрзхъæд чингуытæй. Ахæм фембæлдтытæ та уыдзысты æртæ мæйы иу хатт. Æрмæстдæр адæм се ‘ргом чиныгмæ раздахæд…
Джусойты Нинӕ
Comments are closed, but trackbacks and pingbacks are open.