Знауыры астæуккаг скъолайы 10-æм къласы ахуыргæнинаг Гатыгкоты Роберт сæрмагонд æфсæддон операцийы хайад цы ирон æфсæддонтæ исынц, уыдонæн гуманитарон æххуысы хуызы радта 50 мин сомы. Ацы æхцайы фæрæзтæ Роберт рамбылдта конкурс «Ученик года»-йы.
Парламенты депутат Бесаты Зитæ куыд радзырдта, афтæмæй йæм Роберт бахатыд, цæмæй йын йæ æхцайы фæрæзтæ сæвæрой Парламентæн банчы цы хыгъд гом æрцыд, уым. Ацы хыгъдмæ æхцайы фæрæзтæ æрвитынц куыд Парламенты кусджытæ, афтæ республикæйы цæрджытæ дæр.
«Знауыры районы æвзонг цæрæг мæм куы æрбахатыд, цæмæй конкурс «Ученик года»-йы цы преми райста, уый ирон æфсæддонтæн арвитæм, уæд мæ дисæн кæрон нал уыд. Уый тынг арфæйаг хъуыддаг у. Диссаг у, ахæм кары сывæллон кæй хъуыды кæны æфсæддонтæн баххуыс кæныныл. Зæрдæ сæрыстырдзинадæй байдзаг вæййы ахæм фæсивæдмæ кæсгæйæ. Мæ хъуыдымæ гæсгæ, ахæм фæсивæдимæ, нæ республикæйы сомбон уыдзæн рухс. Уый у хорз дæнцæг куыд кæстæр фæлтæрæн, афтæ хистæртæн дæр. Бузныджы ныхæстæ зæгъын фаг не сты Робертæн йæ хъæппæрисы тыххæй», – банысан кодта Бесаты Зитæ. Гатыгкоты Робертæн йæ æххуысы тыххæй бузныг загъта æххуысы хыгъды къухдариуæггæнæг, депутат Къуезерты Арсен дæр.
Гатыгкоты Роберт нын йæхæдæг куыд радзырдта, афтæмæй æрæджы Знауыры районы астæуккаг скъолайы уагъд цыдис конкурс «Ученик года», цыран хайад иста йæхæдæг дæр.
«Конкурсы хайад чи иста, уыдонæй алкæмæ дæр уыдис уыцы хъуыды, зæгъгæ, куы рамбулон, уæд æхца кæм бахардз кæндзынæн. Уæд æз мæхицæн загътон, зæгъгæ, кæд æз рамбулон, уæд сæ арвитдзынæн нæ ирон лæппутæй сæрмагонд æфсæддон операцийы хайад чи исы, уыдонæн. Афтæ рауад æмæ уыцы преми райстон æз. Æмæ мæ ныхасы хицау разындтæн. Нæ хъайтартæн мæ зæрдæ зæгъы, цæмæй уой æнæниз æмæ сæ алчидæр сæрæгасæй æрыздæха йæ бинонтæм», – загъта Роберт.
