Ирон космонавт атæхдзæн космосмæ

Цæгатирыстойнаг Ханайты Амиран суыдзæн дунеон космикон станцы экипажы æртæ уæнгæй сæ иу. “Роскосмос”-ы ныммыхуыргонд докладмæ гæсгæ корпораци «РКК Энергия»-йы космикон нау «Союз»-ы дунеон космикон станцмæ атахт плангонд у 2019 азы майы мæймæ. Развæлгъау бæрæггæнæнтæм гæсгæ атахт аххæсдзæн 8 мæйы. Ханайты Амиран «15-ый Регион»-ы уацхæссæгæн радзырдта, атахтмæ куыд цæттæ кæнынц, уый тыххæй. «Æз алы хатт дæр цымыдис кодтон астронмимæ, чысылæй фæстæмæ уарзтон стъалытæм кæсын, космикон тыгъдады тых-хæй чингуытæ æмæ кинофильм-тæм кæсын. Бæллыдтæн мæ цард ацы фадыгимæ сбæттын æмæ фæнд кодтон Бауманы номыл Мæскуыйы паддзахадон техникон университеты ракетон-техникон техникæйы факультетмæ бацæуын. Фæлæ, хъыгагæн, мæ бæллиц нæ сæххæст æмæ бацыдтæн ЦИПУ-йы физикон-математикон факультетмæ. Уый фæстæ базыдтон, дунеон космикон станцмæ атæхыны тыххæй кандидаттæ кæй æвзарынц, уый тыххæй æмæ иу секунд дæр нал ахъуыды кодтон. Гагарины рæстæджы экспедицимæ ацæуын сæ бон уыд æрмæстдæр æфсæддон тæхджытæн, æмæ абон та космосмæ атæхын йæ бон у, кæй фæнды, уыдонæн, сæйраг у физикон æмæ психикон æнæниздзинады критеритæ рацæуын. Уый фæстæ хъæуы ахуыр кæнын астæуккаг нымадæй фондз азы, æниу адæймаг космосмæ атæхы дзæвгар фæстæдæр. Æз сдæн бархион, университеты фæстаг курс куы фæуд кодтон, уæд æмæ уæдæй фæстæмæ рацыд аст азы. Æппæт уыцы рæстæджы мах ахуыр кодтам космикон станц, атахты теори æмæ динамикæ. Æгæрыстæмæй нæ ахуыр кодтой операторон хъуыддагыл дæр, цæмæй нæ бон уа исын æмæ науы экипажæй роликтæ Зæхмæ æрвитын. Æмæ, кæй зæгъын æй хъæуы, æдзухон физикон цæттæдзинад: диетæ, тренировкæтæ. Иууыл вазыгджындæр у медицинон басгæрст, лæмбынæг дæ фæрсынц исты дæ риссы уыдæттæй, афтæмæй дæхи хатыс фæлтæрæнтæ кæуыл аразынц, ахæм чысыл сырдыл. Кæй зæгъын æй хъæуы, æнкъарын цавæрдæр тасдзинад, фæлæ мæ цымыдисдзинад тыхджындæр у», – радзырдта ирон космонавт.