Рагæй фæстæмæ бирæ дзырд цæуы нæ горæты бирæуæладзыгон хæдзæрттæм хæстæг æнæзакъонæй цы мæнгагъуыстытæ æмæ æфсæн гаражтæ арæзт æрцыд, уыдоныл. Уыдон горæт кæй æвидыц кæнынц, уымæ гæсгæ горæты администраци рахаста фæндон, цæмæй ахæм арæзтæдтæ пырх æрцæуой, æфсæн гаражтæ та сæ хицæуттæ аласой æндæр бынæттæм.
Æрæджы та горæты администрацийы архитектурæ æмæ цæрæнуатон-коммуналон хæдзарады кусджытæ бацыдысты Плиты Харитоны уынджы бирæуæладзыгон хæдзæртты кæртмæ. Ам кæрты цы æнæзакъонон мæнгагъуыст æмæ æфсæн гаражтæ ис, уыдон хицæуттимæ аныхас кодтой. Уыдон цæрджытæй домынц, цæмæй айсой æмæ ссæрибар кæной уыцы хæдзæртты алыварс территорийыл цы гаражтæ æрæвæрдтой, уыдон. Гаражтæ кæм саразой, ахæм фæзуат уыдонæн цалдæр азы размæ горæты цæрæнуатон-коммуналон хæдзарады кусджытæ рахицæн кодтой. Ахæм æнгæс фæдзæхстытæ цæрджытæ кæд ныр цалдæр аз æййафынц, уæддæр та алы æфсæнттæй сæхи бааууон кæнынц. Уымæ гæсгæ ацы хатт горæты администрацийы кусджытæ карзæй зæгъынц, цæрджытæ куынæ айсой сæ гаражтæ, уæд сæхæдæг кæй бакæндзысты уыцы куыст. Горæты сæйраг архитектор куыд зæгъы, афтæмæй цалдæр азы размæ горæты администрацийы цы фæзуæттæ рахицæн кодта гаражтæн, – уым æртæ азы æмгъуыдмæ йæ хицау капиталон гараж куынæ сараза, уæд йæ тых сæфы, горæты администрациимæ цы бадзырд сарæзта, уымæн. Закъонон гаражыл та, зæгъгæ, нымад цæуы ахæм арæзтад, кæцы дзуапп дæтты арæзтадон нормæтæн. Цæвиттон, бирæ цæрджытæ сæ гаражты сæртыл самадтой дыккаг уæладзгуытæ дæр. Уый тыххæй уыдонмæ нæй бары гæххæттытæ. Уымæ гæсгæ, горæты администраци курæг у цæрджытæй, цæмæй æнæ æмбæлон гæххæттæй æмæ æнæ архитекторы разыйæ ма аразой æнæзакъонон арæзтадтæ.
УАЗÆГТЫ Марфа
Comments are closed, but trackbacks and pingbacks are open.