Рагæй фæстæмæ бирæ дзырд цæуы, æнæзакъонæй нæ горæты бирæуæладзыгон хæдзæрттæм хæстæг цы мæнгагъуыстытæ æмæ æфсæн гаражтæ арæзт æрцыд, уыдоныл. Горæт кæй æвидыц кæнынц, уымæ гæсгæ горæты администраци рахаста фæндон, цæмæй ахæм арæзтадтæ пырх æрцæуой æмæ æфсæн гаражты та сæ хицæуттæ аласой æндæр бынæттæм.
Æрæджы горæты администрацийы архитектурæйы, цæрæнуатон-коммуналон хæдзарады хайадты кусджытæ бацыдысты Плиты Харитоны уынджы бирæуæладзыгон хæдзæртты кæртмæ. Ам цы æнæзакъонон мæнгагъуыстытæ æмæ æфсæн гаражтæ ис, уыдон хицæуттимæ аныхас кодтой. Алы гаражыл конд æрцыд фæдзæхсæн гæххæтт дæр. Уыдон цæрджытæй домынц, цæмæй 1-æм июлмæ айсой æмæ ссæрибар кæной уыцы хæдзæртты алыварс территори. Гаражтæ кæм саразой, æрæвæрой, уыцы фæзуат уыдонæн цалдæр азы размæ горæты цæрæнуатон-коммуналон хæдзарады кусджытæ рахицæн кодтой. Цæрджыты кæд ныр цалдæр азы фæдзæхсынц, уæддæр ницы мадзæлттæ исынц. Ныр горæты администрацийы кусджытæ карзæй зæгъынц, цæрджытæ куынæ айсой сæ гаражтæ, уæд сæхæдæг кæй бакæндзысты уыцы куыст. Горæты сæйраг архитектор куыд зæгъы, афтæмæй цалдæр азы размæ горæты администраци цæрджытæн цы фæзуат рахицæн кодта гаражтæн, уым æртæ азы æмгъуыдмæ йæ хицау капиталон гараж куынæ сараза, уæд йæ тых сафы, горæты администрациимæ цы бадзырд сарæзта, уый. Закъонон гаражыл та, зæгъгæ, нымад цæуы, арæзтады нормæтæн дзуапп чи дæтта, ахæм. Уыцы домæнтæн та дзуапп куынæ дæтта арæзтад, уæд уыдон дæр ист æрцæудзысты, цæмæй ма фыдуынд кæной горæт. Зæгъæм, бирæ цæрджытæ сæ гаражты сæртыл самадтой дыккаг уæладзгуытæ дæр. Уый тыххæй уыдонмæ нæй бары гæххæттытæ æмæ уый дæр нымад цæуы æнæзакъононыл.
УАЗÆГТЫ Марфа
Comments are closed, but trackbacks and pingbacks are open.