Ацы фембæлд уагъд æрцыд Хуссар Ирыстон æмæ Гуырдзыстоны æхсæн арæнгæрон хъæу Эргнетмæ хæстæг.
Сæйраджыдæр, ам уынаффæ цыд æдасдзинады фарстатыл, паддзахадон арæнтæ халыны цаутыл æмæ ӕндӕр ахсджиаг фарстатыл.
Цънелисы
æнæзакъонон пост
Хуссар Ирыстонæй механизмты форматы хуссарирыстойнаг делегацийы сæргълæууæг, Фæсконфликтон фарстатæ бæстонкæныны фæдыл РХИ-йы Президенты æххæстбарджын минæвары хæдивæг Коцты Егор фембæлдæн хатдзæгтæ аразгæйæ информацион фæрæзтæн афтæ радзырдта, зæгъгæ, Хуссар Ирыстон фылдӕр хъусдард здахы, цӕмӕй цалдæр азы размæ гуырдзиаг полициæгтæ Знауыры районы Уисты хъӕуы цы æнæзакъонон пост сæвæрдтой, уый нӕ республикӕйы территорийӕ иуварс ӕрцӕуа.
Уымӕй дарддӕр ма уынаффӕ цыд арæнты фæйнæфарс æрцæугæ цаутæ æмæ арæнты фӕтк фехалынимæ баст фарстатыл.
Коцты Егоры ныхӕстӕм гӕсгӕ механизмты фӕстаг фембӕлдӕй фӕстӕмӕ Уисты хъӕуы районы инциденттӕ хынцыд не рцыд. Уымӕй размӕ тальчы заводы территорийыл бафиппайдæуыд ӕбӕрӕг адæймæгты уӕвынад ӕмӕ гуырдзиаг полициæгты фарсӕрдыгӕй ӕнӕмбӕрстгонд архӕйдтытӕ.
Уымӕ гӕсгӕ Хуссар Ирыстон абоны онг дӕр бӕрнджын кӕны, цӕмӕй гуырдзиаг пост иуварс ӕрцӕуа ӕмӕ уыцы территорийыл уавӕр дестабилизаци кӕнынӕн фадӕттӕ мауал уа.
«Ацы фарсты тыххæй дзырд цæуы Механизмты фæлгæтты алы фембæлды рæстæджы дæр, фæ-лæ абоны онг дæр гуырдзиаг фарс иунæг иу къахдзæф нæ сарæзта уавæр æрбæстон кæныны фæдыл», – банысан кодта Коцты Егор.
Паддзахадон арӕнтыл
ӕдасдзинады фарстатӕ
Коцты Егор куыд банысан кодта, афтæмæй ма фембӕлды дзырд цыд паддзахадон арӕнтыл ӕдасдзинады фарстатыл. Хъусдард здӕхт ӕрцыд, гуырдзиаг полициæгтӕ арӕнтыл хизыны фӕтк кӕй фехалынц, уымæ. Йӕ хъуыдымӕ гӕсгӕ гуырдзиаг фарс бамбӕрста ацы хъуыддаг ӕмӕ ахӕм ӕнгӕс фӕткхалӕн цаутӕ хынцыд мауал хъуамӕ ӕрцӕуа.
Гуырдзиаг полициæгтӕ хъуамӕ, фыццаджыдӕр, уой сӕ бӕстӕйы къухдариуӕгады хъусдарды бын ӕмӕ фӕтк хъахъхъӕнын кæй хæс у, уыдон ӕнӕмбӕлон архӕйдтытӕ ма хъуамæ кӕной.
Уæлдæфон тыгъдад ӕмӕ
ӕндӕр фарстытӕ
Республикӕ Хуссар Ирыстоны паддзахадон арӕнтӕ хъахъхъӕнынӕн хӕцӕнгарз ӕмӕ ӕфсӕддон техникӕйӕ пайда кӕныны ног фӕткыл уынаффӕ цыд ӕви нӕ, уыцы фарсты фӕдыл хуссарирыстойнаг делегацийы къухдариуӕггӕнӕг афтӕ радзырдта, зӕгъгӕ, ӕнӕпилотон тӕхӕн аппаратты руаджы уӕлдӕфон тыгъдад хӕлд куы цӕуа, уӕд нæ паддзахадӕн бар ис сӕ ныхмӕ цахӕмдӕр фӕрӕзтӕй спайда кӕной.
Ацы фарстыл механизмты куысты дзырд нӕ цыд, фӕлӕ рӕгъмӕ хаст куы ӕрцыдаид, уӕд Коцты Егор куыд банысан кодта, уымӕ гӕсгӕ афтӕ чи дзуры, зӕгъгӕ, Хуссар Ирыстоны уæлдæфон тыгъдады нӕ тӕхынц гуырдзиаг ӕнӕпилотон тӕхӕн аппараттӕ, уыдон бакӕсӕд гуырдзиаг сайттӕм. Уыдон йемыдзаг сты, тӕхӕн аппараттӕ Хуссар Ирыстоны территорийыл куыд тӕ-хынц, уыцы видеоӕрмӕджытӕ ӕмӕ къамтӕй. Ӕмӕ бакӕсӕд хуссарирыстойнаг сегментмӕ дӕр, кӕддӕра дзы ахӕм ӕрмӕджытыл ис фембӕлӕн?
Бӕрӕг куыд у, афтæмæй Гуырдзыстоны сӕ патриотондзинад равдисыны нысанӕн алыгъуызон ӕхсӕнадон архайджытӕ ӕмӕ организацитӕ интернеты тыгъдады ӕвдисынц ӕнӕпилотон тӕ-хӕн аппаратты хайадистӕй видеоӕрмӕджытӕ.
Социалон хызæгты мыхуыр цы информаци цæуы, уыдонмæ гæсгæ бæрæг у, ацы æнæпилотон тæхæн аппараттæ уадзыныл фылдæр кæй арха-йынц Гуырдзыстоны æнæхицауадон организацитæ.
Алыгъуызон
фарстатӕ
Ленингоры районы Цъинагар ӕмӕ уымӕ ӕввахс хъӕуты донхӕры донӕй ифтонг кӕныны фарст нырма ӕнӕмӕнгхъӕуӕг нӕу, уымӕн ӕмӕ сӕрды райдиан бирӕ къӕвдатӕ фӕуарыд.
«Ацы аз нӕ цӕугӕдӕтты ӕмӕ Зонкъары донӕмбырдгӕнӕны бирӕ дон ис. Ӕмӕ донӕй хъуагдзинад куы ӕнкъардӕуа, уӕд гуырдзиаг фарсимӕ бадзургӕйӕ цадӕггай фӕфылдӕр кӕндзыстӕм Чысыл Леуахийы дон ӕмӕ Цъинагар ифтонг цӕудзӕн донхӕры донӕй», – банысан кодта Коцты Егор.
Йæ ныхӕстӕм гӕсгӕ ма план кæнынц Тирипоны къанауы сӕйраг рацӕуӕны арӕзтад. Уымӕн ӕмӕ 2008 азы августы хӕсты рӕстӕджы ӕфхӕрд баййӕфта срӕмыгъды рӕстӕджы. Ацы аз кӕд цалцӕггӕнӕн куыстытӕ кӕронмӕ конд ӕрцӕуой, уӕд ацы къанау донӕй уыдзæн едзаг ӕмӕ Ленингоры районы хъӕутӕ ӕнӕкъуылымпыйӕ исдзысты донхӕры дон.
Брифингы рӕстӕджы ма ныхасгӕнӕг радзырдта, зæгъгæ, фембӕлды уынаффӕ хаст ӕрцыд, цӕмӕй механизмты куысты хайадисджытӕ раздӕхой пандемийы агъоммӕйы форматмӕ. Карантины уавӕрты хайадисджыты нымӕц алы фарсӕй дӕр уыд 2-3 адӕймаджы. Радон фембӕлд уагъд цӕудзӕн хайадисджыты рауӕрӕхгонд скондӕй.
Уымӕй дарддӕр ма ныфс бавӕрдта, механизмты куысты райдианы куыд уыд, афтæ Хуссар Ирыстон ӕмӕ Гуырдзыстоны информацион фӕрӕзты минӕвӕрттӕ фембӕлды фӕстӕ традицимӕ гӕсгӕ, комментаритӕ исдзысты дыууӕ бӕстӕты делегациты къухдариуӕггӕнджытӕй.
Механизмты куысты хайадисджыты уынаффӕмæ гæсгæ фембӕлд уагъд ӕрцӕудзӕн ацы аз 12 сентябры.
КЪÆБУЛТЫ Маринæ
