Ацыд отставкæйы
Æмгъуыдæй раздæр йе ‘ххæстбартæ æрæвæрдта æмæ отставкæйы ацыд Кемероврйы областы губернатор Аман Тулеев. УФ-йы Президент Владимир Путин райста губернаторы отставкæ æмæ йæ къух æрфыста барамындыл. 73-аздзыд губернатор йæ ацы уынаффæ банымадта растыл, базарадон центр «Зимняя вишня»-йы зынгсирвæзты цауы тыххæй. Уый банысан кодта, зæгъгæ, губернаторы бынаты ахæм уæззау уаргъимæ кусын йæ бон не суыдзæн. Аман Тулеев Кемеровойы областы сæргъ слæууыд 1997 азы æмæ йе ‘ххæстбартæ фæуд кодтой 2020 азы. Регионы къухдариуæггæнæджы хæстæ рæстæгмæ æххæстгæнæгæй нысан æрцыд вице-губернатор Сергей Цивилев. Номхуындæй, уый трагедийы фæстæ уайтагъд, йæ зонгуытыл æрлæугæйæ, хатыр ракуырдта кемеровойæгтæй, 64 адæймаджы кæй фæмард сты, уый тыххæй. Ног губернатор сæвзарыны тыххæй æвзæрстытæ уагъд æрцæудзысты ацы аз 9-æм сентябры хъæлæс кæныны иууон боны.
Фæфылдæр сты фиддонтæ
2-æм апрелæй Китай фæфылдæр кодта фиддонтæ 128 америкæйаг товартæн. Америкæйаг дыргътыл китайаг фиддонтæ уыдзысты 15% æмæ хуыйы дзидзайыл та – 25%. Уый у Пекины дзуапп, АИШ китайаг æндон æмæ алюминыл фиддонтæ кæй бакодта, уымæн. Трамп куыд æнхъæлы, уымæ гæгæ Китай фесафдзæн 60 миллиард доллары бæрц. Æмæ цæмæй уыдоны баххæст кæной, уый тыххæй Китайы бахъуыд дзуаппон мадзæлттæ райсын.
Операци æнтыстджынæй æххæст æрцыд
Сирийы Скæсæйнаг Гутайæ боевикты раконд æнтысджынæй æххæст æрцыд, – уый тыххæй фехъусын кодтой фидыдады фæдыл центры. Аст бонмæ регионæй ацыдысты 41 мин боевикы æмæ сæ бинонты уæнгтæ. Уыдоны ластой автобустыл Идлибы провинцимæ сæрмагондæй сорганизацигонд къæлидорыл. Боевиктæ се ‘ппæт дæр сæ хæцæнгæрзтæ æрæвæрдтой. Гуманитарон паузæйы архайды рæстæджы уæрæсейаг æфсæддонты æххуысæй Скæсæйнаг Гутайæ рацыдысты 153 мин адæймаджы. Ныртæккæ баныхæстæ цæуынц горæт Думайы цы боевиктæ баззадысты, уыдонимæ, цæмæй уыдон дæр ацæуой Идлибмæ.
14 фарсты
УФ-йы Фæсарæйнаг хъуыддæгты министрад ныммыхуыр кодта 14 фарсты Стырбританимæ Скрипалы хъуыддаджы фæдыл. Фыццаг рады, уæрæсейаг дипломаттæ æрдомдтой, зæгъгæ, Уæрæсейы цæмæннæ бауагътой уæрæсейаг дыууæ æмбæстагмæ, кæцытæ хъыгдард баййæфтой бритайнаг зæххыл, афтæ ма сын бамбарын кæной хъыгдардбаййафджытæн цахæм антидоттæ бауагътой, уый тыххæй. Уымæй дарддæр ма номхыгъды сты къорд фарсты уыцы буарады тыххæй, кæцыйæ фæхъæстæ Стырбританийы раздæры шпион. Солсберы спайдагонд буарад уæрæсейаг кæй у, уый цахæм миниуджыты бындурыл фи-даргонд æрцыд. Афтæ ма минæварад цы-мыдис кæны, Лондонмæ хъæстæгæнæн буарады контролон хуызгæтæ ис, уымæ, цæмæй анализ саразой æмæ бафидар кæной, æцæгæйдæр дзы спайда кодтой, уый.
Иннæмæй та ахæм антидоттæ куыд разындысты бритайнаг медиктæм инциденты бынаты? Франц цы бындурыл баконд æрцыд техникон æмгуыстадмæ инцидент равзарынмæ, цыран хъыгдард баййæфтой уæрæсейаг æмбæстæгтæ? Цы ахаст ис Францæн Стырбританийы территорийыл дыууæ уæрæсейаг æмбæстаджы инцидентмæ æмæ æндæртæ.
Ацыдысты америкæйаг дипломаттæ
Америкæйаг дипломаттæ ацыдысты Санкт-Петербурджы генералон консуладæй. 31-æм марты америкæйаг дипломатон миссийы кусджытæ æнæхъæн бон æмбырд кодтой сæ дзаумæттæ, ластой сæ документтæ оргтехникæимæ. Бæстыхайы æртыккаг уæладзыджы балкъонæй систой сæ тырыса.
Иумæйаг æфсæддон ахуыртæ
АИШ æмæ Хуссар Корея уадзын райдыдтой иумиаг æфсæддон ахуыртæ, кæцытæ фæстæдæрмæ æргъæвд æрцыдысты Пхенчханы Олимпиадæйы тыххæй. Æфсæддон ахуыртæ уагъд цæудзысты апрелы фæудмæ, хайад сæ райсдзысты 290 мин хуссаркорейæйаг æмæ 11,5 мин америкæйаг æфсæддон службæгæнæджы.
Фæнд кæны «Челси» байсын
Стырбританийы премьер-министр Тереза Мэй æмбырд кæны бæлвырдгæнæн базæ Лондоны «Челси»-йы хицау Роман Абрамовичмæ ахасты æмæ баныфсæвæрдта, уæрæсейагæн йæ футболон клуб «Челси» æмæ ма Стырбританийы цы исад ссардта, уый дæр байсын. Ныртæккæ уæрæсейаг олигарх ис Лондоны æмæ æввахс бонты йæ адвокаты бахъæуæдзæн бынæттон хицауадæн радзурын, ахæм хъæздыг цард цы фæрæзтæй кæны, уый тыххæй. Бритайнаг прессæйы информацимæ гæсгæ, Роман Абрамовичæн Стырбританийы ис 180 миллиард доллары аргъ активтæ. Ныртæккæ Абрамович скъуыддзаг кæны, уыцы активтæн цы сараза, уый, уымæн æмæ тас у, уыдон Стырбританийы хицауадæн баззайынæй.
Космикон дзул
Уæрæсейы райдыдтой фæфылдæргонд рæстæгмæ кæмæй пайда кæной, ахæм космикон дзулыл кусын. Дзулфыцæн сæудæджерады директор Марина Костюченко фехъусын кодта, зæгъгæ, институты райдыдтой уæрæсейаг космонавттæн дзул бакусыныл, кæцы уыдзæн ногконды хуызæн æмæ дзы пайдагæнæн уыдзæн дыууæ азы дæргъы. Ныртæккæ уæрæсейаг космонавттæ хæрынц дзул, кæцыйæ пайдагæнæн ис 15 мæйы дæргъы.
Фæмард 10 адæймаджы
Индийы Мадхья-Прадешы штаты горæт Индауры æркалд цыппаруæладзыгон бæстыхай, кæцыйы фæстиуæгæн фæмард сты 10 адæймаджы. Цалдæр адæймаджы райстой алыгъуызон травмæтæ. Фæлæ нырма бæстыхайы пырхæнты бын ис цалдæр адæймаджы æмæ уымæ гæсгæ, гæнæн ис фæфылдæр уа фæмардуæвджыты æмæ цæфты нымæц. Бæстыхай æркалд, автомобил ыл кæй сæмбæлд, уый аххосæй. Трагедийы бынаты уагъд цæуынц ирвæзынгæнæн куыстытæ.
Информацион агентадты
хъусынгæнинæгтæм гæсгæ
Comments are closed, but trackbacks and pingbacks are open.