Космонавтикæимæ йæ хъысмæт æнгом баст кæмæн у, уыдонæй сæ иу уыд не ‘мбæстаг Касаты Хъазбег.
Касаты Хъазбег уыд ракетон-космикон техникæйы рæзт æмæ эксплуатацийы фадыджы специалист. Уый бирæ азты дæргъы куыста космонавтикæйы проблемæтыл. Космонавтикæйы размæцыды хъуыддагмæ йæ бавæрд уыд уæзгæ. Уый къухдариуæг кодта Константин Циалковскийы номыл Уæрæсейы Космонавтикæйы академийы «капиллярон космикон технологиты проблемæты» хайадæн. Уыд 21-томон энциклопеди «Новые наукоемкие технологии в технике»-йы аразджытæй сæ иу.
Хъазбег райгуырд 1936 азы 22 августы Дзæуджыхъæуы. Астæуккаг скъола каст фæуыны фæстæ Касайы фырт ахуырмæ бацыд Мæскуыйы Энергетикæйы институтмæ Гидравликæ æмæ гидравликон машинæты факультетмæ æмæ йæ æнтыстджынæй каст фæцис 1960 азы, райста инженер-механикы дæсныйад. Уый фæстæ йæ ахуыр адарддæр кодта Мæскуыйы Энергетикæйы институты аспирантурæйы, бахъахъхъæдта диссертаци æмæ ссис техникон зонæдты кандидат. Кусын райдыдта ССР Цæдисы Хъахъхъæнынадон сæудæджерады ми-нистрады конструкторон бюройы нырма инженерæй, уый фæстæ – сæйраг инженерæй æмæ фæстæдæр та ссис йæ сæргълæууæг.
Касаты Хъазбег куыста бирæ зонадон-иртасæн институтты бæрнон бынæтты. 1976 азы та уый ссис техникон зонæдты доктор. Уыцы-иу рæстæджы ахуыргæнæджы куыст дæр кодта Константин Циалковскийы номыл Мæскуыйы Авиацион-технологион институты æмæ 1983 азы ссис ацы институты профессор.
1990 азы кусын райдыдта зонадон центр «Техмаш»-ы секторы хистæрæй æмæ 1991 азы ссис ацы центры директор.
Касайы фырт уыд ракетон-космикон технологиты уникалон зонадон скъолайы бындурæвæрæг.
Касаты Хъазбегæн стыр авторитет уыд бæрзонд профессионалты – ракетон фадыджы къухдариуæггæнджытæ æмæ специалистты ‘хсæн, кæцытæ архайдтой æфсæддон-техникон нысаниуæджы уникалон продукци аразыны хъуыддаджы æмæ скъуыддзаг кодтой дунеон æм-вæзады иууыл вазыгджындæр зонадон-техникон хæслæвæрдтæ.
Зонад æмæ техникæйы фадыджы йæ ахадæн куыстыты тыххæй Касайы фыртæн лæвæрд æрцыд Уæрæсейы Федерацийы Хицауады æртæ премийы, Уæрæсейы Федерацийы Паддзахадон преми та – фондз хатты.
1997 азы Касаты Хъазбег равзæрстой Константин Циалковскийы номыл Уæрæ-сейы Космонавтикæйы академийы æцæг уæнгæй, кæцыйы сконды сты æппæт дунейæн зындгонд фыдыбæстæйон æмæ фæсарæйнаг ахуыргæндтæ, æппæт ракетон-космикон системæты, комплексты æмæ приборты сæйраг конструктортæ, раззагон ракетон-космикон корпорациты æмæ институтты къухдариуæг-гæнджытæ, тæхæг-космонавттæ, профессортæ.
1996 азы Касайы фырт æвзæрст æрцыд Уæрæсейы æрдзон зонæдты академийы академикæй.
Уый у 450 зонадон куысты, 62 чины-джы æмæ 100 æрæмысынæдты автор, схъомыл кодта зонæдты 33 доктор æмæ кандидаты.
Касаты Хъазбег йæ цардæй ахицæн 2009 азы æмæ йе ‘нусон бынат ссардта Дзæуджыхъæуы Кады Аллейы.
ТЕДЕТЫ И.
Comments are closed, but trackbacks and pingbacks are open.